DEUEL

[Pannakaammo ti Dios; Ammo ti Dios].

Ama ni Eliasaf a nagserbi kas panguluen iti tribu ni Gad bayat dagiti panagallaalla ti Israel idiay let-ang. (Nu 1:14; 7:42, 47; 10:20) Iti Masoretiko a teksto ken iti Syriac a Peshitta, isu naawagan “Reuel” iti Numeros 2:14. Mabalin a maigapu daytoy iti biddut a panagkopia ti eskriba, yantangay agkaarngi unay dagiti Hebreo a letra maipaay iti “D” ken “R.” Kinapudnona, agparang ti nagan a “Deuel” iti Numeros 2:14 iti Samaritano a Pentateuch, iti Latin a Vulgate, ken iti nasurok a sangagasut a Hebreo a manuskrito.