Panagibangon a Pakaidayawan ni Jehova
“Kasla di nakappapati. Diak pulos impagarup a maaddaankami iti kastoy a nagpintas a paggigimongan ken pagdayawan kenni Jehova. Di magatadan ti rag-o a marikriknak!”—MARIA, MEXICO.
DAGITI SAKSI NI JEHOVA kaay-ayoda ti aggigimong tapno agadal iti Sao ti Dios, ti Biblia. (Salmo 27:4; Hebreo 10:23-25) Ken ad-adda a maragsakanda nga aggigimong kadagiti maitutop a lugar a pagdayawan. Kadagiti nabiit pay a tawen, nakaibangondan kadagiti rinibu a baro a pasdek a pagdayawan—a maaw-awagan iti Kingdom Hall—iti adu a pagilian iti intero a lubong.
Apay nga agibangbangonda? Siasino dagiti agibangbangon? Ken ania ti epektona kadagiti tattao a nakipaset iti panagibangon? Tapno masungbatan dagitoy a saludsod, usigenyo ti mapaspasamak idiay Mexico ken Belize.
Kasapulan ti Rinibu a Baro a Kingdom Hall!
Idi napalabas, aggigimong dagiti Saksi ni Jehova idiay Mexico iti aniaman a lugar a magun-odanda—iti likudan dagiti balay, pagtaengan dagiti Saksi, kamarin, garahe, wenno naabangan a pasdek. Kadagidi a tiempo, masansan nga ar-arapaapen dagitoy a nasungdo a Saksi a maaddaanda iti bukodda a Kingdom Hall.
Idi 1994, addan 338,000 a Saksi idiay Mexico. Sigun iti maysa a surbey a naaramid iti dayta a tawen, 3,300 a baro a Kingdom Hall ti kasapulan a maibangon tapno maaddaanda amin iti bukodda a pasdek a pagdayawan. Anian a nagdakkel a trabaho!
Ikagkagumaan idin dagiti lokal a kongregasion ti agibangon iti bukodda a Kingdom Hall. Ngem iti simmaganad a lima a tawen, nabatad a kasapulan ti ad-adu ken naparpartak a maibangon a Kingdom Hall. Kasano a naibanag daytoy a pakasapulan?
Dagiti Agdaldaliasat a Nasigo a Boluntario
Idi 1999, adda nairugi a baro a programa a panagibangon. Nangrugi a nabuangay dagiti Kingdom Hall Construction Group iti intero a Mexico. Iti intero a pagilian, adu kadagiti Saksi ni Jehova a nasigo nga agibangon ti nagboluntario a makipaset iti daytoy naragsak a programa. Ita, adda 35 a kasta a grupo iti Mexico; ken maysa a grupo ti nabuangay idiay Belize.
Dagitoy a Kingdom Hall Construction Group ket gagangay a buklen ti agarup walo a boluntario a lallaki ken babbai, nga agtrabaho iti amin-tiempo nga awanan sueldo. Daytoy a naragsak a grupo umakarda iti nadumaduma a lugar iti intero a pagilian tapno idauluanda dagiti proyekto ti panagibangon. Agtrabahoda iti walo nga oras iti inaldaw manipud Lunes agingga iti Biernes ken kada maikadua a Sabado. Kada aldaw, mapagsasaritaan ti maysa a teksto iti Biblia iti 7:00 t.b., ket kalpasanna, maidasar ti pammigat. Magagaran ti amin a mangaramid iti aniaman a makiddaw a trabahuenda. Kas pagarigan, dagiti babbai agtrabahoda a kadua dagiti lallaki kadagiti trabaho a kas iti panagpalitada, panagbaldosa, ken panagpintura.
Tumulong ti lokal a kongregasion babaen ti panangpadagus, panaglaba, ken panagluto para kadagiti agdaldaliasat a grupo. Malaksid iti panagtrabaho a sangsangkamaysa iti panagibangon, dagiti boluntario ken dagiti lokal a Saksi maragsakanda nga agkakadua kadagiti Nakristianuan a gimong ken iti panangasaba.
Dagiti Gunggona ti Panagboluntario
Ania ti makuna dagitoy a boluntario iti trabahoda? “Agpayso nga agtrabahokami uray napudot ken nalamiis ti tiempo, mangankami kadagiti saanmi a nakairuaman a taraon, kanayonkami nga umakar, adayokami iti pamiliami, ken masansan nga awanankami kadagiti moderno a pagnam-ayan,” kuna ni Daniel, a nasurok a tallo a tawenen a boluntario. “Ngem awan ti pakaimudingan dagiti pakarigatan no idilig kadagiti bendision nga aw-awatenmi,” kinunana pay.
Ania ti dadduma kadagita a bendision? Adu a boluntario ti nakasursuro kadagiti kabbaro a paglaingan iti panagibangon. Ngem maysa a boluntario nga agnagan iti Carlos, a mangimatmaton iti maysa a dakdakkel a grupo, imbagana ti napatpateg pay a nagunggonana. “Nagbalinkami a kasla pamilia nga addaan iti 20 a miembro,” kinunana. “Aggigiddankami a mangan, agtrabaho, agadal, ken agkararag. Nakasingsinged ti panaggagayyemmi.”
Dagiti grupo nga agibangbangon naaddaanda met kadagiti nasinged a gagayyem kadagiti lokal a kongregasion a tultulonganda. Kinuna ni José a nakipaseten iti nasurok a 100 a proyekto a panagibangon: “Makapabileg a makita dagiti lua ken isem ti rag-o ken panangapresiar dagiti lokal a Saksi no makitada a pimmayso ti arapaapda a maaddaan iti baro a Kingdom Hall.” Kinunana pay: “Maragsakankami a makaammo a napabileg ti pammati ti sabsabali uray iti bassit laeng a naitulongmi iti naballigi a pannakaibangon ti maysa a balay nga agpaay iti nasin-aw a panagdayaw.”
Nakaskasdaaw a Naaramidan!
Dagitoy a lugar a pagdayawan saanda a nalabor wenno naparammag. Simple laeng ti disenio dagiti Kingdom Hall, isu a napartak a maibangon ken saan a nangina. No mabalin, mausar dagiti materiales ken pamay-an ti panagbangon a gagangay iti lugar. Iti kasta, mairingpas ti panagibangon iti baro a pasdek iti innem a lawas!
Idi 2007, amin dagiti 17 a kongregasion idiay Belize addaandan iti baro a Kingdom Hall. Idiay Mexico, nasuroken a 1,400 ti naibangon sipud idi 1999!
Nupay adun ti nairingpas a trabaho, adu pay dagiti maaramid. (Mateo 9:37) Dagiti Saksi idiay Mexico immadun ti bilangda agingga iti nasurok nga 600,000. Aggigimong amin dagitoy iti mamitlo iti makalawas tapno agsursuro manipud iti Sao ti Dios. No kasta, dandani 2,000 pay a baro a pasdek ti kasapulan. No daytoy a trabaho a boluntario a panagibangon agpannuray laeng iti panangikagumaan ti tao, mabalin nga imposible a mairingpas ti kasta a kalat. Ngem kas ipakita dagiti resulta, babaen ti tulong ni Jehova a Dios, “amin a bambanag mabalin.”—Mateo 19:26.
[Kahon/Ladawan iti panid 22]
“Tungpalenda ti Saoda”
Saan laeng a dagiti Saksi ni Jehova iti lokal a kongregasion ti magunggonaan iti trabaho a panagibangon kadagiti Kingdom Hall. Kas pagarigan, bayat ti pannakaibangon ti Kingdom Hall idiay Belize, maysa a lalaki a Pentecostal ti asawana ti nangibaga ken baketna nga inton malpas dagiti Saksi ni Jehova ti “kapiliada,” kayatna ti tumabuno kadagiti gimongda. Ania ti nakagutugot kenkuana? “Makitak nga adda kadakuada ti Dios,” kinunana. “Saanda nga agaapa no agtrabahoda. Ken tungpalenda ti saoda.”
[Ladawan]
Kingdom Hall idiay Orange Walk,Belize
[Kahon/Dagiti Ladawan iti panid 23]
Sangalubongan a Trabaho
Nabuangay ti adu a Kingdom Hall Construction Group iti 120 a pagilian. Nailista iti baba ti sumagmamano kadagiti pagilian a sadiay ket siraragsak dagiti boluntario a Saksi a mangus-usar iti pigsa ken laingda iti daytoy a trabaho:
Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.
[Dagiti Ladawan]
Kingdom Hall idiay Acapulco, Mexico
Dagiti miembro ti Kingdom Hall Construction Group idiay Mexico
[Ladawan iti panid 23]
Kingdom Hall idiay Tlaxcala, Mexico