SITTIM

[[Kaykayo nga] Akasia].

1. Maysa a lugar iti desierto a tantanap ti Moab a dimmanonan ti kampo dagiti Israelita manipud Bet-jesimot. (Nu 25:1; 33:49; Jos 2:1) Nabatad a ti “Sittim” ket napaababa a porma ti nagan nga Abel-sittim (Pagay-ayusan ti Danum ti [Kaykayo nga] Akasia). Kunaen ti dadduma nga isu ti Tell el-Kefrein, maysa a nababa a turod nga agarup 8 km (5 mi) iti amianan a daya ti Bet-jesimot (Tell el-ʽAzeimeh, iti asideg ti amianan a daya a nagsulian ti Natay a Baybay). Nupay kasta, ad-adda nga anamonganda ti Tell el-Hammam, maysa a dakdakkel a lugar a nagsayaat ti ayanna ken masarakan iti 2.5 km (1.5 mi) iti dayaen ti Tell el-Kefrein.

Babaen ken mammadtona a Mikias, pinalagipan ni Jehova dagiti Israelita no ania ti inaramidna maigapu kadakuada: “O ilik, lagipem, pangngaasim, no ania ti impatigmaan ni Balak nga ari ti Moab, ken no ania ti insungbat kenkuana ni Balaam nga anak ni Beor. Manipud idi iti Sittim, agingga iti Gilgal, iti panggep a maammuan koma dagiti nalinteg nga aramid ni Jehova.” (Mik 6:5) Bayat ti panagpakarso ti Israel idiay Tantanap ti Moab, a nakairamanan ti Sittim, pinaay ni Jehova ti gandat ni Balaam a mangilunod kadagiti Israelita; linapdanna ti panangikagumaan dagiti Moabita a mangtalipupos iti ilina. Gapu iti tulong ni Jehova, nagballigi ti Israel maibusor kadagiti Midianita, agraman dagiti Moabita, a nangikagumaan a nangguyugoy iti adu nga Israelita a makipaset iti imoralidad ken idolatria. Imballasiw ni Jehova ti Israel manipud iti Jordan babaen ti maysa a milagro, ket idiay Gilgal ‘intulidna . . . ti panangumsi ti Egipto.’​—Nu 22:4–25:8; 31:3-11, 48-50; Jos 3:1, 14-17; 5:9.

2. No tumukoy daytoy iti maysa a naapres a ginget, mabalin a “ti naapres a ginget ti Kaykayo nga Akasia” (Sittim) ket isu ti nababbaba a pagayusan ti naapres a ginget ti Kidron.​—Joe 3:18.