Talaga Kadi a Maysa a Persona ti Dios?

Dagiti gagangay a sungbat:

◼ “Isu ket adda iti sadinoman ken iti amin a banag. Isu ket kas iti angin.”

◼ “Isu ket saan a pudno a persona no di ket maysa nga intelihente wenno mannakabalin a puersa.”

Ania ti insuro ni Jesus?

◼ “Idiay balay ni Amak adu ti pagyanan.” (Juan 14:2) Kinuna ni Jesus nga adda piguratibo a balay, wenno pagnaedan ti Dios.

◼ “Naggapuak iti Ama ket immayak iti lubong. Kanayonanna, panawak ti lubong ket mapanak iti Ama.” (Juan 16:28) Patien ni Jesus a ti Dios ket maysa a pudno a Persona ken adda espesipiko a taengna.

DI PULOS imbaga ni Jesus a ti Dios ket maysa laeng a mannakabalin a puersa. Imbes ketdi, isu ket nakisarita ken nagkararag iti Dios. Masansan nga awaganna ni Jehova kas ti nailangitan nga Amana, maysa nga awag a mangipakita iti kinasingedna iti Dios.​—Juan 8:19, 38, 54.

Pudno nga “awan ti tao a nakakita iti Dios uray kaano” ken “ti Dios maysa nga Espiritu.” (Juan 1:18; 4:24) Ngem dina kayat a sawen nga awan ti bagina. Ibaga kadatayo ti Biblia: “No adda pisikal a bagi, adda met naespirituan.” (1 Corinto 15:44) No kasta, adda kadi naespirituan a bagi ni Jehova?

Wen. Idi napagungar ni Jesus, isu ket “simrek . . . idiay langit a mismo, tapno agparang ita iti sanguanan a mismo ti Dios maipaay kadatayo.” (Hebreo 9:24) Adda dua a napateg a banag maipapan iti Dios a maadaltayo iti daytoy. Umuna, adda pagnanaedanna. Maikadua, isu ket maysa a Persona, imbes a maysa a di mailadawan a puersa nga adda iti sadinoman.

Kasano ngarud a makontrol ti Dios ti amin a bambanag? Kabaelanna nga ibaon ti nasantuan nga espirituna, wenno ti agtigtignay a pannakabalinna, iti aniaman a paset ti uniberso. No kasano a ti maysa a planta ti enerhia a naipasdek iti maysa a lokasion masuplayanna iti koriente ti adu a lugar, ti Dios usarenna ti nasantuan nga espirituna a mangitungpal iti panggepna iti sadinoman.​—Salmo 104:30; 139:7.

Gapu ta ti Dios ket maysa a Persona, adda met ngarud personalidadna, adda bambanag a kayatna ken dina kayat, ken adda pay riknana. Ibaga ti Biblia nga ay-ayatenna dagiti adipenna, pagrag-oanna dagiti gapuananna, kagurana ti idolatria, ken masaktan gapu kadagiti kinadakes. (Genesis 6:6; Deuteronomio 16:22; 1 Ar-ari 10:9; Salmo 104:31) Iti 1 Timoteo 1:11, isu ket natukoy kas “ti naragsak a Dios.” Saan a pakasdaawan a kinuna ni Jesus a mabalintayo nga ayaten daytoy a Dios iti amin a pusotayo!​—Marcos 12:30.a

[Footnote]