Milford Sound
LUGLUGAR KEN TATTAO
Panagpasiar Idiay New Zealand
MAPAPATI nga agarup 800 a tawenen ti napalabas idi nagbaniaga ti tribu a Maori iti rinibu a kilometro iti baybay, sa nagyanda idiay New Zealand. Nadiskobreda sadiay ti klase ti daga a naiduma la unay iti tropikal nga isla ti Polynesia a naggapuanda. Adda pasetna a kabambantayan, kayeluan, kaniebian, ken adda napupudot nga ubbog (hot spring). Agarup 500 a tawen kalpasanna, sabali pay a puli ti dimmappat manipud iti adayo a kontinente ti Europa. Ita, kaaduan a New Zealander ti mangsursurot kadagiti tradision a naggapu iti Anglo-Saxon ken Polynesian. Aggigian iti siudad ti dandani 90 a porsiento ti populasion. Pagaammo ti siudad ti Wellington kas ti kaabagatanan a kabesera ti lubong.
Agburburek a kapitakan iti North Island
Uray no adayo ti New Zealand, saan a pakasdaawan nga umabut iti tallo a milion a turista iti kada tawen ti bumisbisita gapu iti nagduduma ken makaatrakar a buya ti aglawlaw.
Dumakkel ti silver tree fern agingga iti nasurok a 10 a metro
Sakbay ti 1948, naipagarup a naungawen (extinct) ti di makatayab a takahe
Ipagpannakkel ti New Zealand ti adu a klase ti animal ken mula. Ad-adu a kita ti dakkel a billit a di makatayab ti makita ditoy. Ditoy laeng a masarakan ti tuatara, maysa a reptilia a kalanglanga ti iguana, nga agbiag agingga iti 100 a tawen! Adda met bassit a bilang ti mamalia a masarakan laeng iti New Zealand, kas iti sumagmamano a kita ti panniki ken dadduma a dadakkel nga animal iti baybay kas iti balyena ken lumbalumba (dolphin).
Dandanin 120 a tawen nga aktibo dagiti Saksi ni Jehova iti New Zealand. Mangisursuroda maipapan iti Biblia iti di kumurang a 19 a lengguahe a pakairamanan dagiti pagsasao a Polynesian a Niuean, Rarotongan, Samoan, ken Tongan.
Dagiti Maori nga agsalsala a nakasuot iti tradisional a bado