AQUIS

Filisteo nga ari ti Gat a nagturay bayat ti tiempo da David ken Solomon. Isu ti anak ni Maoc wenno Maaca, ket naawagan Abimelec iti superskripsion ti Salmo 34, nalabit maysa a titulo nga umasping iti Faraon wenno Czar.​—1Sm 27:2; 1Ar 2:39.

Namindua a nagkamang ni David iti pagturayan ni Ari Aquis bayat ti panangtaltalawna ken Saul. Iti immuna a panagkamangna, naginmamauyong ni David idi inatapda a maysa a kabusor ket binaybay-an ni Aquis a pumanaw kas di mangan-ano a mulmulluong. (1Sm 21:10-15; Sal 34:Sup; 56:Sup) Iti maikadua nga ipapan ni David sadiay, kaduana ti 600 a mannakigubat ken dagiti pamiliada, ket iti kasta intuding ida ni Aquis nga agnaed idiay Siclag. Bayat ti makatawen ken uppat a bulan a kaaddada sadiay, namati ni Aquis a rubrubbuoten ti buyot ni David ti il-ili ti Juda, ngem ti kinaagpaysuanna ti sinamsaman ni David ket dagiti Gesurita, Girzeo, ken Amalekita. (1Sm 27:1-12) Naballigi unay dayta a panangallilaw ni David ta isu ket pinagbalin ni Aquis kas bukodna a para-guardia idi a mangor-organisar dagiti Filisteo iti iraraut ken Ari Saul, ket idi laengen maudi a kanito a napagsubli ni David ken dagiti tattaona idiay Siclag gapu iti panangipappapilit ti dadduma pay nga “aliado nga appo” dagiti Filisteo a mapagawidda. (1Sm 28:2; 29:1-11) Idi a ni David nagbalin nga ari ket nakigubat iti Gat, nalawag a saan a napapatay ni Aquis. Sibibiag pay idi nagturay ni Solomon.​—1Ar 2:39-41; kitaenyo ti GAT.