ABIB

[Berde a Dawdawa].

Ti orihinal a nagan ti umuna a lunar a bulan iti sagrado a kalendario dagiti Judio ken ti maikapito a bulan iti sekular a kalendario. (Ex 13:4; 23:15; 34:18; De 16:1) Gagangay a katupagna ti maud-udi a paset ti Marso agingga iti umun-una a paset ti Abril.

Ti nagan nga Abib matarusan a kaipapananna ti “Berde a Dawdawa,” dagiti dawa ti bukbukel a naluomen ngem nalukneng pay laeng. (Idiligyo ti Le 2:14.) Bayat daytoy a bulan a naaramid ti panagani iti sebada, a sinaruno ti panagani iti trigo sumagmamano a lawas kalpasanna. Nangrugi met dagiti naud-udi a tudo, wenno tudo iti primavera, ket timmulong dagitoy a mamaglippias iti Karayan Jordan. (Jos 3:15) Intuding dayta ni Jehova kas ti umuna a bulan ti sagrado a tawen idi tiempo ti Ipapanaw iti Egipto. (Ex 12:1, 2; 13:4) Kalpasan ti pannakaidestiero idiay Babilonia, daytoy a nagan ket nasukatan iti nagan a Nisan.​—Kitaenyo ti NISAN.