Naammuam ti kinapudno idi nakipagadalka iti Biblia kadagiti Saksi ni Jehova. Gapu kadagiti nasursurom, naaddaanka iti nasayaat a relasion iti Dios, namnama a biag iti masanguanan, ken kadagiti bendision iti paraiso a daga inton agturay ti Pagarian ti Dios. Napabileg ti pammatim iti Sao ti Dios, ket babaen ti pannakitimpuyogmo iti kongregasion Kristiano, adun a bendision ti naawatmo. Naapresiarmo no kasano a makilanglangen ni Jehova kadagiti adipenna ita.​—Zac. 8:23.

Bayat nga agsagsaganaka para iti bautismo, makatulong kenka ti panangirepaso dagiti panglakayen iti kongregasion kadagiti kangrunaan a sursuro iti Biblia. (Heb. 6:1-3) Sapay koma ta itultuloy a bendisionan ni Jehova dagiti panagreggetmo a mangam-ammo kenkuana, ken ipaayna kenka ti naikari a gunggona.​—Juan 17:3.

1. Apay a kayatmo ti agpabautisar?

2. Siasino ni Jehova?

• “Ni Jehova ti pudno a Dios iti langit ken iti daga. Awanen sabali.”​—Deut. 4:39.

• “Sika, nga agnagan Jehova, sika laeng ti Kangatuan iti intero a daga.”​—Sal. 83:18.

3. Apay a napateg nga usarem ti nagan ti Dios?

• “Kastoy ngarud ti panagkararagyo: ‘Amami nga adda iti langit, masantipikar koma ti naganmo.’”​—Mat. 6:9.

• “Maisalakanto ti amin nga umawag iti nagan ni Jehova.”​—Roma 10:13.

4. Ania ti dadduma a sasao a nausar iti Biblia a mangiladawan ken Jehova?

• “Ni Jehova, a Namarsua kadagiti ungto ti daga, ket agnanayon a Dios.”​—Isa. 40:28.

• “Amami nga adda iti langit.”​—Mat. 6:9.

• “Ti Dios ket ayat.”​—1 Juan 4:8.

5. Ania ti maitedmo ken Jehova a Dios?

• “Masapul nga ayatem ni Jehova a Diosmo iti amin a pusom ken amin a kararuam ken amin a panunotmo ken amin a pigsam.”​—Mar. 12:30.

• “Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.”​—Luc. 4:8.

6. Apay a kayatmo ti agmatalek ken Jehova?

• “Agmasiribka, anakko, ket paragsakem ti pusok, tapno masungbatak daydiay mangin-insulto kaniak.”​—Prov. 27:11.

7. Asino ti pagkararagam, ken asino ti pangipadalanam iti kararagmo?

• “Pudno unay kunak [ni Jesus] kadakayo, patganto ti Ama ti aniaman a kiddawenyo iti naganko.”​—Juan 16:23.

8. Ania ti dadduma a banag a mabalinmo nga ikararag?

• “Kastoy ngarud ti panagkararagyo: ‘Amami nga adda iti langit, masantipikar koma ti naganmo. Umay koma ti Pagariam. Maaramid koma ti pagayatam ditoy daga, a kas sadi langit. Itedmo koma ti taraonmi ita nga aldaw; ken pakawanem koma dagiti utangmi, kas iti panangpakawanmi kadagiti nakautang kadakami. Dinakami iyeg iti sulisog, ken isalakannakami iti daydiay managdakdakes.’”​—Mat. 6:9-13.

• “Agtalektayo kenkuana, nga uray ania ti dawatentayo maitunos iti pagayatanna, denggennatayo.”​—1 Juan 5:14.

9. Apay a mabalin a saan a denggen ni Jehova ti kararag ti maysa a tao?

• “Agpatulongdanto ken Jehova, ngem saannanto ida a sungbatan . . . gapu kadagiti dakes nga aramidda.”​—Mik. 3:4.

• “Nakaturong dagiti mata ni Jehova kadagiti nalinteg, ken denggen dagiti lapayagna ti panagpakaasida, ngem busoren ti rupa ni Jehova dagidiay agar-aramid iti dakes.”​—1 Ped. 3:12.

10. Asino ni Jesu-Kristo?

• “Insungbat ni Simon Pedro: ‘Sika ti Kristo, ti Anak ti sibibiag a Dios.’”​—Mat. 16:16.

11. Apay nga immay ni Jesus ditoy daga?

• “Immay ti Anak ti tao, saan a tapno pagserbian, no di ket tapno agserbi ken itedna ti biagna kas pangsubbot iti adu.”​—Mat. 20:28.

• “Masapul nga ipakaammok [ni Jesus] met ti naimbag a damag ti Pagarian ti Dios iti dadduma pay a siudad, ta daytoy ti nakaibaonak.”​—Luc. 4:43.

12. Kasano a maipakitam ti panagyamanmo iti sakripisio ni Jesus?

• “Natay ti Kristo para iti amin tapno dagidiay agbiag saanda koman nga agbiag para iti bagida, no di ket para kenkuana a natay maigapu kadakuada ken napagungar.”​—2 Cor. 5:15.

13. Ania nga autoridad ti adda ken Jesus?

• “Naiteden kaniak ti amin nga autoridad idiay langit ken ditoy daga.”​—Mat. 28:18.

• “Intan-ok ti Dios iti nangatngato a posision ken sipaparabur nga inikkanna iti nagan a nangatngato ngem iti aniaman a sabali a nagan.”​—Fil. 2:9.

14. Patiem kadi a ti Bagi a Manarawidwid dagiti Saksi ni Jehova ket isu ti “matalek ken masirib nga adipen” a dinutokan ni Jesus?

• “Asino a talaga ti matalek ken masirib nga adipen a dinutokan ti apona a mangaywan kadagiti adipen iti balayna, tapno ipaayna ti taraonda iti umiso a tiempo?”​—Mat. 24:45.

15. Persona kadi ti nasantuan nga espiritu?

• “Insungbat ti anghel: ‘Addanto kenka ti nasantuan nga espiritu, ket salaknibannakanto ti pannakabalin ti Kangatuan. Gapu iti dayta, ti mayanak nga ubing ket maawaganto iti nasantuan, Anak ti Dios.’”​—Luc. 1:35.

• “No dakayo, nupay dakeskayo, ammoyo ti mangted iti nagsasayaat a sagut kadagiti annakyo, anian nga ad-adda pay ti Ama idiay langit a mangted iti nasantuan nga espiritu kadagidiay agdawdawat kenkuana!”​—Luc. 11:13.

16. Kasano nga inusar ni Jehova ti nasantuan nga espirituna?

• “Babaen ti sao ni Jehova, ti langit ket naparsua, ken babaen ti espiritu ti ngiwatna, naaramid ti amin a linaonna.”​—Sal. 33:6.

• “Umawatkayto iti pannakabalin inton umay kadakayo ti nasantuan nga espiritu, ket dakayonto dagiti saksik . . . agingga iti kaadaywan a paset ti daga.”​—Ara. 1:8.

• “Awan ti padto iti Kasuratan nga agtaud iti bukod nga opinion ti asinoman. Ta saan a naited ti padto babaen ti pagayatan ti tao, no di ket naggapu iti Dios ti imbaga dagiti tattao bayat a tigtignayen ida ti nasantuan nga espiritu.”​—2 Ped. 1:20, 21.

17. Ania ti Pagarian ti Dios?

• “Mangipasdekto ti Dios ti langit iti maysa a pagarian a saanto pulos a madadael. Daytoy a pagarian ket saanto a mayawat iti aniaman a sabali nga ili. Rumeken ken pagpatinggaennanto amin dagitoy a pagarian, ket daytanto laeng ti agtalinaed iti agnanayon.”​—Dan. 2:44.

18. Kasanoka a magunggonaan iti Pagarian ti Dios?

• “Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”​—Apoc. 21:4.

19. Kasanom nga ammo a dandanin dumteng dagiti bendision nga iyeg ti Pagarian?

• “Immasideg dagiti adalan ket kinunada: ‘Ibagam kadakami, kaanonto a mapasamak dagita, ken anianto ti pagilasinan ti kaaddam ken ti panungpalan daytoy a sistema ti bambanag?’ Insungbat ni Jesus: ‘. . . Bumusorto ti nasion iti sabali a nasion ken ti pagarian iti sabali a pagarian, ket addanto met bisin ken ginggined iti nadumaduma a lugar. Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.’”​—Mat. 24:3, 4, 7, 14.

• “Iti maudi nga al-aldaw, dumtengto dagiti delikado ken narigat a tiempo. Ta ay-ayatento laeng dagiti tattao ti bagbagida, managayat iti kuarta, napangas, natangsit, agsasao maibusor iti Dios ken iti tao, nasukir kadagiti nagannak, saan a managyaman, saan a matalek, awanan iti ayat iti padada a tao, saanda a kayat ti makitulag, manangpadakes, awanan panagteppel, nauyong, kagurada ti kinaimbag, traidor, natangken ti uloda, napannakkel, ayatenda ti ragragsak imbes a ti Dios, a kasla relihiosoda ngem saanda nga agbibiag a kasta.”​—2 Tim. 3:1-5.

20. Kasanom a maipakita a napateg kenka ti Pagarian?

• “Itultuloyyo ngarud a sapulen nga umuna ti Pagarian ken ti kinalinteg ti Dios.”​—Mat. 6:33.

• “Kinuna ni Jesus kadagiti adalanna: ‘Asinoman a mayat a sumurot kaniak, tallikudanna koma ti bagina ket bagkatenna ti kayona a pagtutuokan ken agtultuloy a surotennak.’”​—Mat. 16:24.

21. Asino ni Satanas ken dagiti demonio?

• “Naggapukayo iti Diablo nga amayo . . . Nagbalin a mammapatay idi nangrugi.”​—Juan 8:44.

• “Naitapuak ti dakkel a dragon, ti nagkauna nga uleg, daydiay naawagan iti Diablo ken Satanas, a mangal-allilaw iti intero a mapagnaedan a daga. Naitapuak iti daga agraman dagiti anghelna.”​—Apoc. 12:9.

22. Ania ti akusasion ni Satanas ken ni Jehova ken kadagiti agdaydayaw Kenkuana?

• “Insungbat ti babai: ‘Mabalinmi a kanen ti bunga dagiti kayo iti hardin, malaksid iti bunga ti kayo nga adda iti tengnga ti hardin, ta kinuna ti Dios: “Dikay mangan iti bungana ken diyo sagiden; ta mataykayo no aramidenyo dayta.”’ Gapuna, kinuna ti uleg: ‘Sigurado a saankayto a matay. Ta ammo ti Dios nga iti aldaw a pannanganyo iti dayta, maluktan dagiti matayo ket agbalinkayto a kas iti Dios a makaammo iti naimbag ken dakes.’”​—Gen. 3:2-5.

• “Insungbat ni Satanas ken Jehova: ‘Kudil iti kudil. Ited ti tao ti amin nga adda kenkuana para iti biagna.’”​—Job 2:4.

23. Kasanom a mapaneknekan nga ulbod dagiti akusasion ni Satanas?

• “Agserbika [iti Dios] iti naan-anay a puso.”​—1 Cron. 28:9.

• “Agingga a matayak, agtalinaedak nga awan pagkuranganna!”​—Job 27:5.

24. Apay a matay dagiti tattao?

• “Babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.”​—Roma 5:12.

25. Ania ti kasasaad dagiti natay?

• “Ammo dagiti sibibiag a mataydanto, ngem awan a pulos ti ammo dagiti natay.”​—Ecl. 9:5.

26. Ania ti namnama dagiti natay?

• “Agungarto agpadpada dagiti nalinteg ken dagiti nakillo.”​—Ara. 24:15.

27. Mano ti mapan idiay langit a makipagturay ken Jesus?

• “Nakitak ket adtoy! ti Kordero a nakatakder iti Bantay Sion, ket kaduana ti 144,000 a nasuratan ti mugingda iti naganna ken iti nagan ni Amana.”​—Apoc. 14:1.

Iti panagadalmo iti Biblia, naammuam ti kalikaguman kenka ni Jehova ken no kasano a mayaplikarmo dagiti nalinteg a pagalagadanna. Gapu ta inyaplikarmo dagiti naadalmo, mabalin nga adu ti nagbalbaliwan ti biag ken kababalinmo. Ita ta agbibiagkan a maitunos kadagiti nalinteg a pagalagadan ni Jehova, maikarikan nga agserbi kas ministro ti naimbag a damag.

Makatulong kenka ti panangrepaso kadagiti sumaganad a saludsod tapno maawatam a naimbag dagiti nalinteg a kalikaguman ni Jehova ken ipalagipna kenka dagiti bambanag nga aramidem tapno agbalinka a maysa kadagiti naanamongan nga adipenna. Ipaganetget kenka dagiti sumaganad nga impormasion a napateg nga aramidem ti amin a banag buyogen ti nadalus a konsiensia ken para iti pakaidayawan ni Jehova.​—2 Cor. 1:12; 1 Tim. 1:19; 1 Ped. 3:16, 21.

Gapu ta naadalmon dayta, sigurado a magagaranka nga agpasakup iti panangituray ni Jehova ken agbalin a paset ti organisasionna. Makatulong kenka dagiti sumaganad a saludsod ken teksto tapno maawatam ti kaipapanan ti panagpasakup kadagiti urnos ni Jehova iti kongregasion, iti pamilia, wenno kadagiti gobierno iti daytoy a sistema ti bambanag. Sigurado nga umuneg ti panangapresiarmo iti urnos ni Jehova maipapan iti panangisuro ken panangpabilegna kadagiti adipenna iti naespirituan. Karaman ditoy ti itatabunom ken pannakipartisiparmo kadagiti gimong agingga nga ipalubos ti kasasaadmo.

Maysa pay, ipaganetget daytoy a seksion ti kinapateg ti regular a pannakiraman iti trabaho a panangikasaba iti Pagarian, panangtulong kadagiti dadduma a mangammo ken Jehova ken iti ar-aramidenna para iti sangatauan. (Mat. 24:14; 28:19, 20) Kamaudiananna, ipaganetget kenka daytoy a serioso ti dedikasionmo ken Jehova a Dios ken ti panagpabautisarmo. Masiguradom nga apresiaren ni Jehova ti panangipategmo iti nagpaiduma a kinaimbagna kenka.

1. Ania ti pagalagadan dagiti Kristiano iti panagasawa? Ania ti kakaisuna a Nainkasuratan a pakaibatayan ti diborsio?

• “Saanyo kadi a nabasa a ti nangparsua kadakuada idi rugrugina inaramidna ida a lalaki ken babai ken imbagana: ‘Daytoy ti makagapu a panawanto ti lalaki ti ama ken inana sa makitiponto iti asawana, ket ti dua agbalinto a maymaysa a lasag’? Iti kasta, saandan a dua, no di ket maymaysadan a lasag. Isu a ti pinagtipon ti Dios, saan koma a pagsinaen ti tao. . . . Asinoman a mangidiborsio ken baketna, a saan a nakaaramid iti seksual nga immoralidad, sa mangasawa iti sabali, makabasol iti pannakikamalala.”​—Mat. 19:4-6, 9.

2. Apay a masapul nga agkasar dagidiay agkabkabbalay? No adda asawamon, siguradoka kadi a legal ti panagkasaryo ken bigbigen dayta ti gobierno?

• “Itultuloymo a palagipan ida nga agpasakup ken agtulnogda kadagiti gobierno ken autoridad.”​—Tito 3:1.

• “Ibilang koma ti amin a tattao a nadayaw ti panagasawa, ken saan koma a matulawan ti pagiddaan ti agassawa, ta ukomento ti Dios dagiti agar-aramid iti seksual nga immoralidad ken makikamkamalala.”​—Heb. 13:4.

3. Ania ti akemmo iti uneg ti pamilia?

• “Anakko, ipangagmo ti disiplina ni tatangmo, ken dimo sukiren ti instruksion ni nanangmo.”​—Prov. 1:8.

• “Ti asawa a lalaki ti ulo ti asawana a babai no kasano a ti Kristo ti ulo ti kongregasion . . . Asawa a lalaki, itultuloymo nga ayaten ni baketmo, no kasano nga inayat met ti Kristo ti kongregasion.”​—Efe. 5:23, 25.

• “Dakayo nga amma, diyo ruroden dagiti annakyo, no di ket itultuloyyo ida a padakkelen iti disiplina ken pammagbaga ni Jehova.”​—Efe. 6:4.

• “Annak, agtulnogkayo kadagiti nagannakyo iti amin a banag, ta makaparagsak unay daytoy iti Apo.”​—Col. 3:20.

• “Assawa a babbai, agpasakupkayo kadagiti assawayo.”​—1 Ped. 3:1.

4. Apay a rumbeng a raementayo ti sagut a biag?

• “[Ti Dios] ti mangipapaay iti biag ken anges ken amin a banag. . . . Gapu kenkuana, adda biagtayo, makagunay ken addatayo.”​—Ara. 17:25, 28.

5. Apay a saantayo a rumbeng a patayen ti asinoman, uray ti ubing a di pay nayanak?

• “No agkinkinnabil ti dua a tao ket nadangranda ti maysa a masikog ket . . . no matay ti maysa kadagiti agina, rumbeng ngarud a bayadanyo ti biag iti biag.”​—Ex. 21:22, 23.

• “Nakitanak uray idi maysaak pay laeng a sikog; amin a pasetna ket naisurat iti librom maipapan kadagidi aldaw a nabukelda, sakbay a naadda dagiti paset ti bagik.”​—Sal. 139:16.

• “Kagura ni Jehova . . . [dagiti] ima nga agibukbok iti dara ti inosente a tao.”​—Prov. 6:16, 17.

6. Ania ti bilin ti Dios maipapan iti dara?

• “Itultuloyyo a liklikan [ti] . . . dara [ken] nabekkel nga animal.”​—Ara. 15:29.

7. Apay a masapul nga ayatentayo dagiti Kristiano a kakabsattayo?

• “Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo, kasta met ti panagiinnayatyo. Maammuanto ti amin a dakayo dagiti adalak​—no agiinnayatkayo.”​—Juan 13:34, 35.

8. Tapno saan a maakaran ti dadduma iti makaakar wenno makapapatay a sakit: (a) Apay a ti tao nga adda sakitna saan koma nga umarakup ken umagek iti dadduma kas ebkas ti pammateg? (b) Apay a saan koma nga agsakit ti nakemna no saan nga awisen ti dadduma iti balayda? (c) Apay a rumbeng nga agboluntario nga agpa-blood test ti maysa a tao a mabalin nga addaan iti makaakar a sakit sakbay a makiinnarem? (d) Apay a ti tao nga addaan iti makaakar a sakit rumbeng a pakaammuanna ti koordineytor ti bagi dagiti panglakayen sakbay nga agpabautisar?

• “Dikay koma makautang iti aniaman a banag iti asinoman, malaksid iti panagiinnayatyo. . . . ‘Masapul nga ayatem ti kaarrubam a kas iti bagim.’ Ti tao nga addaan iti ayat ket saan nga agaramid iti dakes iti kaarrubana.”​—Roma 13:8-10.

• “Sapulenyo dagiti pagimbagan ti dadduma, saan la a dagiti bukodyo a pagimbagan.”​—Fil. 2:4.

9. Apay a namnamaen ni Jehova a pakawanentayo ti sabsabali?

• “Itultuloyyo ti agiinnanus ken situtulok nga agpipinnakawan uray no adda pangibatayan ti maysa nga agreklamo maibusor iti sabali. Kas iti situtulok a panangpakawan kadakayo ni Jehova, kasta met ti aramidenyo.”​—Col. 3:13.

10. Ania ti rumbeng nga aramidem no padaksen wenno saurennaka ti maysa a kabsat?

• “No makabasol kenka ti kabsatmo, kasaritam a dakdakayo ket ibagam ti basolna. No dumngeg kenka, natulongam ti kabsatmo nga agbabawi. Ngem no saan a dumngeg, mangikuyogka iti maysa wenno dua, tapno mapatalgedan ti tunggal banag iti testimonia ti dua wenno tallo a testigo. No di dumngeg kadakuada, ibagam iti kongregasion. No saanna latta a denggen ti kongregasion, ibilangmo a kas iti tao kadagiti nasion ken kas agsingsingir iti buis.”​—Mat. 18:15-17.

11. Ania ti panangmatmat ni Jehova kadagitoy a basol?

▪ Seksual nga immoralidad

▪ Panagusar iti imahen para iti panagdaydayaw

▪ Homoseksualidad

▪ Panagtakaw

▪ Panagsugal

▪ Panagbartek

• “Dikay agpaallilaw. Dagiti agar-aramid iti seksual nga immoralidad, agdaydayaw iti idolo, mannakikamalala, lallaki a mangpagusto iti homoseksual nga ar-aramid, dagiti lallaki nga agar-aramid iti homoseksualidad, mannanakaw, naagum, mammartek, manangpadakes, ken manangkikil saandanto a tawiden ti Pagarian ti Dios.”​—1 Cor. 6:9, 10.

12. Ania ti ikagumaam nga aramiden no mainaig iti seksual nga immoralidad, a pakairamanan ti agduduma a seksual nga aramid ti saan nga agassawa?

• “Adaywanyo ti seksual nga immoralidad!”​—1 Cor. 6:18.

13. No saan a mausar kas agas, apay a rumbeng a liklikantayo dagiti substansia a makaadikto wenno makaapektar iti isip?

• “Itedyo ti bagiyo a kas sibibiag a daton, nasantuan ken pakaragsakan ti Dios, maysa a sagrado a panagserbi babaen ti panangusaryo iti abilidadyo nga agpanunot. Ken isardengyon ti agpaimpluensia iti daytoy a sistema ti bambanag, no di ket pabaruenyo ti kinataoyo babaen ti panangbalbaliwyo iti panunotyo, tapno mapaneknekanyo iti bagiyo ti nasayaat, makaay-ayo, ken perpekto a pagayatan ti Dios.”​—Roma 12:1, 2.

14. Ania ti sumagmamano a pagarigan ti espiritistiko nga aramid nga iparit ti Dios?

• “Awan koma kadakayo ti . . . mammuyon, salamangkero, agbirbirok iti partaan, mangkukulam, agor-orasion, makiuman iti espiritista wenno mammadles, wenno makisarita iti natay.”​—Deut. 18:10, 11.

15. No makaaramid ti maysa iti nadagsen a basol ket kayatna a maisubli ti relasionna ken Jehova, ania koma ti madagdagus nga aramidenna?

• “Impudnok met laeng kenka ti basolko; diak inabbongan ti biddutko. Kinunak: ‘Ipudnokto dagiti salungasingko ken Jehova.’”​—Sal. 32:5.

• “Adda kadi masakit kadakayo? Ayabanna koma dagiti panglakayen iti kongregasion, ket ikararaganda, a sapsapuanda iti lana iti nagan ni Jehova. Ket ti kararag a nabuyogan iti pammati paimbagennanto ti masakit, ket ibangonto ni Jehova. Kasta met, no nakabasol, mapakawanto.”​—Sant. 5:14, 15.

16. No naammuam a nakaaramid iti nadagsen a basol ti padam a Kristiano, ania ti rumbeng nga aramidem?

• “No adda nakasaksi wenno nakakita wenno nakaammo iti maysa a basol ngem saanna nga impulong uray no nangngegna ti panawagan a panagtestigo, maibilang a nakabasol. Madusanto gapu iti biddutna.”​—Lev. 5:1.

17. No mayanunsio a saanen a Saksi ni Jehova ti maysa, kasano koma ti panangtratotayo kenkuana?

• “Isardengyo ti makikadkadua iti asinoman a maaw-awagan kabsat nga agar-aramid iti seksual nga immoralidad wenno naagum wenno agdaydayaw iti idolo wenno manangpadakes wenno mammartek wenno manangkikil, uray makipangan man la koma iti kasta a tao.”​—1 Cor. 5:11.

• “No adda asinoman nga umay kadakayo ket dina iyeg daytoy a sursuro, diyo pulos awaten kadagiti pagtaenganyo wenno kablaawan.”​—2 Juan 10.

18. Apay a dagiti koma mangay-ayat ken Jehova ti nasinged a gagayyemmo?

• “Ti makikadkadua iti masirib agbalinto a masirib, ngem ti makilanglangen iti maag, dakesto ti pagtungpalanna.”​—Prov. 13:20.

• “Dikay agpaallilaw. Dagiti dakes a kakadua dadaelenda dagiti nasayaat nga ugali.”​—1 Cor. 15:33.

19. Apay a neutral iti politika dagiti Saksi ni Jehova?

• “Saanda a paset ti lubong, a kas kaniak [ni Jesus] a saan a paset ti lubong.”​—Juan 17:16.

20. Apay a rumbeng nga agtulnogka iti gobierno?

• “Tunggal tao ket agpaituray koma kadagiti nangatngato nga autoridad, ta awan ti autoridad a saan a naggapu iti Dios; insaad ti Dios dagiti adda nga autoridad iti relatibo a saadda.”​—Roma 13:1.

21. No agkontra ti linteg ti tao ken linteg ti Dios, ania ti aramidem?

• “Masapul nga agtulnogkami iti Dios kas agturay imbes a kadagiti tattao.”​—Ara. 5:29.

22. No agpilpilika iti trabaho, ania dagiti teksto a makatulong tapno agtalinaedka a naisina iti lubong?

• “Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.”​—Mik. 4:3.

• “Rummuarkayo kenkuana [ti Babilonia a Dakkel], tattaok, no diyo kayat ti mairaman kadagiti basolna, ken no diyo kayat a lak-amen dagiti didigrana.”​—Apoc. 18:4.

23. Ania dagiti piliem a paglinglingayan, ken ania dagiti liklikam?

• “Ni Jehova . . . kagurana ti asinoman a mangay-ayat iti kinaranggas.”​—Sal. 11:5.

• “Guraenyo ti dakes; ayatenyo ti naimbag.”​—Roma 12:9.

• “Aniaman a bambanag a pudno, aniaman a bambanag a napateg, aniaman a bambanag a nalinteg, aniaman a bambanag a nadalus, aniaman a bambanag a maay-ayat, aniaman a bambanag a nasayaat ti pakasarsaritaanda, aniaman a bambanag a naimbag, ken aniaman a bambanag a maidaydayaw, itultuloyyo nga utoben dagitoy a banag.”​—Fil. 4:8.

24. Apay a saan a makipagdaydayaw dagiti Saksi ni Jehova iti sabali a relihion?

• “Diyo mabalin ti mangan iti ‘lamisaan ni Jehova’ ken iti lamisaan dagiti demonio.”​—1 Cor. 10:21.

• “‘Suminakayo ken isardengyo a sagiden ti narugit a banag,’ kuna ni Jehova; ‘ket awatenkayto.’”​—2 Cor. 6:17.

25. Ania dagiti prinsipio a makatulong kenka nga agdesision no makiramanka wenno saan iti maysa a selebrasion?

• “Nakilangenda ketdi kadagiti nasion ken tinuladda dagiti aramidda. Intultuloyda ti nagdaydayaw kadagiti didiosen, ket nagbalin dagita a silo kadakuada.”​—Sal. 106:35, 36.

• “Awan a pulos ti ammo dagiti natay.”​—Ecl. 9:5.

• “Saanda a paset ti lubong, a kas kaniak a saan a paset ti lubong.”​—Juan 17:16.

• “Ti tiempo a naglabas ket umanayen a panagaramidyo iti pagayatan dagiti tattao iti lubong, kas kadagiti nakaal-alas a kababalin, di makontrol nga immoral a tarigagay, panagbarbartek, nalabes a panagragragsak, nalabes a panaginum iti arak, ken makarimon nga idolatria.”​—1 Ped. 4:3.

26. Kasano a makatulong dagiti pagarigan iti Biblia iti panagdesisionmo no agselebrarka iti kasangay (birthday) wenno saan?

• “Ti maikatlo nga aldaw ket . . . kasangay ni Faraon. Nangaramid iti padaya para iti amin nga adipenna, ket winayawayaanna ti panguluen dagiti paraiggem iti kopa ken ti panguluen dagiti panadero iti sanguanan dagiti adipenna. Insublina ti panguluen dagiti paraiggem iti kopa iti dati nga akemna, ngem pinabitayna ti panguluen dagiti panadero.”​—Gen. 40:20-22.

• “Bayat ti panagkasangay ni Herodes, nagsala ti balasang ni Herodias ket naay-ayo unay ni Herodes isu nga inkarina nga itedna ti aniaman a kiddawen ti balasang. Imbilin ni Herodias iti balasangna a kastoy ti ibagana: ‘Itedmo kaniak ti ulo ni Juan a Mammautisar a naikabil iti bandehado.’ Gapuna, pinapugotanna ni Juan iti pagbaludan.”​—Mat. 14:6-8, 10.

27. Apay nga agtulnogka koma iti panangiwanwan dagiti panglakayen?

• “Agtulnog ken agpasakupkayo kadagiti mangidadaulo kadakayo, ta kanayon nga ay-aywanandakayo ket manungsungbatdanto gapu iti dayta. No kasta ti aramidenyo, naragsakda ken dida agladingit a mangaramid iti trabahoda, tapno saan nga agresulta dayta iti pagdaksanyo.”​—Heb. 13:17.

28. Apay a napateg a regular a mangiwayaka ken ti pamiliam iti tiempo nga agbasa ken agadal iti Biblia?

• “Pagragsakanna ti linteg ni Jehova, ken basbasaenna dayta iti nakapsut a timek iti aldaw ken rabii. Kayariganna ti kayo a naimula iti igid ti agay-ayus a danum, maysa a kayo nga agbunga iti tiempona, saan a malaylay dagiti bulongna. Ket agballigi ti amin nga aramidenna.”​—Sal. 1:2, 3.

29. Apay a magustuam ti agatender ken makipartisipar kadagiti gimong?

• “Ipakaammokto ti naganmo kadagiti kakabsatko; iti tengnga ti kongregasion idaydayawkanto.”​—Sal. 22:22.

• “Agpipinnanunottayo tapno matignaytayo a mangipakita iti ayat ken nasayaat nga ar-aramid, a ditay baybay-an ti panaggigimongtayo, kas iti nakayugalian ti dadduma, no di ket agpipinnaregtatayo, ken ad-adda pay nga aramidentayo amin dagita bayat a makitkitayo nga umas-asidegen ti aldaw.”​—Heb. 10:24, 25.

30. Ania ti kapatgan a trabaho nga inted kadatayo ni Jesus?

• “Inkayo ngarud kadagiti tattao iti amin a nasion ket pagbalinenyo ida nga adalak, ken bautisaranyo ida . . . , ken isuroyo a tungpalenda ti amin nga imbilinko kadakayo.”​—Mat. 28:19, 20.

31. No agdonartayo para iti trabaho a mainaig iti Pagarian wenno tumulongtayo kadagiti kakabsattayo, ania a kababalin ti mangparagsak ken Jehova?

• “Idaydayawmo ni Jehova kadagiti napateg a banagmo.”​—Prov. 3:9.

• “Aramiden koma ti tunggal maysa ti inkeddeng ti pusona, a saan a nasakit ti nakemna wenno mapilpilit, ta ay-ayaten ti Dios ti naragsak a mangted.”​—2 Cor. 9:7.

32. Ania dagiti pakarigatan a manamnama a mapasaran dagiti Kristiano?

• “Naragsak dagiti maidaddadanes gapu iti kinalinteg, ta kukuada ti Pagarian ti langit. Naragsakkayo no uyawen ken idadanesdakayo dagiti tattao ken no padpadaksendakayo gapu kaniak. Agrag-o ken agragsakkayo unay, ta dakkel ti gunggonayo idiay langit, ken gapu met iti dayta a naidadanes dagiti propeta idi un-unana.”​—Mat. 5:10-12.

33. Apay nga espesial a pribilehio ti mabautisaran kas maysa kadagiti Saksi ni Jehova?

• “Nasarakak ti sasaom, ket kinnanko dagita; ti saom ket pakaragsakak ken pagrag-oan ti pusok, ta naipanagan kaniak ti naganmo, O Jehova a Dios.”​—Jer. 15:16.

Kaaduanna a maaramid dagiti bautismo kadagiti asamblea ken kombension dagiti Saksi ni Jehova. Iti ngudo ti palawag iti bautismo, kiddawen ti ispiker a tumakder dagiti agpabautisar ket sungbatanda iti napigsa ti dua a saludsod iti napigsa a timek:

1. Nagbabawyam kadin dagiti basolmo, indedikarmon ti bagim ken Jehova, ken inawatmon ti panangisalakanna babaen ken Jesu-Kristo?

2. Maawatam kadi a ti panagbautisarmo ipakitana a maysakan a Saksi ni Jehova ken pasetkan ti organisasion ni Jehova?

Ti positibo a sungbat dagiti kandidato iti bautismo kadagitoy a saludsod kaipapananna ti ‘panangipakaammoda iti publiko’ ti pammatida iti subbot ken ti naimpusuan a panangidedikarda iti bagida ken Jehova. (Roma 10:9, 10) Nasaksakbay nga ikararag ken panunoten koma a naimbag dagiti kandidato iti bautismo dagitoy a saludsod tapno masungbatanda dagita nga addaan kombiksion.

Indedikarmo kadin ti bagim ken Jehova babaen ti kararag, nga inkarim nga isu laeng ti pagserbiam ken ti panangaramid iti pagayatanna ti kapatgan iti biagmo?

Talaga kadi a kombinsidoka a masapul a mabautisarankan iti kabiitan a panawen?

Ania ti maitutop a pagbado iti bautismo? (1 Tim. 2:9, 10; Juan 15:19; Fil. 1:10)

Agbadotayo koma “buyogen ti kinaemma ken kinasimbeng ti panunot” tapno maipakitatayo nga ‘agdaydayawtayo iti Dios.’ Liklikan ngarud dagiti agpabautisar ti saan a nanakman a bado a pagbabasa wenno dagiti addaan iti surat wenno islogan. Masapul a nadalus, naurnos, ken maitutop dayta iti okasion.

Kasano koma ti panagtignay ti maysa a tao nga agpabautisar? (Luc. 3:21, 22)

Ti bautismo ni Jesus ti pagtuladan iti panagpabautisar dagiti Kristiano ita. Para kenkuana, ti bautismo ket serioso a banag, ken makita dayta iti kababalin ken tigtignayna. Gapuna, ti pagbautisaran ket saan koma a lugar a pagaangawan, pagay-ayaman, paglalangoyan, wenno dadduma pay nga aramid a mangdadael iti kinaserioso ti okasion. Saan met koma nga agtignay ti kabbaro a Kristiano iti wagas a kas man la nakagun-od iti dakkel a balligi. Nupay naragsak nga okasion ti bautismo, nadayaw koma ti pannakayebkas ti kasta a rikna.

Kasano a makatulong kenka ti regular a pannakigimong ken pannakikadua iti kongregasion tapno maitungpalmo ti dedikasionmo ken Jehova?

Uray nabautisarankan, apay a napateg nga itultuloymo ti nasayaat nga eskediul ti personal a panagadalmo ken regular a pannakiramanmo iti ministerio?