KIS

1. Merarita a Levita, anak ni Mali ken kabsat ni Eleazar. Yantangay natay ni Eleazar nga awanan iti annak a lallaki, no di ket naaddaan laeng iti annak a babbai, ti annak ni Kis innalada dagitoy nga agtawid kas assawa. Maysa kadagiti “annak a lallaki ni Kis” isu ni Jerameel.​—1Cr 23:21, 22; 24:29.

2. Maysa a Benjamita; ti anak ni Jeiel ken ti asawana a ni Maaca. (1Cr 8:29, 30) Ti kabsatna a ni Ner ket apong ni Saul, immuna nga ari ti Israel. (1Cr 9:35-39) Mabalbalin a ni Jeiel nga ama ni Kis naawagan met iti Abiel.​—Kitaenyo ti ABIEL Num. 1.

3. Maysa a Benjamita, ti ama ni Ari Saul. (1Sm 14:51; Ara 3:21) Isu nabaknang a kameng ti pamilia dagiti Matrita. (1Sm 9:1; 10:21) Daytoy a Kis ket anak ni Ner ken apoko ni Jeiel (Abiel), ngarud kaanakan ti Kis a natukoy iti Num. 2 ken kabsat ni Abner. (1Cr 8:29-33; 9:35-39) Nupay kasta, isu naawagan anak ni Abiel iti 1 Samuel 9:1, a sadiay mabalbalin a naaramat ti termino nga “anak” a pangirepresentar kenkuana, saan a kas mismo nga anak ni Abiel (Jeiel), no di ket kas apokona.

Ti pagtaengan ni Kis ket nabatad nga adda idiay Gabaa, iti Benjamin (1Sm 10:26), nupay adda idiay Zela ti lugar a pagitabonanna. (2Sm 21:14) Ti laeng pasamak a nadakamat iti Biblia maipapan ken Kis ket nainaig iti panangibaonna iti anakna a ni Saul agraman maysa a katulongan tapno sapulenda ti sumagmamano a napukaw nga asna.​—1Sm 9:3, 4.

4. Maysa a Levita idi tiempo ni Ari Ezekias; anak ni Abdi iti annak ni Merari. Ni Kis ket maysa kadagiti Levita a timmulong iti panangdalus iti templo idi umuna a tawen ti panagturay ni Ezekias.​—2Cr 29:1-5, 12-17.

5. Maysa a Benjamita nga inapo ni Mardokeo a kasinsin ni Ester.​—Est 2:5-7.