DARAT
Naruka a tinukel a material a buklen dagiti partikulo a babbabassit ngem iti graba ngem nagasgasal ngem iti lan-ak. Iti naindaklan a siribna, ni Jehova a Dios “nangipasdek iti darat kas beddeng maipaay iti baybay, maysa a di nakedngan ti kapautna nga alagaden a saanna a maballasiw.” (Jer 5:22) Saan a kas iti solido a bato, naruka ti darat ket ngarud maagsepna ti panagsabuag dagiti dalluyon nga umablat iti dayta. Maburak ken agpukaw ti puersa dagiti nadawel a dalluyon, iti kasta ti baybay mamedmedan.
Idi binendisionanna dagiti tribu da Zabulon ken Isacar, kinuna ni Moises a “susopendanto ti aglaplapusanan a kinabaknang dagiti baybay ken dagiti nailemmeng a pempen iti darat.” (De 33:18, 19) Mabalin a kaipapanan daytoy a mabendisionanda iti kinabaknang ti baybay ken daga.
Iti Biblia maulit-ulit a nausar ti “darat iti baybay” a mangipasimudaag iti kaadu a di mabilang wenno kasta unay a kinawadwad. (Ge 22:17; 32:12; 41:49; Jos 11:4; Sal 78:27; 139:17, 18; Jer 15:8; Heb 11:12) Ngem ti matuktukoy a bilang saan a kasta unay ti kinadakkelna iti tunggal kaso. Nupay kasta, iti umim-imatang, kasta unay ti kadakkel ti bilang ti tattao wenno bambanag a nairaman ta saan a masinunuo dayta. Kas pagarigan, ti maysa a paset dagiti puersa dagiti Filisteo nga immay a maibusor iti Israel idi kaaldawan ni Ari Saul ket nadeskribir kas “tattao a kas kadagiti binukel ti darat nga adda iti aplaya ti kaaduda.” (1Sm 13:5) Kas nakita ni Juan iti sirmata, ti bilang dagidiay iyaw-awan ni Satanas kalpasan ti pannakaluk-atna iti mangliwengliweng ket naikuna a “kas iti darat ti baybay,” kayatna a sawen, dakkel unay daytoy a bilang ta saan a masinunuo ni Juan no kasano ti kaaduda.—Apo 20:8.
Idi inladawanna ti kinakaro ti panagluksawna, indeklara ni matalek a Job: “Nadagdagsen pay ngem uray kadagiti darat dagiti baybay.” (Job 6:3) Iti promedio, ti laeng 1 m ku (1.4 yd ku) ti nabasa a darat agdagsen iti 1,900 kg (4,200 lb). Nupay ti sangaawit a darat ket nadagsen nga awit, ti panagluksaw gapu iti maag a tao ket nadagdagsen pay iti daydiay kasapulan a mangibtur iti dayta. Daytoy ti naiparipirip iti Proverbio 27:3: “Ti kinadagsen ti maysa a bato ken ti sangaawit a darat—ngem ti panagluksaw [nga itden] ti maysa a maag nadagdagsen ngem isuda a dua.”