Dagiti Maudi a Saludsod Kadagiti Kandidato iti Bautismo

Kaaduanna a maaramid dagiti bautismo kadagiti asamblea ken kombension dagiti Saksi ni Jehova. Iti ngudo ti palawag iti bautismo, kiddawen ti ispiker a tumakder dagiti agpabautisar ket sungbatanda iti napigsa ti dua a saludsod iti napigsa a timek:

1. Nagbabawyam kadin dagiti basolmo, indedikarmon ti bagim ken Jehova, ken inawatmon ti panangisalakanna babaen ken Jesu-Kristo?

2. Maawatam kadi a ti panagbautisarmo ipakitana a maysakan a Saksi ni Jehova ken pasetkan ti organisasion ni Jehova?

Ti positibo a sungbat dagiti kandidato iti bautismo kadagitoy a saludsod kaipapananna ti ‘panangipakaammoda iti publiko’ ti pammatida iti subbot ken ti naimpusuan a panangidedikarda iti bagida ken Jehova. (Roma 10:9, 10) Nasaksakbay nga ikararag ken panunoten koma a naimbag dagiti kandidato iti bautismo dagitoy a saludsod tapno masungbatanda dagita nga addaan kombiksion.

Indedikarmo kadin ti bagim ken Jehova babaen ti kararag, nga inkarim nga isu laeng ti pagserbiam ken ti panangaramid iti pagayatanna ti kapatgan iti biagmo?

Talaga kadi a kombinsidoka a masapul a mabautisarankan iti kabiitan a panawen?

Ania ti maitutop a pagbado iti bautismo? (1 Tim. 2:9, 10; Juan 15:19; Fil. 1:10)

Agbadotayo koma “buyogen ti kinaemma ken kinasimbeng ti panunot” tapno maipakitatayo nga ‘agdaydayawtayo iti Dios.’ Liklikan ngarud dagiti agpabautisar ti saan a nanakman a bado a pagbabasa wenno dagiti addaan iti surat wenno islogan. Masapul a nadalus, naurnos, ken maitutop dayta iti okasion.

Kasano koma ti panagtignay ti maysa a tao nga agpabautisar? (Luc. 3:21, 22)

Ti bautismo ni Jesus ti pagtuladan iti panagpabautisar dagiti Kristiano ita. Para kenkuana, ti bautismo ket serioso a banag, ken makita dayta iti kababalin ken tigtignayna. Gapuna, ti pagbautisaran ket saan koma a lugar a pagaangawan, pagay-ayaman, paglalangoyan, wenno dadduma pay nga aramid a mangdadael iti kinaserioso ti okasion. Saan met koma nga agtignay ti kabbaro a Kristiano iti wagas a kas man la nakagun-od iti dakkel a balligi. Nupay naragsak nga okasion ti bautismo, nadayaw koma ti pannakayebkas ti kasta a rikna.

Kasano a makatulong kenka ti regular a pannakigimong ken pannakikadua iti kongregasion tapno maitungpalmo ti dedikasionmo ken Jehova?

Uray nabautisarankan, apay a napateg nga itultuloymo ti nasayaat nga eskediul ti personal a panagadalmo ken regular a pannakiramanmo iti ministerio?

DAGITI INSTRUKSION KADAGITI PANGLAKAYEN ITI KONGREGASION

No ibagan ti di bautisado nga agibumbunannag a kayatnan ti agpabautisar, masapul a maparegta a repasuenna a naimbag “Dagiti Saludsod Para Kadagiti Agtarigagay nga Agpabautisar,” a masarakan iti panid 185-207. Masapul met a basaenna ti “Mensahe Kadagiti Di Bautisado nga Agibumbunannag,” a mangrugi iti panid 182. Ilawlawag dayta no kasano a makapagsagana iti pannakisarita dagiti panglakayen kenkuana. Kas nadakamat sadiay, ti nakasaganan nga agpabautisar mabalinna nga usaren dagiti insuratna a komento ken pagtalinaeden a nakalukat daytoy a libro bayat a makisarsarita kenkuana dagiti panglakayen. Ngem saanen a kasapulan nga adda mangirepaso kenkuana kadagiti saludsod sakbay a kasarita dagiti panglakayen.

No tarigagayan ti maysa ti agpabautisar, masapul nga ibagana dayta iti koordineytor ti bagi dagiti panglakayen. No nabasan ti agtarigagay nga agpabautisar “Dagiti Saludsod Para Kadagiti Agtarigagay nga Agpabautisar,” saludsoden ti koordineytor ti bagi dagiti panglakayen no nagdedikaren ken Jehova babaen ti kararag, nga aramidenna ti pagayatanna. No inaramidna daytan, iyurnos ti koordineytor ti bagi dagiti panglakayen ti pannakisarita kenkuana ti dua a panglakayen tapno repasuenda “Dagiti Saludsod Para Kadagiti Agtarigagay nga Agpabautisar.” Agduma a panglakayen ti mangirepaso kenkuana iti dua a paset. Saan a masapul nga urayen ti pannakaipakaammo ti asamblea wenno kombension sakbay a rugian ti panangrepaso.

Gagangay a masaklaw ti dua a paset iti dua a sesion a saggaysa nga oras ti kapautna. Ngem mabalin met a sumobra iti maysa nga oras no kasapulan. Maluktan ken maserraan koma ti tunggal panagrepaso iti kararag. Saan koma nga agdardaras ti kandidato wenno dagiti panglakayen a mangrepaso kadagiti saludsod. Prioridad koma dagiti natudingan a panglakayen ti eskediulda a panangirepaso.

Kaaduanna a nasaysayaat no irepaso dagiti saludsod iti tunggal kandidato iti bautismo imbes a kas grupo. No sungbatan ti kandidato ti tunggal saludsod, maammuan dagiti panglakayen no kasano kauneg ti pannakaawatna, isu a masiguradoda no mabalinnan ti agpabautisar. Maysa pay, ad-adda a mayebkas ti agtarigagay nga agpabautisar ti kapanunotanna. Mabalin nga agkadua a marepaso dagiti agassawa.

No babai ti kandidato iti bautismo, masapul a maaramid ti panangrepaso iti lugar a makita ti sabsabali ngem saanda a mangngeg. No kasapulan nga adda kaduana, masapul a maysa a panglakayen wenno ministerial nga adipen, depende iti seksion a mairepaso kas nadakamat iti sumaruno a parapo.

Kadagiti kongregasion a manmano ti panglakayen, mabalin a dagiti makabael a ministerial nga adipen a nasayaat ti panagdesdesision ken pannakaawatna ti mangirepaso kenkuana kadagiti saludsod para iti bautismo a masarakan iti “Paset 1: Patpatien Dagiti Kristiano.” Dagiti laeng panglakayen ti mangirepaso iti “Paset 2: Panagbiag kas Kristiano.” No agkurang ti kongregasion kadagiti kualipikado a kakabsat a lallaki, mabalinda a kontaken ti manangaywan iti sirkito tapno maammuan no mabalin a tumulong ti kabangibang a kongregasion.

No menor de edad ti kandidato iti bautismo, kaduana koma dagiti manamati a nagannakna bayat ti panangrepaso. No saan a makadua ti nagannakna, masapul a dua a panglakayen (wenno maysa a panglakayen ken maysa a ministerial nga adipen, depende iti seksion a mairepaso) ti mangkadua kenkuana iti tunggal panangrepaso.

Siguraduen koma dagiti panglakayen a ti agtarigagay nga agpabautisar ket addaanen iti umdas a pannakaawat kadagiti kangrunaan a pannursuro iti Biblia. Kanayonanna, kayatda a siguraduen a ti kandidato iti bautismo ket talaga nga ap-apresiarenna ti kinapudno ken ipakpakitana ti umiso a panagraem iti organisasion ni Jehova. No saanna a maawatan dagiti kangrunaan a pannursuro iti Biblia, mangyurnos dagiti panglakayen iti tumulong kenkuana tapno kualipikadonto a mabautisaran iti sabali a gundaway. Mabalin a kasapulan a maikkan pay iti gundaway ti dadduma tapno ad-adda a maipakitada ti apresasionda iti ministerio wenno iti panagpasakup kadagiti urnos ti organisasion. Nakadepende kadagiti panglakayen no kasanoda a bingaybingayen ti oras a busbosenda iti tunggal panangrepaso tapno matingitingda no ti kandidato iti bautismo ket kualipikadon a mabautisaran. Nupay ad-adu a tiempo ti mabusbos iti sumagmamano a saludsod ken basbassit kadagiti dadduma, masapul a marepaso ti amin a saludsod.

Kalpasan ti maikadua a panagrepaso, agsarita dagiti panglakayen a natudingan a mangrepaso iti kandidato iti bautismo ket ikeddengda no kualipikadon a mabautisaran wenno saan. Ikabilangan dagiti panglakayen ti nalikudan, abilidad, ken dadduma pay a kasasaad ti tunggal kandidato. Tingitingenda no addaanen iti nasinged a relasion ken Jehova ken matarusannan dagiti kangrunaan a kinapudno iti Biblia. Babaen ti naayat a tulongyo, ad-adda a maisagana dagiti agpabautisar a mangitungpal iti nagpateg nga annongenda kas ministro ti naimbag a damag.

Kalpasanna, maysa wenno dua kadagiti natudingan a panglakayen ti makisarita iti kandidato tapno ibagada no kualipikado a mabautisaran wenno saan. No kualipikado, irepaso kenkuana dagiti panglakayen “Dagiti Maudi a Saludsod Kadagiti Kandidato iti Bautismo” a masarakan iti panid 206-207. No ti kandidato ket saanna pay a nalpas nga inadal ti libro nga Agbiagka a Naragsak iti Agnanayon!, masapul nga iparegta dagiti panglakayen nga ituloyna dayta kalpasan ti panagbautisarna. Ibagayo iti kandidato iti bautismo a maikabil ti petsa ti panagbautisarna iti Congregation’s Publisher ­Record-na. Ipalagipyo nga alaen dagiti panglakayen daytoy a personal nga impormasion kenkuana tapno maba­linna ti makiraman kadagiti aktibidad nga inyurnos ti kongregasion ken umawat iti pammaregta ken panangiwanwan dagiti panglakayen. Kanayonanna, mabalin nga ibaga dagiti panglakayen kadagiti kabbaro nga agibumbunannag nga aniaman a personal nga impormasion ket maannadan maitunos iti Sangalubongan a Pagannurotan Dagiti Saksi ni Jehova iti Pannakaprotektar Dagiti Impormasion, iti jw.org/ilo. Agpaut laeng iti sangapulo a minuto wenno awan pay daytoy a panangrepaso.

Makatawen kalpasan ti bautismo, dua a panglakayen ti makisarita kenkuana tapno tulongan ken paregtaenda. Ti maysa kadakuada ket ti manangaywan iti grupo a nakaikamenganna. No menor de edad ti nabautisaran, kaduana koma dagiti manamati a nagannakna. Naayat ken makaparegta koma ti panagsasaritada. Ibaga dagiti panglakayen ti naespirituan a panagrang-ayna ken mangipaayda kadagiti praktikal a tulong no kasano a maitultuloyna ti nasayaat nga eskediulna iti personal a panagadal, inaldaw a panagbasa iti Biblia, linawas a panagdaydayaw ti pamilia, regular nga itatabuno ken pannakipartisipar kadagiti gimong, ken iti linawas a panangasaba. (Efe. 5:15, 16) No saanna pay a nalpas nga inadal ti libro nga Agbiagka a Naragsak iti Agnanayon!, mangyurnos dagiti panglakayen iti tumulong kenkuana tapno malpasna dayta. Kanayon koma a mangipaay dagiti panglakayen iti naayat a komendasion. Masansan nga umdasen ti balakad ken singasing maipapan iti maysa wenno dua a punto.