Kasano a Nangrugi ti Biag?

NALABIT ipapan ti dadduma nga “ebolusion” ti pilien ti maysa a nalaing iti siensia idinto ta “panamarsua” ti sungbat ti maysa a relihioso.

Ngem saan a kanayon a kasta.

Kinapudnona, adu nga edukado a tattao, a pakairamanan ti dadduma a sientista, ti mangkueskuestionar iti kinaumiso ti teoria ti ebolusion.

Usigem ni Gerard a propesor ti entomology (siensia iti panangadal kadagiti insekto) a nasuruan iti ebolusion idi ages-eskuela iti kolehio. “No adda eksamen,” kunana, “ti isungbatko ket dagiti sungbat a kayat dagiti propesor—ngem diak mamati kadagita.”

Apay nga uray ti dadduma a nalaing iti siensia ket marigatan a mangakseptar a timmaud ti biag babaen iti ebolusion? Tapno masungbatan dayta, usigem ti dua a saludsod a mangrirriribuk iti adu nga agsuksukisok: (1) Kasano a nangrugi ti biag? ken (2) Kasano a timmanor ti sibibiag a bambanag?