KARASAEN, NAGSARA A
[Heb., ʽakh·shuvʹ; shephi·phonʹ].
Maysa kadagiti nagita nga uleg a karasaen nga agnanaed iti Palestina, mailasin babaen iti maysa a natirad a sara iti ngatuen ti tunggal mata. Ipadamag ni Raymond Ditmars a ti nagsara a karasaen (Cerastes cornutus) masarakan iti makin-amianan nga Africa manipud Algeria agingga iti Egipto ken kasta met iti Arabia ken makin-abagatan a Palestina.
Gapu ta nabileg ti gita ti nagsara a karasaen (nupay saan a gagangay a makapapatay iti tattao), mayanatup a sawen ni David ti maipapan iti naranggas a tattao kas nangpatadem iti dilada “kas iti dila ti maysa a serpiente; ti gita ti nagsara a karasaen adda iti baba dagiti bibigda.”—Sal 140:3; kitaenyo ti ASPID.
Ti kaatiddogna dumanon iti rukod nga agarup 0.8 m (2.5 pie), ti nagsara a karasaen ket nalusiaw, maris-darat ket ngarud aglemmeng iti kadaratan, nga agur-uray iti tukkawanna. Ti di nasanay a mangilasin a mata marigatan unay a makasiput iti kumkumleb a nagsara a karasaen. Iti librona a Reptiles of the World (1953, p. 234, 235), deskribiren ni Raymond Ditmars ti sumagmamano a nagsara a karasaen a nakitana a nakakulong: “Kas kadagiti amin a karasaen ti desierto, kanayon nga ikagumaanda a gaburan dagiti bukotda iti darat, iti kasta mailemmengda ti bagida. No maikkan dagiti tangkal iti sumagmamano a pulgada a napino a darat, awan ti makita a paset ti bagi dagitoy nga uleg bayat ti aldaw no di laeng ti tuktok ti uloda. Tapno maikussuayna ti darat, daytoy a reptilia pagdaplatenna ti bagina agingga nga agbalin a kasla aklo ti makimbaba a bakrangna, ket kalpasanna babaen iti naisangsangayan nga agsasagadsad a panagallo-allon ti intero a bagina iti agsumbangir a sikigan, lumumlom ti uleg iti darat wenno igaburna ti darat iti bukotna.”
Piguratibo nga Usar. Ti nagsara a karasaen, a naalibtak ken sipapartak a tumukkaw, ket pagaammo a dumuklos kadagiti kabalio; ngarud mayanatup unay a ti tribu ni Dan a nadakamat iti Ge 49:17 ket naidilig iti “nagsara a karasaen.” Sadiay ni Jacob inyaspingna ni Dan iti serpiente, maysa a nagsara nga uleg, “a mangkagat kadagiti mukod ti kabalio tapno ti nakasakay kenkuana matnag a patallikud.” Saan a panangipababa daytoy ken Dan, a kasla ket tay nakadakdakes nga uleg iti karuotan a maikari laeng nga iluges ti mukod ti saka. Imbes ketdi, kas iti maaramidan ti maysa nga uleg, agserbi ni Dan iti dakkel a panggep nga agpaay iti nasion. Babaen ti panagpadpadaanna a kas iti nagsara a karasaen, arigna mabalinna a kagaten dagiti mukod ti kabalio a mangaw-awit iti mannakigubat a kabusor tapno tumakder ti kabalio ket patallikud a matnag ti nakasakay kenkuana. Gapuna, nupay bassit, ni Dan ket nakapegpeggad a kas iti maysa a nagsara a karasaen kadagiti manangriribuk iti Israel.