Ti Daga nga Inted ti Dios iti Israel

TI DAGA nga inted ti Dios iti Israel ket pudno a nasayaat a daga. Nangibaon ni Moises kadagiti managsimisim nga umun-una iti nasion tapno sukimatenda ti Naikari a Daga ken tapno mangalada kadagiti pakakitaan iti apitna. Idi nagsublida, nangyegda kadagiti higos, granada, ken nakadakdakkel a raay ti ubas nga uray la dua a lallaki ti nangawit iti dayta babaen iti maysa nga arimata! Nupay nagsanudda a sibubuteng gapu iti kaawan pammati, impadamagda: Ti daga “pudno a pagay-ayusan ti gatas ken diro.”—Nu 13:23, 27.

Sakbay unay a simrekda iti daga kamaudiananna, ti pannakangiwat ni Jehova impasiguradona kadagiti umili: “Ipannaka ni Jehova a Diosmo iti nasayaat a daga, maysa a daga dagiti naapres a ginget ti danum, dagiti ubbog ken dagiti nadanum a yuyeng nga agayus iti ginget a tanap ken iti nakabambantay a rehion, maysa a daga dagiti trigo ken sebada ken ubas ken higos ken granada, maysa a daga dagiti lana nga olibo ken diro . . . a sadiay saankanto nga agkurang iti aniaman, maysa a daga a landok ti batbatona ket manipud iti bambantayna agminaskanto iti gambang.” (De 8:7-9) Agingga itoy nga aldaw, daytoy a daga agtultuloy nga agpatpataud iti kinawadwad.

Ti pintas ken kinangayed dayta a naikari a daga idi un-unana ket paginteresantay unay ita. Apay? Agsipud ta ti kinawadwad a pinangbendision ni Jehova iti kadaanan nga Israel ket inaramat dagiti Mesianiko a padto a pangdeskribir no ania ti aramidento ti Dios maipaay iti intero a sangatauan iti sidong ti turay ni Jesu-Kristo, ti “Prinsipe ti Kappia.”​—Isa 9:6; Sal 67:4-7; 72:16.