Ania ti Panggep ti Biag?

APAY A NAPATEG A SAPULEN TI SUNGBAT? Awan ngatan ti ad-adda pay a pakaupayan ti maysa a tao ngem iti panangpampanunot nga awan ti kaipapanan wenno panggep ti biag. Iti sabali a bangir, naan-andur ken nabibiit a mangabaruanan ti maysa a tao no isu ket addaan iti nalawag a panggep iti biag. Kastoy ti insurat ni Viktor E. Frankl, maysa a neurologo ken maysa met kadagiti nakalasat iti Holocaust: “Maituredko nga ibaga nga awanen ti aniaman ditoy lubong nga epektibo unay a tumulong iti maysa a tao a makalasat uray kadagiti karirigatan a kasasaad, no di ti pannakaammo nga adda panggep ti biagna.”

Nupay kasta, nagadu ti agsusupadi a kapanunotan maipapan iti dayta. Adu kadatayo ti mamati a datayo a mismo ti mangikeddeng no ania ti panggeptayo iti biag. Maisupadi iti dayta, isursuro ti dadduma a mamati iti ebolusion nga awan ti manayon a panggep ti biag.

Ngem kinapudnona, ti kasayaatan a lohikal a pamay-an tapno maammuantayo ti panggep ti biag ket ti panangammo iti kapanunotan ni Jehova a Dios, daydiay nangted iti biagtayo. Usigem ti ibagbaga ti Saona maipapan iti dayta a banag.

Ti Isursuro ti Biblia

Isursuro ti Biblia a ni Jehova a Dios ket adda espesipiko a panggepna iti lalaki ken babai idi pinarsuana ida. Intedna iti immuna a nagannaktayo ti sumaganad a bilin.

Genesis 1:28. “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.”

Panggep ti Dios a ti intero a daga ket aramiden da Adan ken Eva ken dagiti annakda a paraiso. Saanna a pinanggep a lumakay ken matay dagiti tattao ket saanna met a kayat a ti daga ket dadaelen dagiti tattao. Nupay kasta, gapu iti di umiso a pangngeddeng nga inaramid dagiti immuna a nagannaktayo, natawidtayo ti basol ken ipapatay. (Genesis 3:2-6; Roma 5:12) Kaskasdi a saan a nagbalbaliw ti panggep ni Jehova. Ti daga ket asidegen nga agbalin a paraiso.​—Isaias 55:10, 11.

Pinarsuanatayo ni Jehova nga addaan iti pigsa ken panunot a mangibanag iti panggepna. Saannatayo a pinarsua tapno agbiagtayo nga agbukbukod. Kitaem no kasano a nailawlawag kadagiti sumaganad a teksto iti Biblia ti panggep ti Dios.

Eclesiastes 12:13. “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”

Mikias 6:8. “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?”

Mateo 22:37-39. “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’”

No Kasano a ti Sungbat ti Biblia ket Makaipaay iti Napaypayso a Talna ti Panunot

No kayattayo a paandaren ti aniaman a komplikado a makina, masapul nga usarentay dayta iti nakairantaanna ken iti pamay-an a pinanggep ti nangaramid. Umasping iti dayta, tapno ditay madangran ti mismo a bagitayo​—iti man naespirituan, mental, emosional, wenno pisikal​—rumbeng nga usarentayo ti biagtayo maitunos iti panggep ti Namarsua kadatayo. Usigem no kasano a ti panangammotayo iti panggep ti Dios ket mangyeg iti talna ti panunot kadagiti aspeto ti biag a nadakamat iti baba.

Iti panangikeddengda kadagiti prioridadda, adu ita ti mangbusbusbos iti amin a panawenda iti panagpabaknang. Ngem mamakdaar ti Biblia a “dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay.”​—1 Timoteo 6:9, 10.

Iti sabali a bangir, dagidiay nasursurodan nga ayaten ti Dios imbes a ti kuarta, maammuanda ti sekreto ti pannakapnek. (1 Timoteo 6:7, 8) Maapresiarda ti kinapateg ti panagbannog ken ammoda nga obligasionda a suportaran ti bagbagida. (Efeso 4:28) Ngem ipappapusoda met daytoy a pakdaar ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.”​—Mateo 6:24.

No kasta, imbes nga ipangpangrunada ti agpabaknang, dagidiay agay-ayat iti Dios ipangpangrunada ti panangaramid iti pagayatanna. Ammoda a no dayta ti kapatgan iti biagda, ipaay ni Jehova a Dios dagiti kasapulanda. Kinapudnona, ibilang ni Jehova nga obligasionna dayta kadakuada.​—Mateo 6:25-33.

Iti pannakilangenda, adu ti mangyun-una iti bagida. Awan ti talna iti lubong ita. Ti kangrunaan a makagapu ket nagadu a tattao ti nagbalin a ‘managayat iti bagbagida’ ken awananda iti ‘nainkasigudan a panagayat.’ (2 Timoteo 3:2, 3) No saan a mapagustuan ti kayatda wenno adda mangkontra iti kapanunotanda, dagusda nga ‘agunget, agpungtot, agriaw, ken agsao iti dakes.’ (Efeso 4:31) Ti kasta a dida panagteppel ket ad-adda a ‘manggutugot iti rinnupir’ imbes a mangyeg iti talna iti panunot.​—Proverbio 15:18.

Nupay kasta, dagidiay agtultulnog iti bilin ti Dios nga ayatenda ti kaarrubada a kas iti bagbagida ket ‘manangngaasi iti maysa ken maysa, nadungngo a mannakipagrikna ken sibubulos a pakawanenda ti maysa ken maysa.’ (Efeso 4:32; Colosas 3:13) Uray no nasaem ti panangtrato kadakuada ti sabsabali, ikagkagumaanda a tuladen ni Jesus, nga idi narabrabngis, “saanna a sinubadan iti panangrabngis.” (1 Pedro 2:23) Kas ken Jesus, ammoda a ti mangyeg iti pudno a pannakapnek ket isu ti panagserbi iti sabsabali, uray kadagidiay saan a managyaman. (Mateo 20:25-28; Juan 13:14, 15; Aramid 20:35) Ipapaay ni Jehova a Dios ti espirituna kadagidiay mangtultulad iti Anakna, ket dayta nga espiritu ti mangpataud iti pudpudno a talna iti biagda.​—Galacia 5:22.

Ngem kasano a ti panangmatmatmo iti masanguanan apektaranna ti talna ti panunotmo?

[Blurb iti panid 6]

Ti maysa a tao ket nasken nga addaan iti nalawag a panggep iti biag

[Ladawan iti panid 7]

Insuro ni Jesus kadatayo no kasano ti maaddaan iti talna ti panunot