Asino ti Makabael a Mangbalbaliw iti Lubongtayo?

“Kayat dagiti tattao iti lubong dagiti sungbat nga aggapu kadagiti panguluenda. Mangnamnamada kadagiti solusion, saan a parparawpaw a pamuspusan wenno pambar.”​—UNITED NATIONS SECRETARY-GENERAL BAN KI-MOON.

AGBIBIAGTAYO iti awagan ti Biblia a “dagiti napeggad a tiempo a narigat a pakilangenan.” (2 Timoteo 3:1) Kanayontayo a makangngeg iti makapadanag a damag maipapan iti gubat, terorismo, panagsuek iti ekonomia, ken dandanin panagrakaya ti daga.

Adda kadi namnama a sumayaatto pay ti kasasaad? Kabaelan kadi dagiti gobierno ti tao a solbaren dagiti problema ti lubong? Wenno adda sabali a masapul a pagpatulongantayo?

Ti Kuna ti Adu a Nasion

Kuna ti adu a nasion a supsuportaran kano ida ti Dios. Kas pagarigan, iti Nailian a Sapata ti United States of America, naibaga a dayta a pagilian ket “maysa a nasion nga iturturayan ti Dios.” Naisurat pay kadagiti kuartada ti sasao nga “In God We Trust” (Agtalekkami iti Dios).

Nupay kasta, adu nga umili iti United States ti di mamati nga adda Dios​—ket kasta met laeng iti adu a pagilian nga agkunkuna a tultulongan ida ti Dios. Uray dagiti mamati iti Dios nagduduma ti panangmatmatda no agingga iti ania ti pagpatinggaan ti ibaballaet ti Dios iti ar-aramid ti tao.

● Kuna ti dadduma a ti Dios ket di pulos maseknan iti tattao ken binaybay-anna nga iturayanda ti bagbagida.

● Adda met dagiti agkuna nga agtigtignay ti Dios babaen kadagiti gobierno ti tao ken bembendisionanna dagiti panagreggetda a mangbalbaliw iti lubongtayo.

Ania kadagita ti patiem, no adda man?

Usigem: No umiso ti umuna, nakapimpiman ti kasasaadtayo. No umiso ti maikadua, nasken ngarud nga isaludsodtayo iti bagitayo: ‘Adda kadi nasion a mas paborito ti Dios? No agginnubat ti dua a nasion ket agpadada a sipapasnek a mangikararag a mangabakda, asino kadakuada ti dasigan ti Dios?’ Posible kadi nga awan ti dasiganna?

Ti Isursuro ti Biblia

1. Saan a naparsua ti tao tapno iturayanna ti bagina. Kuna ti Biblia: “Saan a kukua ti tao a magmagna uray ti panangiturong iti addangna.” (Jeremias 10:23) Paneknekan ti historia a pudno dayta. Ti gobierno ti tao ket saan a nakaipaay iti nasaysayaat a lubong, uray no nagsayaat dagiti plano ken intension dagiti agtuturay. Imbes ketdi, “ti tao dinominaranna ti tao iti pakadangrananna.”​—Eclesiastes 8:9.

2. Maseknan ti Dios iti kasasaadtayo. Saan la a basta ammona ti kasasaadtayo, maseknan pay ketdi iti sagsagabaentayo. Kasta met nga agtignayto tapno tulongannatayo. Kasano? Babaen ti Pagarianna a “saanto a pulos madadael.”​—Daniel 2:44.

3. Ti Pagarian ti Dios ket pudno a gobierno. Dayta met la a Pagarian ti idawdawat ti minilion a napasnek a tattao iti masansan a maikararag nga Amami, wenno Kararag ti Apo. Iti dayta a kararag, ipakaasida iti Dios: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Saan la nga idiay langit ti pasayaaten ti Pagarian ti Dios; ibanagnanto met ti pagayatan ti Dios ditoy daga.

4. Babaen iti Pagarianna, kabaelan ti Dios a balbaliwan ti lubongtayo ken sigurado nga aramidenna dayta. No pagduaduaam dayta, usigem ti isursuro ti Biblia.

● Inikkan ti Dios ti immuna a tattao iti perpekto a pangrugian iti natalna a kasasaad.​—Genesis 1:27-31.

● Iti laksid dagiti problema a makitkitatayo, saan latta a nagbalbaliw ti panggep ti Dios para iti daga.​—Salmo 37:11, 29.

● Addan dagiti inaramid ti Dios tapno matungpal ti orihinal a panggepna para iti daga ken iti tattao.​—Juan 3:16.

Kayatmo kadi ti makasursuro iti ad-adu pay maipapan iti Pagarian ti Dios ken no kasano a balbaliwanna ti lubongtayo? Maragsakan a tumulong kenka dagiti Saksi ni Jehova a mangipabpablaak iti daytoy a magasin. Mabalinmo ti makisarita kadakuada maipapan kadagiti sumaganad a topiko inton sarungkarandaka manen iti pagtaengam.

● Ania ti Pagarian ti Dios?

● Ania dagiti aramidenna a panagbalbaliw?

● Kaano ken kasano nga aramiden ti Pagarian ti Dios dagita a panagbalbaliw?

NAPANUNOTMO KADIN?

● Apay a limitado ti maaramidan dagiti gobierno ti tao?​—Jeremias 10:23.

● Kasano nga impakita ti Dios a maseknan kadatayo?​—Juan 3:16.

● Ania ti aramidento ti Pagarian ti Dios para iti dagatayo ken kadagiti agnaed iti dayta?​—Salmo 37:11, 29.

[Blurb iti panid 27]

Kabaelan kadi dagiti gobierno ti tao a solbaren dagiti problema ti lubong? Wenno adda sabali a masapul a pagpatulongantayo?