Umadanika iti Dios
Adda Kadi Makaisina iti Ayat ti Dios Kadatayo?
SIASINO kadatayo ti di agkasapulan iti ayat? Kinapudnona, rumang-aytayo no mariknatayo nga ay-ayatendatayo ti pamilia ken gagayyemtayo. Ngem makapaladingit ta mabalin a naglaka a madadael wenno agbalbaliw dagiti relasion ti tattao. Mabalin a pasakitan, baybay-an, wenno laksidendatayo pay ketdi dagiti ipatpategtayo. Ngem adda persona a di pulos agbalbaliw ti ayatna. Isu dayta ni Jehova a Dios. Ti ayatna kadagiti agdaydayaw kenkuana ket nagsayaat ti pannakadeskribirna iti Roma 8:38, 39.
“Kombinsidoak,” kinuna ni apostol Pablo. Kombinsido iti ania? Nga awan ti ‘makaisina iti ayat ti Dios’ kadatayo. Ti tuktukoyen ni Pablo ket saan laeng a ti bagina no di ket ‘datayo’—ti amin a sisusungdo nga agserserbi iti Dios. Tapno maipaganetgetna dayta a punto, nangilista ni Pablo iti sumagmamano a banag a di makalapped iti panangipakita ni Jehova iti ayatna kadagiti dedikado nga adipenna.
“Ti ipapatay wenno ti biag.” Uray no matay dagiti adipenna, saan nga agpatingga ti panagayat ni Jehova kadakuada. Kas pammaneknek nga ay-ayatenna dagiti natayen nga adipenna, intalimengna ida iti lagipna, ket pagungarennanto ida iti nalinteg a baro a lubongna iti masanguanan. (Juan 5:28, 29; Apocalipsis 21:3, 4) Kanayonanna, saan nga agbalbaliw ti panagayat ti Dios kadagiti nasungdo nga agdaydayaw kenkuana aniaman ti “biag” wenno mapaspasaranda iti daytoy sistema ti bambanag.
“Dagiti anghel wenno dagiti gobierno.” Mabalin a naglaka a maibuyog dagiti tattao iti impluensia dagiti nabileg a tattao wenno agtuturay, ngem saan a kasta ni Jehova. Dagiti mannakabalin nga espiritu a parsua, kas iti anghel a nagbalin a Satanas, dida naallukoy ti Dios tapno isardengnan nga ipakita ti ayatna kadagiti agdaydayaw Kenkuana. (Apocalipsis 12:10) Uray dagiti gobierno, a mabalin a bumusor kadagiti pudno a Kristiano, dida mabalbaliwan ti panangmatmat ti Dios kadagiti adipenna.—1 Corinto 4:13.
“Ti bambanag nga addan wenno ti bambanag nga umayto.” Saan nga agkupas ti ayat ti Dios iti panaglabas ti tiempo. Awan ti aniaman a pasamak a dumteng kadagiti adipenna iti agdama wenno iti masanguanan a mabalin a manglapped iti panangipakitana iti ayatna kadakuada.
“Dagiti pannakabalin.” Tinukoy ni Pablo dagiti puersa idiay langit ken ditoy daga—“dagiti anghel” ken “dagiti gobierno”—ngem ita dinakamatna “dagiti pannakabalin.” Adu ti kayat a sawen ti Griego a sao a nausar ditoy. Aniaman ti eksakto a kaipapananna, maysa a banag ti sigurado: Awan ti pannakabalin idiay langit wenno ditoy daga a makalapped iti panangipakita ni Jehova iti ayatna kadagiti adipenna.
“Ti kangato wenno ti kauneg.” Ay-ayaten ni Jehova dagiti adipenna kasanoman ti kakaro ti mapaspasaranda.
“Ti aniaman a sabali pay a parsua.” Babaen ti panangibaga ni apostol Pablo kadagita a sasao a mangsaklaw iti amin a banag, impasiguradona nga awan ti makaisina iti ayat ti Dios kadagiti nasungdo nga agdaydayaw Kenkuana.
Saan a kas iti ayat ti maysa a tao, a mabalin nga agbalbaliw wenno agkupas, agnanayon ken di maisin ti ayat ti Dios kadagidiay agtultuloy nga agpannuray kenkuana buyogen ti pammati. No sipapanunottayo iti dayta, sigurado a matignaytayo nga ad-adda nga umadani ken Jehova ken mangaramid iti amin a kabaelantayo a mangpaneknek iti panagayattayo kenkuana.