Ania ti Napasamaken iti Respeto iti Pada a Tao?

NO APAY A NAPATEG TI RESPETO ITI PADA A TAO

No respetuentayo ti padatayo a tao, pagkalmaenna ti tension ken maliklikan a kumaro ti maysa a situasion.

Kuna ti maysa a proverbio ti Biblia: “Ti naalumamay a sungbat pabaawenna ti pungtot, ngem ti nagubsang a sao rubrobanna ti unget.” (Proverbio 15:1) Ti awanan respeto a panagsasao ken panagtigtignay rubrobanna laeng ti nabara a situasion a masansan nga agresulta iti dakdakes pay a problema.
Kinuna ni Jesus: “Sawen ti ngiwat ti linaon ti puso.” (Mateo 12:34) No awanantayo iti respeto, mabalin nga ipakitana no ania ti pudpudno a riknatayo kadagiti tattao a naiduma kadatayo iti puli, tribu, pagilian, wenno kasasaad iti biag.

Iti nasurok a 32,000 a nasurbey itay nabiit iti 28 a pagilian, 65 a porsiento ti nagkuna nga ita pay laeng a nakitada ti kastoy kakaro a kinaawan modo ken kinaawan respeto iti pada a tao.

TI MABALINMO NGA ARAMIDEN

Respetuem koma ti asinoman a kalanglangenmo uray naiduma kenka ti kapanunotanna. Kitaem koma dagiti bambanag a pagpadaanyo. Makatulong dayta tapno maliklikam ti agbalin a manangkritikar wenno mananghusgar.

“Isardengyo ti mangukom tapno saankayo a maukom.”—Mateo 7:1.

Tratuem ti dadduma a kas iti kayatmo a pannakatratom. No nasayaat ken patas ti panangtratom iti dadduma, mabalin a kastanto met ti panangtratoda kenka.

“No ania ti kayatyo nga aramiden dagiti tattao kadakayo, aramidenyo met dayta kadakuada.”—Lucas 6:31.

Manangpakawanka koma. Saanmo koma a dagus a panunoten a kayatnaka a saktan ti maysa, isu a palabsem koma ti saan a nasayaat a naibaga wenno naaramidna kenka.

“Ti pannakatarus ti tao ti mangpabannayat iti pungtotna, ken kinapintas kenkuana ti panangpakawan iti basol.”—Proverbio 19:11.

Iti uneg ti Kingdom Hall dagiti Saksi ni Jehova sakbay a mangrugi ti gimong. Naragsak nga agkikinnablaaw ken agsasarita dagiti tattao nga agduduma ti edad ken kasasaadda iti biag.

TI AR-ARAMIDENMI

Kas Saksi ni Jehova, ipakpakita ken iparparegtami ti panangrespeto iti pada a tao iti lugar a pagnanaedan ken pagtrabtrabahuanmi.

Libre dagiti pannursuro ti Biblia nga isursuromi iti amin a tao, ngem saanmi nga ipilpilit kadakuada dagiti patpatien wenno opinionmi. Ikagkagumaanmi nga iranud ti mensahemi “buyogen ti kinaalumamay ken nauneg a panagraem,” kas iti ibagbaga ti Biblia.—1 Pedro 3:15; 2 Timoteo 2:24.

Awan ti idumdumami ken awatenmi kadagiti gimongmi ti amin a kita ti tattao a mayat nga agadal kadagiti pannursuro ti Biblia. Ikagkagumaanmi a ‘raemen ti amin a kita ti tattao’ uray no naiduma kadakami ti panangmatmat wenno patpatienda.—1 Pedro 2:17.

Resrespetuenmi ti autoridad ti gobierno iti lugarmi. (Roma 13:1) Agtultulnogkami kadagiti linteg ken agbaybayadkami kadagiti buis. Ken nupay neutralkami iti politika, resrespetuenmi ti kalintegan ti maysa a mangaramid iti bukodna a desision mainaig iti politika.