Nakadanon Dagiti Bukel ti Kinapudno iti Nasulinek a Luglugar
TI Tuva Republic idiay Russia ket masarakan iti kaabagatanan a paset ti Siberia, a Mongolia ti adda iti abagatan ken dayana. Adu nga umili ti Tuva ti agnanaed kadagiti nasulinek a lugar a narigat a pangikasabaan iti mensahe ti Pagarian. Ngem iti nabiit pay, adda grupo dagiti tattao a naggapu kadagiti adayo a paset ti Tuva a napan iti kabeserana a Kyzyl tapno makiseminar. Naammuan dayta ni Maria a maysa kadagiti payunir idiay Kyzyl. Napanunotna a nagsayaat dayta a gundaway tapno maikasaba kadakuada ti naimbag a damag.
Kastoy ti insalaysay ni Maria: “Ti eskuelaan a pagisursuruak ket nangyurnos iti seminar maipapan iti panangtaming kadagiti problema a nainaig iti pannakaadikto iti arak, droga, ken dadduma pay a substansia. Agarup 50 kadagiti dumar-ay ket aggapu kadagiti kasulinekan a lugar ti Tuva. Karaman kadagita dagiti mannursuro, sikologo, mangas-asikaso iti pagimbagan dagiti ubbing, ken dadduma pay.” Para ken Maria, dayta ket nagsayaat a gundaway ngem adda met rigrigatna. Inlawlawagna: “Managbabainak ken marigatanak a mangasaba iti di pormal. Ngem inkararagko ken Jehova a paturedennak tapno bumileg ti pakinakemko ken mausarko daytoy a gundaway a mangasaba.” Nagballigi kadi?
Intuloy a kinuna ni Maria: “Nakasarakak iti magasin nga Agriingkayo! a nangisalaysay iti suheto maipapan kadagiti phobia. Napanunotko a nalabit magustuan daytoy ti sikologo, isu nga intugotko dayta idiay eskuelaan. Iti dayta nga aldaw, maysa kadagiti mannursuro ti immay iti opisinak ket intedko kenkuana ti magasin. Maay-ayatan nga immawat iti dayta. Imbagana nga isu a mismo ket addaan iti phobia. Kabigatanna, intugotak iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 1. Naragsakan manen nga immawat iti dayta. Gapu iti nagsayaat a reaksionna, napanunotko a nalabit interesado met ti dadduma a mannursuro iti dayta a libro. Nangitugotak ngarud idiay eskuelaan iti sangakarton a libro nga Iyimtuod ti Agtutubo ken dadduma pay a publikasion.” Apagbiit a naibus ti nagyan ti karton. Inestoria ni Maria ti napasamak: “Immay iti opisinak ti sumagmamano a mannursuro a kadua ti inikkak iti libro ket dinamagda no ayan ti agiwarwaras kadagiti libro.” Napanda iti umiso a lugar!
Sabado ti maudi nga aldaw ti seminar. Saan nga agtrabaho ni Maria iti dayta nga aldaw isu a nangikabil kadagiti literatura iti rabaw ti sumagmamano a lamisaan iti opisinana sana insurat iti pisara: “Patgek a Mannursuro! Mabalinyo ti mangala kadagiti literatura para kadakayo ken kadagiti gagayyemyo. Dagitoy a nagsayaat a publikasion ket makatulong kadakayo nga agballigi iti trabahoyo ken mangparagsak iti pamiliayo.” Ania ti nagbanaganna? “Dimmaw-asak iti opisinak iti dayta nga aldaw ket nakitak a bassit ti nabatin a literatura. Dagus a napanak nangala kadagiti kanayonan a libro ken magasin.” Idi agleppas ti seminar, nakaipaiman ni Maria iti 380 a magasin, 173 a libro, ken 34 a broshur. Inyawid dagiti nakiseminar dagiti nagun-odanda a literatura idi nagsublida kadagiti nasulinek a luglugar a pagnanaedan ken pagtartrabahuanda. Kuna ni Maria, “Maragsakanak unay ta dagiti bukel ti kinapudno ket nakadanonen kadagiti kasulinekan a paspaset ti Tuva!”—Ecl. 11:6.
[Mapa iti panid 32]
(Para iti aktual a pannakaurnosna, kitaem ti publikasion)
RUSSIA
TUVA REPUBLIC