HANES

Maysa a disso a nadakamat iti Isaias 30:4 iti panangkondenar ni Jehova kadagidiay nagpatulong iti Egipto. (Isa 30:1-5) Di masigurado ti ayanna.

Adda nadumaduma a naisingasing a kaipapanan daytoy a teksto. Patien ti sumagmamano a komentarista a dagiti “babaonen” ket Judio, a naibaon tapno agpatulong iti puersa militar ti Egipto, ken dimtengda idiay Hanes maipaay iti dayta a panggep. Isingasing ti dadduma a dagiti babaonen ket kukua ni Faraon (nadakamat iti Isa 30:3) a nailadawan a mangpaspasangbay iti bunggoy a pannakabagi dagiti Judio idi nakadanon dagitoy idiay Hanes. Aniaman ti kasasaad, impakita ni Jehova a ti Egipto ket maysa nga ubbaw a gubuayan ti tulong.​—Isa 30:5.