HEZRON
[Paraangan; Purok].
1. Anak ni Ruben ken inapo a pannakaulo “dagiti Hezronita.”—Ge 46:9; Ex 6:14; Nu 26:4-6; 1Cr 5:3.
2. Anak ni Perez ken ulo ti pamilia “dagiti Hezronita” a kaputotan ni Juda; inapo da Ari David ken Jesu-Kristo. (Ge 46:12; Nu 26:20, 21; Ru 4:18-22; Mt 1:3; Lu 3:33) Iti edad nga 60, innala ni Hezron ti anak ni Maquir kas asawa ket nangipasngay kenkuana iti anak a ni Segub. (1Cr 2:21) Ti annakna a da Jerameel, Ram, ken Kelubai (Caleb) ket nabatad nga immun-una a naipasngayda.—1Cr 2:9, 18, 25.
Sigun ti mabasa iti 1 Cronicas 2:24 ti Masoretiko a teksto, natay ni Hezron idiay Caleb-efrata, kalpasan daytoy ti biudana a ni Abias impasngayna ni Asur, ti ama ni Tecoa. Nupay kasta, patien ti dadduma nga eskolar a saan a tinaginayon ti Masoretiko a teksto ti orihinal a mabasa, ta ni Hezron ket nailista a karaman kadagiti 70 a “kararua iti balay ni Jacob nga immay iti Egipto” isu nga iti dayta a daga ti nakatayanna (Ge 46:12, 26, 27), ken pagarupenda nga imposible a mapanaganan iti Hebreo a Caleb-efrata ti maysa a lugar idiay Egipto. Gapuna, ti 1 Cronicas 2:24 ket inatur ti adu a managipatarus tapno ad-adda a makitunos kadagiti mabasa iti Griego a Septuagint ken iti Latin a Vulgate. Kastoy ti patarus ti The Jerusalem Bible iti daytoy a teksto: “Kalpasan ti ipapatay ni Hezron, ni Caleb inkallaysana ni Efrata, nga asawa ni Hezron nga amana, a nangipasngay ken Asur maipaay kenkuana, ama ni Tecoa.” Kastoy met ti mabasa iti patarus ni J. B. Rotherham: “Ket kalpasan ti ipapatay ni Hezron ni Caleb simrek ken Efrata, ket ti asawa idi ni Hezron isu ni Abia nga impasngayna kenkuana ni Asur nga ama ni Tecoa.” Ngarud sigun kadagitoy a panangbalbaliw, ni “Asur” ket mabalin nga “anak” ni Hezron babaen ken Abia (Abias) wenno “anak” ni Caleb babaen ken Efrata.
3. Maysa a siudad idiay makin-abagatan a ketegan ti Juda nga adda iti nagbaetan ti Cades-barnea ken Addar. (Jos 15:1-3) Nupay kasta, iti kapadana a salaysay iti Numeros 34:4 saan a nagsina ti pannakailista ti Hezron ken Addar no di ket mabasa a “Hazar-addar,” a mangipaspasimudaag mabalin nga adda ti Hezron, wenno Hazar, iti asideg ti Addar, no saan a maymaysada a lugar.— Kitaenyo ti ADDAR Num. 2.