Panangbirok Kadagiti Sungbat

“Saantayon a problema ti pagbiagtayo, tagtagiragsakentayon dagiti pagnam-ayan iti biag a saan a tagtagiragsaken ti ordinario a tao, kas iti air-condition, de kalidad a musika .  .  . Ngem iti laksid dagita, kaskasdi a mapampanunottayo​—‘ania’ ti panggep ti biag? Apay nga ikagkagumaantayo ti umasenso? Ania ti panggeptayo?” ​—David G. Myers, propesor ti sikolohia idiay Hope College, Holland, Michigan, U.S.A.

ANIA ti sungbatmo iti saludsod dayta a propesor? Mabalin a mapampanunot ti dadduma nga amangan no sayang laeng ti panawen a busbosenda a mangbirok kadagiti sungbat. Nupay kasta, ti di panangikankano kadagiti kasta a saludsod ket umasping iti di panangikankano iti maysa a bisil nga adda iti uneg ti sapatosmo​—mabalin a kabaelam latta ti magna, ngem saanka la ketdi a komportable iti panagpasiarmo.

Napampanunotmo kadin no adda panggep ti biag? No kasta, saanka nga agmaymaysa. Sigun iti World Values Survey, maysa kadagiti kadakkelan pay laeng a panagadal mainaig kadagiti prinsipio ti tao, umad-adu dagiti tattao iti adu a pagilian a mangpampanunot iti “kaipapanan ken panggep ti biag.”

Tapno maaddaanka iti napaypayso a kinatalingenngen wenno talna ti panunot, nasken a birokem dagiti sungbat dagitoy tallo nga agkakapateg a saludsod.

Nagtaudantayo?

Ania ti panggep ti biag?

Ania ti masakbayantayo?

Sadino ti pakasarakam kadagiti mapangnamnamaan a sungbat kadagita nga agkakapateg a saludsod? Imbes a pagarup wenno pilosopia ti ipaayna, dagiti sumaganad a panid ket aglaon kadagiti sungbat a masarakan iti Biblia a Sao ti Dios. Awisendaka a mangukrad iti Bibliam ket ammuem a mismo ti ibagbagana.