FEATURE

Uneg ken Aglikmut ti Jerusalem Ita

JERUSALEM—sigud a sentro ti pudno a panagdaydayaw ken Jehova a Dios, ngem saan itan nga isu ti siudad a mangaw-awit iti nagan ti Dios. Napukaw ti Jerusalem ti nainggundawayan a saadna kalpasan a nagapostata iti sursuro ti Sao ti Dios ken linaksidna ti Mesias, ni Jesus. (Lu 13:34, 35) Nupay kasta, agingga ita interesado unay iti Jerusalem dagiti managayat iti Biblia agsipud ta naaramid sadiay dagiti pasamak a nakapatpateg iti isuamin.

Ti buya ti siudad manipud abagatan no tannawagan manipud tangatang (kas ti adda iti daytoy a panid) ipakitana ti nagsaadan ti nadumaduma a paset ti Jerusalem. Ti Bantay Moria, nga ayan ti templo, adda idiay likudan. Ti adda iti sango ket ti Bantay Sion, a nabedngan iti naapres a ginget ti Kidron iti daya ken iti Ginget Tyropoeon iti laud. Iti Bantay Sion ti nakaibangonan ti Siudad ni David.

No ti maysa a tao sitatakder iti Bantay dagiti Olibo iti daya ti Jerusalem, matannawaganna ti Ginget Kidron ken makitana ti disso a sigud a nagsaadan ti templo. Ti naisaad itan sadiay ket ti santuario dagiti Muslim a pagaammo kas Dome of the Rock. ‘Agtugtugaw idi ni Jesus idiay Bantay dagiti Olibo a matan-awanna ti templo’ idi impaayna ti nalatak a padtona maipapan iti “panungpalan ti sistema ti bambanag.”—Mr 13:3; Mt 24:3.

[Ladawan iti panid 948] — Ti disso ti templo kas makita manipud Bantay dagiti Olibo. Iti sanguanan, makita dagiti lugar a pagitabonan dagiti Judio a mamati nga addanto aldaw nga agparang ditoy ti Mesias

[Dagiti ladawan iti panid 948] — Ti Tanem iti Minuyongan (kannawan) ken ti Simbaan ti Nasantuan a Panteon (baba, adda iti unegnadagiti panteon idi umuna a siglo). Tunggal maysa kadagitoy ket ibagbaga ti dadduma nga isu ti disso a nakaitabonan ni Jesus

[Ladawan iti panid 949] — Ruangan ti Damasco, Jerusalem

[Ladawan iti panid 950] — Ti ban-aw ti Siloam idi umuna a siglo, a nangibagaan ni Jesus iti bulsek a lalaki a mapan agdiram-os ket umimbag (Jn 9:7)

[Ladawan iti panid 951] — Usok ni Warren, a nalabit dumalanan idi ti mapan agsakdo iti danum idiay ubbog ti Gihon babaen kadagiti timba. Mabalin a kasta nga usok ti dimmalanan ti lallaki ni David nga agturong iti salindeg dagiti Jebuseo iti Sion (2Sm 5:8)