Ti Akem ni Maria iti Panggep ti Dios
BAYAT ti ministerio ni Jesus, maysa a babai manipud iti naariwawa a bunggoy ti nangipukkaw: “Naragsak ti aanakan a nangawit kenka ken dagiti suso a sinusuam!” No talaga a kayat ni Jesus a maidaydayaw ti inana, inaprobetsarna koman dayta a nagsayaat a gundaway. Ngem imbes nga inaramidna ti kasta, kinunana: “Saan, imbes ketdi, Naragsak dagidiay dumdumngeg iti sao ti Dios ken mangsalsalimetmet iti dayta!”—Lucas 11:27, 28.
Saan nga impaayan ni Jesus iti naisangsangayan a pammadayaw ti inana; ken dina met imbilin kadagiti pasurotna nga aramidenda ti kasta. Ania ngarud ti makunayo kadagidiay sipapasnek nga agdaydayaw ken Maria? Usigentayo no ania ti kuna ti Nasantuan a Kasuratan iti sumagmamano a nasaknap a sursuro maipapan iti ina ni Jesus.
“Napnoka iti Grasia,” “Benditoka Kadagiti Babbai”
Impakaammo ni anghel Gabriel no ania ti agbalin nga akem ni Maria iti panggep ti Dios. Iti dayta a gundaway, kinablaawanna: “Naimbag nga aldawmo, maysa a naparaburan unay, ni Jehova adda kenka.” (Lucas 1:28) Kastoy ti kuna ti sabali a patarus ti Biblia: “Ave Maria, napnoka iti grasia, ni Apo Dios ti adda kenka.” Di nagbayag kalpasanna, ni Elisabet kinablaawanna ni Maria: “Benditoka kadagiti babbai, ket bendito ti bunga ti aanakam!” (Lucas 1:42) Ipakita kadi dagitoy a sasao a maikari ni Maria a pagdayawan?
Kinapudnona, saan. Nupay dagiti Katoliko inramanda dagitoy a sasao iti kararagda ken Maria, saan nga ibaga ti Biblia nga agkararagtayo kenkuana. Agpada a binigbig ni anghel Gabriel ken ni Elisabet ti naisangsangayan a pribilehio ni Maria kas daydiay mangipasngay iti Mesias, ngem saan a pulos nga ibaga ti Kasuratan nga isu ti pagkararagan. Iti kasumbangirna, idi kiniddaw dagiti adalan ni Jesus nga isurona no kasanoda nga agkararag, impamatmat ni Jesus a masapul a maiturong ti kararagda iti Amana. Kinapudnona, ti nalatak a pagtuladan a kararag nga insuro ni Jesus ket mangrugi kadagitoy a sasao: “Amami nga adda iti langlangit.”—Mateo 6:9.
Maysa Kadagiti Makipagturay
Ti sabali pay a nasaknap a sursuro maipapan ken Maria ket isu itan “ti Reyna ti langit.” Saan a pulos nga inawagan ti Biblia iti kasta a titulo. Ngem ipakita ti Kasuratan nga adda naisangsangayan nga akemna iti nailangitan nga urnos ti Dios. Ania dayta nga akem?
Impamatmat ni Jesus a dadduma kadagiti matalek nga adalanna ti makipagturay kenkuana iti Pagarianna. (Lucas 22:28-30) Ipaayan ni Jesus iti autoridad dagidiay napili tapno agserbida kas “papadi iti Diostayo, ket agturayda a kas ar-ari iti daga.” (Apocalipsis 5:10) Matulongannatayo ti Biblia tapno silalawag a matarusantayo a karaman ni Maria kadagidiay naparaburan iti daytoy a natan-ok a pribilehio. Apay a maibagatayo ti kasta?
Malagipyo pay a kalpasan ti ipapatay ni Jesus, ni Maria ket ‘nagtultuloy a nakipagkararag’ kadagiti adalan ken kakabsat ni Jesus. Agarup 120 ti nagtataripnong maipaay iti dayta a panggep, a pakairamanan ti “sumagmamano a babbai.” (Aramid 1:12-15) Bayat ti “panagtultuloy ti aldaw ti piesta ti Pentecostes,” kuna ti Biblia, “addada amin idi a sangsangkamaysa iti maymaysa a lugar” idi naiparukpok kadakuada ti nasantuan nga espiritu ti Dios, a nangted kadakuada iti abilidad a makapagsao kadagiti ganggannaet a lenguahe.—Aramid 2:1-4.
Gapu ta maysa ni Maria kadagiti naparaburan iti nasantuan nga espiritu, isu ken dagiti dadduma pay a babbai ti napili nga agbalin a paset ti nailangitan a Pagarian ni Jesus. Ngarud, adda rasontayo a mamati a makipagturturay itan ni Maria iti nailangitan a trono ni Jesus. (Roma 8:14-17) Usigenyo ti dadduma kadagiti pribilehio a tagiragsakenna ken ti dadduma pay a makipagturay ken Jesus iti pannakatungpal dagiti panggep ti Dios.
Panangiburay Kadagiti Agkakaimbag a Bendision
Sigun iti libro ti Biblia nga Apocalipsis, adda 144,000 nga indibidual a mapagungarto iti nailangitan a kinadayag tapno makipagserbi ken Jesus kas papadi, uk-ukom, ken ar-ari. (Apocalipsis 14:1, 4; 20:4, 6) Kas papadi, makiramanda iti panangipakat kadagiti gunggona nga itden ti daton ni Jesus agpaay kadagiti amin a natulnog a tattao tapno agbalinda a perpekto iti espiritual, moral, ken pisikal. (Apocalipsis 21:1-4) Anian a pribilehio para kadagiti amin a matalek nga agdaydayaw ken Jehova inton matagiragsakda dayta a nagsayaat a tiempo!a
Agtultuloy nga adda paset ni Maria iti pannakaibanag dagiti panggep ni Jehova. Maikari a tuladentayo gapu iti kinapakumbaba, pammati, kinatulnog, ken kinasayaatna nga ina, malaksid pay iti kinaandurna iti sidong dagiti pakasuotan. Maikari met iti dakkel a panagraem gapu iti panangipasngayna iti Mesias ken iti pasetna iti pannakaiburay dagiti agnanayon a bendision iti sangatauan.
Ngem ti kangrunaan a maadaltayo maipapan ken Maria ket awan ti sabali a Dios a nagdayawanna malaksid ken Jehova, kas inaramid met dagiti amin a matalek nga adipen ti Dios. Ni Maria, agraman dagiti makipagturay ken Kristo idiay langit, indir-ina: “Iti Daydiay situtugaw iti trono [ni Jehova a Dios] ken iti Kordero [ni Jesu-Kristo] maadda koma ti bendision ken ti dayaw ken ti dayag ken ti pannakabalin iti agnanayon ken awan inggana.”—Apocalipsis 5:13; 19:10.
[Footnote]
a Para iti kanayonan nga impormasion maipapan kadagitoy a bendision, kitaenyo ti kapitulo 8 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.
[Blurb iti panid 10]
Maikari a tuladen ti kinapakumbaba, pammati, ken kinatulnog ni Maria