SERBESA

Inumen a nababa ti alkoholna, naaramid manipud iti trigo wenno dadduma pay a bukbukel babaen ti in-inut a proseso ti panangpasanger. Ti Hebreo a sao a soʹveʽ, naipatarus a “serbesa a trigo,” mabalin met nga ipatarus nga “arak.”​—Isa 1:22, Rbi8 ftn; Os 4:18, Rbi8 ftn; Na 1:10, Rbi8 ftn.

Ipalgak dagiti cuneiform a tapi a ti nasigo a panangpataud iti serbesa manipud bukbukel ket maar-aramiden iti kadaanan a Mesopotamia idi pay maikatlo a milenio K.K.P. Idi damo a nakagteng ni Abraham idiay Egipto, nalabit nakitana a ti serbesa ket gagangayen nga isu ti in-inumenda sadiay. Iti naud-udi a petsa, naikuna a nakapatpateg unay ken Ramses III ti serbesa ta nangidaton iti agarup 114,000 L (30,000 gal) iti makatawen iti didiosna. Adu ti nasarakan a tasa ti serbesa dagiti Filisteo nga addaan kadagiti pangsagat a paparukpokan. Agparang nga addaan dagita a nadumaduma a nasion iti nakaad-adu a klase ti serbesa a maibagay iti amin a kita ti panagraman​—nasam-it a serbesa, nangisit a serbesa, nabanglo a serbesa, sumilapsilap a serbesa, nalaokan iti especia a serbesa​—maiserserbi a napudot wenno nalamiis, nalasaw wenno napalet ken kasla pataroy.​—Kitaenyo ti ARAK KEN NAINGEL NGA INUMEN.