Probinsia ti Galilea

TI Galilea, masarakan iti makin-amianan a Palestina, maysa a narang-ay ken aduan populasion a probinsia idi panawen ti Biblia. Agingga itoy nga aldaw makaawis ti geograpiko a paspasetna​—ti adalem nga asul a Baybay ti Galilea, ti likkalikkaong a makin-amianan a disso, ken ti nadam-eg a tantanap. (Ladawan iti baba) Ditoy makakayaw a rehion, binusbos ni Jesus ti kaaduan a paset ti naindagaan a biagna, yantangay napadakkel idiay Nazaret a siudad ti Galilea.​—Mt 2:21-23; Lu 2:51, 52.

Panagtalon, panagtaraken kadagiti karnero, ken panagkalap ti kadawyan a pagsapulan dagiti taga Galilea, ket nayanninaw daytoy iti adu a pangngarig ni Jesus. Dagiti kadawyan a taga Galilea a nagaget ken naanep ket tinagibassit dagiti Fariseo ken panguluen a papadi idiay Jerusalem. Kadagiti padada a Judio, nalaka a mailasin ti taga Galilea gapu iti naiduma a bengngatda.​—Mt 26:73.

Ti Galilea ti nakaaramidan ti sumagmamano kadagiti naisangsangayan a pasamak ti ministerio ni Jesus. Iti maysa a bakras ti bantay iti asideg ti Capernaum, impaay ni Jesus ti nalatak a Sermonna idiay Bantay. (Mt 5:1, 2) Ditoy Galilea, namilagruan a pinaimbagna ti adu a tattao.​—Mr 1:32-34; 6:53-56; Jn 4:46-54.

Kasano ti pannakaabrasa idiay Galilea ti panangasaba ken milmilagro ni Jesus? Idi nangasaba iti ilina, ti Nazaret, dagiti umili idi damo ‘nagsiddaawda iti makaay-ayo a sasao a rumrummuar iti ngiwatna.’ Ngem kalpasan ti panangipadis kadakuada ni Jesus kadagiti Israelita idi kaaldawan da Elias ken Eliseo, inkagumaanda a papatayen. (Lu 4:22-30) Nupay kasta, ti ministerio ni Jesus ket impangag ti kaaduan a taga Galilea. Gapuna, naala kadagiti taga Galilea dagiti immun-una nga adalanna, ket taga Galilea amin dagiti apostolna (mabalin a malaksid ken Judas Iscariote). (Mt 4:18-22; Lu 6:12-16) Taga Galilea ti bunggoy dagiti agarup 120 nga adalan nga immawat iti nasantuan nga espiritu idi aldaw ti Pentecos- tes 33 K.P.​—Ara 1:15; 2:1-7.