TALON TI AGDAMDAMILI

Idi nakarikna ni Judas ti “nasaem a ladingit,” impuruakna idiay templo ti 30 a kapisi a pirak (no siklo, $66) a gatad iti panangliputna ken Jesus, ket ti panguluen a papadi inggatangda dayta a kuarta iti “talon ti agdamdamili tapno pagitabonan kadagiti ganggannaet.” (Mt 27:3-10) Idi agangay, ti talon ket naawagan iti Akeldama, wenno “Talon ti Dara.” (Ara 1:18, 19; kitaenyo ti AKELDAMA.) Nanipud pay maikapat a siglo K.P., maikunkuna a daytoy a talon isu ti maysa a lugar iti makin-abagatan a darisdis ti Ginget Hinnom, sakbay unay a sumabet iti Ginget Kidron.

Saan nga espesipiko nga ipasimudaag ti sasao a “talon ti agdamdamili” no ti talon ket kukua ti maysa laeng nga agdamdamili wenno naawagan a kasta agsipud ta adda idi tiempo a dayta a lugar ti nagdamdamilian dagiti dumadamili. Nupay kasta, agparang a posible ti naud-udi a nadakamat no umiso ti nabayagen a maikunkuna a disso nga ayanna. Mabalin nga asideg dayta iti Ruangan dagiti Ribak (wenno “Ruangan dagiti Agdamdamili,” sigun ken J. Simons iti inkabilna a footnote iti Jerusalem in the Old Testament, Leiden, 1952, p. 230), a nadakamat iti Jeremias 19:1, 2. (Idiligyo ti Jer 18:2.) Uray kadagiti nabiit pay a tiempo, adda maala a kasapulan a pila wenno pitak iti dayta a disso. Kasta met, nawadwad a danum ti kasapulan iti panagaramid iti bambanag a dinamili, ken asideg daytoy a lugar iti ubbog ti En-rogel ken iti Ban-aw ti Siloam kasta pay iti danum nga adda iti Ginget Hinnom bayat ti tiempo ti lam-ek.