No Agulbod ti Anakmo

TI PROBLEMA

Agay-ay-ayam ti lima ti tawenna nga anakmo iti bangir a kuarto. Pagammuan ta adda nangngegmo a nabuong. Tinaraymo ti anakmo ket nakitam a nakatakder iti abay ti nabuong a porselana a plorera. Makitam iti rupana nga isu ti makimbasol.

“Sika ti nakabuong?” sisiserioso nga insaludsodmo.

“Saan Mommy!” insigida nga insungbatna.

Saan a dayta ti damo a natiliwam ti anakmo nga agdadata nga agul-ulbod. Rumbeng kadi a madanaganka?

TI MASAPUL A MAAMMUAM

Amin a panagulbod ket dakes. Kuna ti Biblia a karimon ni Jehova a Dios ti “ulbod a dila.” (Proverbio 6:16, 17) Adda nadagsen a dusa nga impataw ti Linteg a naited iti Israel iti asinoman a nangallilaw iti padana a tao.—Levitico 19:11, 12.

Ngem saan nga agpapada ti amin a panagulbod. Dadduma a panagulbod ket nairanta a mangdangran iti sabali. Adda met ti agulbod gapu ta napilitan, nalabit tapno maliklikanna ti maibabain wenno madusa. (Genesis 18:12-15) Nupay di umiso ti amin a panagulbod, adda dagiti nadagdagsen a kita ti panagulbod. No nagulbod ti anakmo, ikabilangam ti edadna ken ti rason nga inaramidna dayta.

Rumbeng a korehirem bayat nga ubing pay ti anakmo. “Napateg a masursuro dagiti annak ti panangibaga iti kinapudno, nangruna no narigat nga aramiden dayta,” insurat ni Dr. David Walsh. “Dagiti relasion ket nakadepende iti panagtalek ken ti panagulbod dadaelenna dayta a panagtalek.”a

Ngem dika agdanag. Saan a gapu ta nagulbod ti anakmo ket agbalbalinen a dakes. Tandaanam ti kuna ti Biblia: “Ti kinamaag naisinggalut iti puso ti maysa nga ubing.” (Proverbio 22:15) Adda dagiti ubbing a mangipakpakita iti kasta a kinamaag babaen ti panagulbodda. Nalabit ipagarupda a dayta ti panglakaanda a mangliklik iti pannakadusada. Napateg ngarud no kasano ti reaksionmo iti dayta.

TI MABALINMO NGA ARAMIDEN

Ikagumaam nga ammuen no apay nga agul-ulbod ti anakmo. Mabuteng kadi a madusa? Dina kadi kayat a madismayaka? No agimbento kadagiti estoria tapno pagbilibenna dagiti gagayyemna, gapu ngata ta dina pay maawatan ti nagdumaan ti realidad ken pantasia? No ammom ti rason nga agul-ulbod ti anakmo, nasaysayaat ti panangkorehirmo kenkuana.—Prinsipio ti Biblia: 1 Corinto 13:11.

No dadduma, diretsaem imbes a saludsodam. Iti nadakamaten nga eksena, ti ina a makaammon iti agpayso a napasamak sisiserioso nga insaludsodna iti anakna: “Sika ti nakabuong?” Nagulbod ti ubing, nalabit gapu ta mabuteng nga ungtan ni nanangna. Ngem imbes a mangakusar ti panagsaludsodna, ipapantayon a basta kinuna ti ina: “Alla, nabuongmo ti plorera!” Yantangay diniretsana imbes a nagsaludsod, dina naikkan iti gundaway ti anakna a masulisog nga agulbod—ken matulonganna a makasursuro a kanayon nga agbalin a napudno.—Prinsipio ti Biblia: Colosas 3:9.

Komendaram ti panagbalinna a napudno. Natural a kayat ti annak a paragsaken dagiti nagannakda, isu a gundawayam dayta. Ibagam iti anakmo a nakapatpateg a prinsipio iti pamiliayo ti panagbalin a napudno isu a namnamaem nga agbalin isuna a kasta.—Prinsipio ti Biblia: Hebreo 13:18.

Ipaawatmo iti anakmo a ti panagulbod dadaelenna ti panagtalek ken kasapulan ti nabayag a tiempo sakbay a maisubli dayta. Tapno agtultuloy nga ipakitana ti nasayaat a kababalin, komendaram no ibagana ti agpayso. Kas pagarigan, mabalin nga ibagam, “Maragsakanak nakkong ta napudnoka.”

Mangipakitaka iti ulidan. Sigurado a dimo manamnama nga agbalin a napudno ti anakmo no mangngegna nga ibagam ti kas iti “Ibagam nga awanak” no dimo kayat ti makisarita iti immawag iti telepono wenno “Diak makapanaw ta agsakitak” idinto ta ti agpayso, kayatmo laeng ti agrelaks.—Prinsipio ti Biblia: Santiago 3:17.

Usarem ti Biblia. Dagiti prinsipio ken salaysay ti Biblia maipapan kadagiti pudno a pakasaritaan iti biag isursuroda ti panagbalin a napudno. Ti libro nga Agsursuroka iti Naindaklan a Mannursuro nga impablaak dagiti Saksi ni Jehova ket makatulong kenka a mangipasagepsep iti anakmo kadagiti prinsipio ti Biblia. Ti kapitulo 22 ket napauluan iti “No Apay a Saantayo Koma nga Agulbod.” (Kitaem ti naadaw iti dayta iti kahon a “Libro a Makatulong iti Anakmo.”)