Ania ti Manamnamak Inton Addan Asawak?​—Paset 1

KAS iti nalabit napanunotmo, maysa a balasang ti nangibaga iti umuna a sasao iti ngato; ti met maikadua ket sasao ti addan asawana. Ngem nalabit ti dimo napanunot, maymaysa a tao ti nangibaga kadagita.

Ania ti napasamak? No planom ti makiasawanto, kasanom a maliklikan nga agbalin a nariribuk a panagasawa ti romantiko nga arapaapmo?

Realidad: Ti kinaragsakmo iti panagasawam kaaduanna nga agpannuray iti ekspektarem iti dayta.

Daytoy nga artikulo​—ken ti artikulo nga “Agimtuod Dagiti Agtutubo” iti Agriingkayo! iti sumaganad a bulan​—tulongannaka nga agbalin a realistiko kadagiti namnamaem.

Ania ti mabalin a realistiko a namnamaem iti panagasawa? Iti pangababaan:

1. Manamnamam dagiti pagimbagam

2. Manamnamam dagiti problema

3. Manamnamam dagiti dimo ekspektaren

Saggaysaentayo nga usigen dagita.

MANAMNAMAM DAGITI PAGIMBAGAM

Iparegta ti Biblia ti positibo a panangmatmat iti panagasawa. (Proverbio 18:22) Adtoy ti dadduma a pagimbagan a mabalin nga ekspektarem.

Addan kaduam. Kuna ti Biblia a kalpasan a naparsua ti umuna a lalaki a ni Adan, kinuna ti Dios: “Saan a nasayaat iti tao nga agtultuloy nga is-isuna.” Kalpasanna, pinarsuana ni Eva tapno adda kadua ni Adan. (Genesis 2:18) Pinarsuana ti tunggal maysa kadakuada nga addaan kadagiti naisangsangayan a kualidad tapno agdumada, ngem kaskasdi nga agkabagayda. Isu a ti agassawa ket makapagbalin a nagsayaat nga agkadua.​—Proverbio 5:18.

Addan katinnulongmo. Kuna ti Biblia: “Ti dua nasaysayaat ngem iti maysa . . . ta no ti maysa kadakuada matuang, daydiay sabali mabalinna a bangonen ti kaduana.” (Eclesiastes 4:9, 10) Sigurado nga agaplikar met dayta iti panagasawa. “Kaipapananna ti panagtinnulong nga agtrabaho ken ti panagbalin a napakumbaba ken ti pasaray panagpabus-oy,” kuna ti agtutubo a ni Brendaa a nabiit pay a nagkasar.

Addan kasinningedmo. Kuna ti Biblia: “Masapul nga annongen ti lalaki ti rebbengna iti asawana, ket kasta koma met ti aramiden ti babai. Agpadada koma a mangted iti kasapulan ti tunggal maysa.” (1 Corinto 7:3, Ti Baro a Naimbag a Damag Biblia) No kasadokan, matagiragsakmo ti pannakidenna a dika madandanagan ken agbabbabawi, a masansan a nakalkaldaang nga epekto ti panagdenna sakbay ti panagkasar.​—Proverbio 7:22, 23; 1 Corinto 7:8, 9.

Laglagipem: Ti panagasawa ket sagut ti Dios. (Santiago 1:17) No surotem dagiti prinsipiona, manamnamam a naragsakto ti panagasawam.

Panunotem daytoy: Negatibo kadi ti panangmatmatmo iti panagasawa gapu iti saan a nasayaat a makitkitam​—nalabit iti mismo a pamiliam? No wen, siasino dagiti nasayaat a pagwadan a mabalinmo a tuladen?

MANAMNAMAM DAGITI PROBLEMA

Realistiko ti panangmatmat ti Biblia iti panagasawa. (1 Corinto 7:28) Adtoy ti sumagmamano a problema a mabalinmo nga ekspektaren.

Di pagkinnaawatan. Awan ti dua a tao nga eksakto nga agpada​—malaksid iti kinaimperpektoda. (Roma 3:23) Isu a sagpaminsan a di agkinnaawatan ti agassawa uray no agkatunosanda unay. No dadduma, makaibagada pay ketdi iti di nasayaat a sasao a pagbabawyandanto met laeng. “No ti asinoman saan a maitibkol iti sao, daytoy ket perpekto a tao,” kuna ti Biblia. (Santiago 3:2) Imbes nga ikagumaanda ti di realistiko a panangliklik iti amin a dida pagkinnaawatan, dagiti naballigi a pagassawaan sursuruenda a pagsaritaan ken risuten dagita apaman a tumaudda.

Pannakapaay. “Nagadu ti mabuybuya kadagiti sine ken programa iti TV maipapan iti babai a nakasarak iti ‘perpekto’ nga asawana ket kanayonton a naragsak ti biagda,” kinuna ti agtutubo a ni Karen. Mabalin a maupay ti agassawa no saan a kasta ti pagtungpalan ti relasionda. Siempre, kalpasan ti kasar addanto pay dagiti pakapilawan ken ugali a madiskobreda. Ngem nasken a laglagipenda a ti pudno nga ayat “ibturanna ti amin a bambanag”​—uray ti pannakapaay.​—1 Corinto 13:4, 7.

Pakaringgoran. Kuna ti Biblia a dagiti naasawaan ket “maringgoran iti bambanag ti lubong.” (1 Corinto 7:33, 34) Natural laeng ti kasta a pakaringgoran ken masansan a maitutop pay ketdi. Kas pagarigan, mabalin a marigatanka a mangyan-anay iti sapulmo. Nalabit nasken a duakayo nga agassawa ti agtrabaho tapno adda igatangyo iti taraon, kawes, ken pagabangyo iti balay. Ngem makapagballigikayo no agtinnulongkayo a mangsuporta iti pamiliayo.​—1 Timoteo 5:8.

Laglagipem: No ti pannakinobio ket kas iti panagpatayab iti ullaw, ti panagasawa ket kas iti panagpatayab iti eroplano. Ad-adu nga abilidad ken panagregget ti kasapulan tapno masolbar dagiti narigat a problema, ngem makapagballigikayo.

Panunotem daytoy: No adda diyo pagkinnaawatan kadagiti nagannak wenno kakabsatmo, kasano ti panangsangom ita iti dayta? Rasonableka kadi latta uray nasaktan ti riknam? Kasano ti panangsangom iti pakaringgoran?