No Kasano a Maorganisar ken Maiwanwanwan ti Kongregasion

ITI umuna a surat ni apostol Pablo kadagiti taga-Corinto, imbagana ti napateg a kinapudno maipapan iti Dios. Kinunana: “Ti Dios ket Dios ti talna, saan a ti riribuk.” Kalpasanna, kinunana maipapan kadagiti gimong ti kongregasion: “Aramidenyo ti amin a banag iti desente a pamay-an ken sigun iti urnos.”​—1 Cor. 14:33, 40.

² Iti rugrugi dayta met la a surat, nangbalakad ti apostol maipapan iti mapaspasamak a di panagtutunos iti kongregasion ti Corinto. Pinaregta ni Pablo dagiti kakabsat sadiay nga ‘agtutunos koma ti sasaoda’ ken ‘naan-anay koma nga agkaykaysada iti panunot ken opinion.’ (1 Cor. 1:10, 11) Kalpasanna, binalakadanna ida maipapan iti nadumaduma a banag a mangapektar iti panagkaykaysa ti kongregasion. Inusarna ti ilustrasion maipapan iti bagi ti tao tapno ipakitana a masapul ti panagkaykaysa ken panagtutunos. Impaganetgetna iti amin nga adda iti kongregasion Kristiano nga ipakitada ti naayat a pannakaseknan iti maysa ken maysa aniaman ti akemda. (1 Cor. 12:12-26) Maipakita nga organisado ti kongregasion no agtutunos ken agtitinnulongda.

³ Ngem kasano ti rumbeng a pannakaorganisar ti kongregasion Kristiano? Siasino ti mangorganisar? Ania dagiti maaramid nga urnos? Siasino dagiti madutokan nga agakem? Maammuantayo ti sungbat dagitoy a saludsod no agpaiwanwantayo iti Biblia.​—1 Cor. 4:6.

ORGANISADO ITI TEOKRATIKO A PAMAY-AN

⁴ Nangrugi ti kongregasion Kristiano idi 33 C.E. iti aldaw ti Pentecostes. Ania ti masursurotayo maipapan iti kongregasion idi umuna a siglo? Naorganisar ken naiwanwan iti teokratiko a pamay-an, kayatna a sawen, babaen ti turay (kraʹtos) ti Dios (Griego, the·osʹ). Mabasa daytoy dua a sao iti 1 Pedro 5:10, 11. Ti naipaltiing a salaysay maipapan iti napasamak idiay Jerusalem agarup 2,000 a tawenen ti napalabas ket nalawag a mangipakita a binuangay ti Dios ti kongregasion dagiti napulotan a Kristiano. (Ara. 2:1-47) Isu daytoy ti pasdekna ken sangakabbalayanna. (1 Cor. 3:9; Efe. 2:19) Ita, sursuroten a naimbag ti kongregasion Kristiano ti pannakaorganisar ken panagandar ti organisasion a nangrugi idi umuna a siglo.

⁵ Nangrugi ti umuna a kongregasion nga addaan laeng iti agarup 120 nga adalan. Immuna a naiparukpok kadakuada ti nasantuan nga espiritu kas kaitungpalan ti Joel 2:28, 29. (Ara. 2:16-18) Ngem iti dayta met la nga aldaw, agarup 3,000 ti nabautisaran iti danum ken naitimpuyog iti kongregasion dagiti napulotan iti espiritu. Namatida iti sao maipapan ken Kristo ket “intultuloyda ti nagsursuro kadagiti apostol.” Kalpasanna, “intultuloy . . . ni Jehova nga itipon kadakuada iti inaldaw dagidiay maisalsalakan.”​—Ara. 2:41, 42, 47.

⁶ Nagpartak a rimmang-ay ti kongregasion idiay Jerusalem ta uray la inreklamo ti nangato a padi dagiti Judio a dagiti adalan pinunnoda ti Jerusalem iti sursuroda. Karaman kadagiti baro nga adalan idiay Jerusalem ti adu a papadi a Judio a nagbalin a paset ti kongregasion.​—Ara. 5:27, 28; 6:7.

⁷ Kinuna ni Jesus: “Dakayonto dagiti saksik idiay Jerusalem, iti intero a Judea ken Samaria, ken agingga iti kaadaywan a paset ti daga.” (Ara. 1:8) Kasta nga agpayso ti napasamak. Kalpasan ti ipapatay ni Esteban, timmaud ti nakaro a pannakaidadanes idiay Jerusalem. Gapuna, pimmanaw dagiti adalan sadiay ket napanda iti Judea ken Samaria. Ngem sadinoman ti napananda, impakaammoda ti naimbag a damag ken adu ti natulonganda nga agbalin nga adalan, agraman ti dadduma a Samaritano. (Ara. 8:1-13) Idi agangay, naikasaba metten ti naimbag a damag kadagiti saan a nakugit, wenno saan a Judio. (Ara. 10:1-48) Gapu iti trabaho a panangasaba, adu ti natulongan nga agbalin nga adalan ken nabuangay dagiti baro a kongregasion iti ruar ti Jerusalem.​—Ara. 11:19-21; 14:21-23.

⁸ Ania dagiti naaramid nga urnos tapno masigurado a dagiti kabbuangay a kongregasion ket organisado ken teokratiko, wenno iwanwanwan ti Dios? Babaen ti panagtignay ti espiritu ti Dios, nayurnos nga adda dagiti katulongan a papastor a mangaywan iti arban. Kadagiti kongregasion a binisita da Pablo ken Bernabe bayat ti umuna a panagdaliasatda kas misionero, nangdutokda kadagiti panglakayen. (Ara. 14:23) Imbaga ni Lucas a nagsurat iti Biblia maipapan iti pannakisarita ni Pablo kadagiti panglakayen iti kongregasion ti Efeso. Kinuna kadakuada ni Pablo: “Asikasuenyo ti bagiyo ken ti intero nga arban, ta dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna iti dara ti Anakna.” (Ara. 20:17, 28) Kualipikadoda nga agbalin a panglakayen gapu ta naragpatda dagiti kualipikasion a nairekord iti Biblia. (1 Tim. 3:1-7) Ni Tito a katrabahuan ni Pablo ket naikkan iti autoridad a mangdutok kadagiti panglakayen iti kongregasion idiay Creta.​—Tito 1:5.

⁹ Bayat nga umad-adu dagiti mabuangbuangay a kongregasion, nagtultuloy a nagserbi dagiti apostol ken panglakayen idiay Jerusalem kas kangrunaan a manangaywan iti umad-adu a kongregasion iti nagduduma a nasion idi umuna a siglo. Nagserbida kas bagi a manarawidwid.

¹⁰ Iti suratna iti kongregasion idiay Efeso, inlawlawag ni apostol Pablo a mataginayon ti panagkaykaysa ti kongregasion Kristiano no makitunosda iti espiritu ti Dios ken agtulnogda iti panangidaulo ni Jesu-Kristo. Imparegta ti apostol kadagiti Kristiano sadiay nga agbalinda a napakumbaba ken taginayonenda ti ‘panagkaykaysa a nagun-odanda babaen ti nasantuan nga espiritu’ ken ti natalna a pannakitimpuyogda iti kongregasion. (Efe. 4:1-6) Kalpasanna, inadawna ti Salmo 68:18 ken inyaplikarna dayta iti panangipaay ni Jehova kadagiti lallaki a kualipikado iti naespirituan tapno maipaay ti kasapulan ti kongregasion. Agserbida kas apostol, mammadto, ebanghelisador, papastor, ken mannursuro. Kas sagut a naggapu ken Jehova, pabilgenda ti intero a kongregasion tapno agmataenganda iti naespirituan ket agbalinda a makaay-ayo iti Dios.​—Efe. 4:7-16.

SURSUROTEN DAGITI KONGREGASION ITA TI PAMAY-AN DAGITI APOSTOL

¹¹ Sursuroten ita ti amin a kongregasion dagiti Saksi ni Jehova ti kasta met laeng a panangorganisar. Nagkaykaysada kas kongregasion iti intero a lubong nga idadauluan dagiti napulotan iti espiritu. (Zac. 8:23) Nagbalin a posible daytoy gapu ken Jesu-Kristo. Kas iti inkarina, dina binaybay-an dagiti napulotan nga adalanna iti “amin nga al-aldaw agingga iti panungpalan daytoy a sistema ti bambanag.” Dagidiay nagbalin a paset ti dumakdakkel a kongregasion ita namatida iti naimbag a damag ti Dios, naimpusuan nga indedikarda ti biagda ken ni Jehova, ken nagpabautisarda kas adalan ni Jesu-Kristo. (Mat. 28:19, 20; Mar. 1:14; Ara. 2:41) Bigbigenda ti “nasayaat a pastor” a ni Jesu-Kristo, kas Ulo ti intero nga arban a buklen dagiti napulotan a Kristiano kasta met ti ‘sabsabali a karnero.’ (Juan 10:14, 16; Efe. 1:22, 23) Nataginayon ti “maymaysa nga arban” ti panagkaykaysada babaen ti panangbigbigda iti kinaulo ni Kristo. Kasta met, agpaspasakupda iti us-usarenna ita a “matalek ken masirib nga adipen,” a dinutokan ni Kristo. Naan-anay koma nga agtalektayo iti matalek ken masirib nga adipen ita.​—Mat. 24:45.

TI PANGGEP DAGITI NARELIHIOSUAN A KORPORASION

¹² Tapno maipaay ti naespirituan a taraon iti umiso a tiempo ken maikasaba ti naimbag a damag ti Pagarian sakbay a dumteng ti panungpalan, nausar dagiti korporasion. Dagitoy a legal a korporasion ket bigbigbigen dagiti linteg iti nadumaduma a pagilian ken agtitinnulongda iti maysa ken maysa. Mausar dagitoy tapno mapapartak ti pannakaikasaba ti naimbag a damag iti intero a lubong.

TI PANNAKAORGANISAR TI SANGA NGA OPISINA

¹³ No adda mabuangay a sanga nga opisina, adda madutokan a tallo wenno ad-adu pay a panglakayen nga agserbi kas Komite ti Sangay (Branch Committee) a mangasikaso iti trabaho iti maysa wenno ad-adu pay a pagilian a masakupan dayta a sangay. Maysa a miembro ti komite ti agserbi kas koordineytor ti Komite ti Sangay (Branch Committee coordinator).

¹⁴ Dagiti kongregasion a masakupan ti tunggal sangay ket naorganisar kadagiti sirkito. Mabalin a nadumaduma ti kadakkel dagitoy depende iti lugar ken lengguahe kasta met iti bilang dagiti kongregasion iti lugar a masakupan ti sangay. Adda madutokan a manangaywan iti sirkito nga agserbi kadagiti kongregasion iti tunggal sirkito. Ti sanga nga opisina ti mangipaay iti instruksion iti manangaywan iti sirkito no kasanona nga aramiden dagiti pagrebbenganna.

¹⁵ Bigbigen dagiti kongregasion dagiti naaramid nga urnos ti organisasion a pakagunggonaan ti amin. Bigbigenda dagiti nadutokan a panglakayen a mangidaulo iti trabaho kadagiti sangay, sirkito, ken kongregasion. Agpannurayda iti matalek ken masirib nga adipen maipaay iti naespirituan a taraon iti umiso a tiempo. Ti matalek nga adipen ita agpaspasakupda met iti kinaulo ni Kristo, tungtungpalenda dagiti prinsipio ti Biblia, ken agpapaiwanwanda iti nasantuan nga espiritu. No agtrabahotayo a sangsangkamaysa, mapasarantayo met ti napasaran dagiti kongregasion idi umuna a siglo: “Nagtultuloy a timmibker ti pammati dagiti kongregasion ken inaldaw nga immadu ti bilangda.”​—Ara. 16:5.