Ti Panagtulnog Salaknibannaka

NARAGSAKKA ngata no maaramidmo amin a kaykayatmo? No dadduma, mapampanunotmo kadi a dimo kayat nga adda mangbilbilin kenka? Ibagam man kaniak ti agpayso.—

Ngem ania ngata ti nasaysayaat? Talaga kadi a nainsiriban nga aramidem amin a kayatmo? Wenno nasaysayaat kadi no agtulnogka kada tatang ken nanangmo?— Kuna ti Dios a rumbeng nga agtulnogka kadakuada, isu a sigurado nga adda nasayaat a rason no apay nga imbilinna dayta. Ammuenta no ania dayta.

Mano ti tawenmon?— Ammom kadi no mano ti tawen ni tatangmo?— Mano ti tawen ni nanangmo wenno ni lolam wenno ni lolom?— Ad-adu nga amang ti tawenda ngem sika. No ad-adu ti tawen ti tao, ad-adu metten ti tiempona a nagsursuro. Ad-adu ti nangngegna ken ad-adu ti nakitana ken ad-adu ti naaramidanna iti tunggal tawen. Gapu iti dayta, makasursuro dagiti ubbing kadagiti nataengan.

Adda kadi am-ammom nga ub-ubing ngem sika?— Ad-adu kadi ti ammom ngem isuna?— Apay nga ad-adu ti ammom?— Ad-adu ngamin ti tawenmo. Ad-adu ti tiempom a nagsursuro no idilig iti daydiay ub-ubing ngem sika.

Siasino ti ad-adu ti tawenna ngem sika wenno siak wenno iti asinoman?— Ni Jehova a Dios. Ad-adu ti ammona ngem sika, ken ad-adu ti ammona ngem siak. No adda ibagana nga aramidentayo, sigurado a dayta ti umiso, nupay kasla narigat nga aramiden. Ammom kadi nga adda tiempo a narigatan met idi nga agtulnog uray ti Naindaklan a Mannursuro?—

Iti naminsan, adda nakarigrigat nga impaaramid ti Dios ken ni Jesus. Nagkarkararag ni Jesus gapu iti dayta, kas makitatayo ditoy. Inkararagna: “No kayatmo, ikkatem kaniak daytoy a kopa.” Iti daytoy a kararag, impakita ni Jesus a saan a kanayon a nalaka nga aramiden ti pagayatan ti Dios. Ngem ania ti kinuna ni Jesus iti ngudo ti kararagna? Ammom kadi?—

Kastoy ti kinuna ni Jesus: “Saan koma a ti pagayatak, no di ket ti pagayatam ti maaramid.” (Lucas 22:​41, 42) Wen, kayatna a ti pagayatan ti Dios ti maaramid, saan a ti pagayatanna. Ket intuloyna nga inaramid ti kayat ti Dios imbes a ti impagarupna a nasayaat.

Ania ti maadaltayo iti daytoy?— Maadaltayo a kanayon nga umiso ti agtulnog iti Dios, uray kasla narigat ti ipapaaramidna. Ngem adda pay sabali a maadaltayo. Ammom kadi no ania dayta?— Maadaltayo a ti Dios ken ni Jesus ket saan a maymaysa a persona, a kas iti ibagbaga ti dadduma a tattao. Laklakay ni Jehova a Dios ken ad-adu ti ammona ngem iti Anakna a ni Jesus.

Maipakitatayo nga ay-ayatentayo ti Dios no agtulnogtayo kenkuana. Kuna ti Biblia: “Daytoy ti kaipapanan ti ayat iti Dios, a tungpalentayo dagiti bilinna.” (1 Juan 5:3) No kasta, masapul nga agtulnogtayo amin iti Dios. Kayatmo ti agtulnog kenkuana, di ngamin?—

Lukibenta ti Biblia ket kitaenta no ania ti ibilbilin ti Dios kadagiti ubbing. Basaenta ti kuna ti Biblia iti Efeso kapitulo 6, bersikulo 1, 2, ken 3. Kunana: “Annak, agtulnogkayo kadagiti nagannak kadakayo a maikaykaysa iti Apo, ta daytoy nalinteg: ‘Dayawem ni amam ken ni inam’; nga isu ti umuna a bilin nga addaan iti kari: ‘Tapno naimbag ti lak-ammo ken makapagtalinaedka iti daga iti atiddog a tiempo.’”

No kasta, ni Jehova a Dios ti mismo a mangibagbaga kenka nga agtulnogka kada tatang ken nanangmo. Ania ti kayatna a sawen ti ‘panangdayaw’ kadakuada? Kayatna a sawen a raemem ida. Ket inkari ti Dios a no agtulnogka kada tatang ken nanangmo, ‘naimbagto ti lak-ammo.’

Adda estoriaek kenka maipapan iti sumagmamano a tattao a naisalakan gapu ta nagtulnogda. Agnanaed idi dagitoy a tattao iti dakkel a siudad ti Jerusalem. Kaaduan kadagiti tattao iti dayta a siudad saanda a dimngeg iti Dios, isu a pinakdaaran ida ni Jesus nga ipalubos ti Dios a madadael ti siudadda. Imbaga met ni Jesus kadakuada no kasanoda a makalasat. Kinunana: ‘Inton makitayo ti Jerusalem a nalikmut kadagiti soldado, ammoyo nga asidegen ti pannakadadaelna. Iti kasta pumanawkayon iti Jerusalem ket agkamangkayo kadagiti bambantay.’​—Lucas 21:20-22.

Kas imbaga ni Jesus, simmangpet dagiti soldado a mangraut iti Jerusalem. Dagiti soldado ti Roma nagkampoda iti aglawlaw ti Jerusalem. Pagammuan ta pimmanaw lattan dagiti soldado. Kaaduan a tattao impagarupda nga awanen ti peggad. Isu a nagtalinaedda iti siudad. Ngem ania aya ti kinuna ni Jesus a masapul nga aramidenda?— Ania koma ti inaramidmo no agnanaedka idi idiay Jerusalem?— Dagidiay agpaypayso a namati ken Jesus pinanawanda dagiti pagtaenganda ket nagkamangda kadagiti bambantay nga adayo idiay Jerusalem.

Iti intero a makatawen, awan napasamak iti Jerusalem. Iti maikadua a tawen, awan napasamak. Ket iti maikatlo a tawen, awan napasamak. Mabalin nga impagarup dagiti dadduma a maag dagidiay nangpanaw iti siudad. Ngem pagammuan ta iti maikapat a tawen, nagsubli dagiti soldado ti Roma. Nagkampoda manen iti aglawlaw ti Jerusalem. Saanen a mabalin ti aglibas. Daytoyen ti tiempo a panangdadael dagiti soldado iti siudad. Natay ti kaaduan a tattao nga adda iti uneg ti siudad, ken naibalud dagiti dadduma.

Ngem ania ti napasamak kadagidiay nagtulnog ken Jesus?— Natalgedda. Adayoda idiay Jerusalem. Isu a saanda a naan-ano. Nasalaknibanda gapu ta nagtulnogda.

Masalaknibanka met kadi no natulnogka?— Mabalin nga iparit da tatang ken nanangmo nga agay-ayamka idiay kalsada. Apay nga iparitda?— Ngamin, baka madungparka. Ngem baka mapanunotmo ti kastoy: ‘Awan met lugan. Saanak a maan-ano. Agay-ayam met dagiti dadduma nga ubbing iti kalsada, ket dida met naan-ano.’

Kasta ti impagarup idi dagiti kaaduan a tattao idiay Jerusalem. Idi nakapanawen dagiti soldado ti Roma, kasla natalgeden. Adu ti saan a pimmanaw iti siudad. Isu a saanda met a pimmanaw. Napakdaaranda, ngem dida nangipangag. Dayta ti gapuna a natayda.

Daytoy pay ti maysa a pagarigan. Napadasam kadin ti nagay-ayam iti posporo?— Kasla makaparagsak a buyaen ti apuy no pasgedam ti posporo. Ngem nakabutbuteng no agay-ayamka iti posporo. Mabalin a mauram ti balay, ken matayka!

Laglagipem, saan nga umdas ti sagpaminsan laeng a panagtulnog. Ngem no agtulnogka a kanayon, pudno a masalaknibanka. Ket siasino ti nangted kenka iti bilin nga “Annak, agtulnogkayo kadagiti nagannak kadakayo”?— Ti Dios. Ket laglagipem, imbilinna dayta gapu ta ay-ayatennaka.