Adda Kadi Pribilehiom Idi? Mabalinmo Kadi Manen ti Agserbi?

ADDA kadi pribilehiom idi iti kongregasion Kristiano? Nalabit a maysaka idi a ministerial nga adipen wenno panglakayen. Mabalin nga agserserbika idi kas amin-tiempo a ministro. Awan duadua a maragsakanka ken mapnekka iti annongem, ngem gapu iti sumagmamano a rason, napukawmo ti pribilehiom.

Mabalin a sika a mismo ti nangilusulos iti dayta gapu iti kinalakay, panangaywan iti pamilia, wenno panagkapuy ti salun-atmo. Ngem saan a pammaneknek dayta a napaayka. (1 Tim. 5:8) Idi umuna a siglo, nagserbi ni Felipe kas misionero, ngem nagindeg idiay Cesarea idi agangay gapu iti panangasikasona iti pamiliana. (Ara. 21:8, 9) Idi limmakay ni Ari David, inyurnosna ti panangsukat kenkuana ti anakna a ni Solomon kas ari iti Israel. (1 Ar. 1:1, 32-35) Kaskasdi, agpada nga impateg ken inapresiar ni Jehova da Felipe ken David ken mararaemda agingga ita.

Ngem iti sabali a bangir, mabalin nga inikkatdaka iti pribilehiom. Gapu kadi dayta iti saan a nasayaat a kondukta? Wenno gapu kadagiti parikut iti pamilia? (1 Tim. 3:2, 4, 10, 12) Nalabit impapanmo a saan a nainkalintegan ti pannakaikkatmo, ken nasakit ti nakemmo agingga ita.

Mabalinmo Manen ti Rumagpat iti Pribilehio

Saan kadin a mabalin nga isubli ti dati a pribilehiom? Kaaduanna a mabalin pay. Ngem tapno makapagserbika manen, masapul a desididoka a mangragpat iti dayta. (1 Tim. 3:1) Ngem apay a kayatmo ti rumagpat manen? Maigapu iti isu met laeng a rason nga indedikarmo ti biagmo iti Dios​—ti panagayatmo kenni Jehova ken kadagidiay agserserbi kenkuana. No sidadaanka a mangipakita iti dayta nga ayat babaen ti panagserbim manen, mabalin nga usaren ni Jehova dagiti kapadasam sakbay ken kalpasan a napukawmo ti pribilehiom.

Lagipem ti pammatalged nga impaay ni Jehova iti Israel kalpasan a napukaw dayta a nasion ti naisangsangayan a takderna. Kuna ti Saona: “Siak ni Jehova; saanak a nagbaliw. Ket annaknakayo ni Jacob; saankayo a nagpatingga.” (Mal. 3:6) Ay-ayaten ni Jehova dagiti Israelita ken kayatna pay nga usaren ida. Umasping iti dayta, interesado ni Jehova a mangusar kenka iti masanguanan. Ania ngarud ti mabalinmo nga aramiden iti agdama? Ti panangragpat iti teokratiko a pribilehio ket ad-adda nga agpannuray iti espiritualidadmo imbes nga iti naikasigudan nga abilidadmo. Gapuna, bayat nga awananka pay kadagiti kanayonan nga annongen iti kongregasion, ipamaysam a pabilgem ti espiritualidadmo.

Tapno ‘bumileg’ ti pammatim, masapul a ‘birokem ni Jehova ken ti pigsana.’ (1 Cor. 16:13; Sal. 105:4) Ti maysa a pamay-an tapno maaramidmo dayta ket babaen ti naimpusuan a panagkararag. No iyumanmo ken Jehova ti kasasaadmo, iyebkasmo ti riknam kenkuana ken agkiddawka iti espirituna. No aramidem dayta, ad-adda a sumingedka kenni Jehova ken bumileg ti pammatim. (Sal. 62:8; Fil. 4:6, 13) Mapabileg met ti espiritualidadmo no pasayaatem ti panagadalmo iti Sao ti Dios. Bayat a basbassit ti responsabilidadmo iti agdama, ad-adu ti panawenmo iti personal a panagadalmo ken iti panagadalyo kas pamilia. Nalabit nga isublim ti sigud a rutinam a narigat a taginayonen.

Siempre, maysaka pay laeng a Saksi ni Jehova. (Isa. 43:10-12) Dayta ti kasayaatan a pribilehio a matagiragsak ti asinoman kadatayo, ti panagbalin a ‘katrabahuan ti Dios.’ (1 Cor. 3:9) Ti ad-adu a tiempo a pannakipaset iti ministerio ket nagsayaat a pamay-an tapno maparayray ti relasionmo kenni Jehova ken kadagiti kakaduam iti ministerio.

Panangparmek iti Pannakaupay

Mabalin a mabain wenno maldaanganka no mapukawmo ti maysa a pribilehiom iti uneg ti kongregasion. Mabalin nga ikalintegam ti bagim. Ngem kasanon no kalpasan a mangngeg dagiti nadutokan a lallaki ti dasigmo ket kaskasdi a mariknada a masapul nga ilusulosmo ti pribilehiom? Mabalin nga agsakit ti nakemmo, a manglapped kenka a rumagpat manen iti pribilehio wenno makasursuro iti dayta a kapadasan. Usigentayo no kasano a ti kapadasan da Job, Manases, ken Jose ket makatulong a mangparmek iti sakit ti nakem.

Nagserbi idi ni Job kas pannakabagi dagiti sabsabali iti imatang ni Jehova ken kas panglakayen ken ukom iti kagimongan dagiti patriarka. (Job 1:5; 29:7-17, 21-25) Kalpasanna, dimteng ti tiempo a napukawna ti kinabaknangna, natay dagiti annakna, ken nagsakit. Napukawna pay ti nasayaat a takderna iti imatang dagiti sabsabali. “Kinatawaandak,” kinuna ni Job, “dagidiay ub-ubing iti al-aldaw ngem siak.”​—Job 30:1.

Ammo ni Job nga awan ti dakes nga inaramidna isu a kayatna nga ikalintegan ti bagina iti imatang ti Dios. (Job 13:15) Kaskasdi, sidadaan ni Job nga aguray ken Jehova, a nangyeg iti nasayaat a resulta. Nakitana a kasapulanna ti mailinteg, nangruna iti reaksionna iti suot a napasaranna. (Job 40:6-8; 42:3, 6) Idi agangay, aglaplapusanan a bendision ti impaay ti Dios kenni Job gapu iti kinapakumbabana.​—Job 42:10-13.

No napukawmo ti pribilehiom gapu iti di umiso nga aramid, nalabit a pampanunotem no talaga met laeng a napakawan ken nalipatanen dayta ni Jehova ken dagiti kapammatiam. Bueno, usigem ti kaso ni Ari Manases iti Juda. “Inaramidna no ania ti dakes kadagiti mata ni Jehova, tapno pagrurodenna.” (2 Ar. 21:6) Kaskasdi, natay ni Manases kas matalek nga adipen ken ari. Kasano a kasta?

Impangagna ngamin ti disiplina. Kalpasan ti dina panangikankano kadagiti pakdaar, impalubos ni Jehova nga isu ket alaen dagiti Asirio kas nakakawar a kautibo iti adayo a Babilonia. Sadiay a ‘pinalukneng ni Manases ti rupa ni Jehova a Diosna ket impakumbabana ti bagina iti kasta unay gapu iti Dios dagidi ammana. Ket nagkarkararag Kenkuana.’ Impakita ni Manases ti naimpusuan a panagbabawina babaen ti aramid isu a napakawan.​—2 Cron. 33:12, 13.

Kaaduanna a saan nga aggigiddan a maisubli dagiti napukawmo a pribilehio. Ngem iti panaglabas ti panawen, mabalin a maisubli ti sumagmamano nga annongem. Ti panangawatmo kadagitoy ken panangaramidmo iti amin a kabaelam ket masansan nga agresulta iti kanayonan a pribilehio. Saan a kanayon a nalaka dayta. Mabalin a makariknaka iti pannakaupay. Nupay kasta, mangyeg iti nasayaat a resulta ti kinatulok ken panagreggetmo.

Alaentayo a pagarigan ni Jose nga anak ni Jacob. Iti edad a 17, isu ket di nainkalintegan nga inlako dagiti kakabsatna iti pannakaadipen. (Gen. 37:2, 26-28) Saan a kasta ti namnamaenna a panangtrato kenkuana dagiti kakabsatna. Ngem situtulok a nakibagay iti kasasaadna. Gapuna, babaen iti bendision ni Jehova, isu ket nagbalin a ‘manangaywan iti balay ni apona.’ (Gen. 39:2) Kalpasanna, naibalud ni Jose. Ngem nagtalinaed a matalek isu a nagtultuloy a naay-ayo kenkuana ni Jehova. Iti kasta, naitalek kenkuana ti panangimaton kadagiti aktibidad iti pagbaludan.​—Gen. 39:21-23.

Nupay saan nga ammo ni Jose nga adda amin panggep dagita, intultuloyna nga inaramid ti amin a kabaelanna. Iti kasta, isu ket inusar ni Jehova a mangtaginayon iti kaputotan a pagtaudan ti naikari a Bin-i. (Gen. 3:15; 45:5-8) Nupay saantayo a namnamaen a maaddaantayo iti dakkel nga annongen a kas iti tinagiragsak ni Jose, dagiti naipaltiing a salaysay ipakitada a ni Jehova ti mangimaniobra kadagiti pribilehio a maragpat dagiti adipenna. Kanayon koma a sidadaanka iti aniaman a pribilehio babaen iti panangtuladmo ken Jose.

Makasursuro Kadagiti Narigat a Kapadasan

Nagpasar da Job, Manases, ken Jose kadagiti di makaay-ayo a kapadasan. Aminda ti nangakseptar iti impalubos ni Jehova a mapasamak, ken adda napateg a nasursuro ti tunggal maysa kadakuada. Ania ti mabalin a maadalmo iti dayta?

Kitaem no ania ti kayat ni Jehova nga isuro kenka. Gapu iti pannakapaay ni Job, inturongna ti atensionna iti bagina imbes a kadagiti napatpateg nga isyu. Ngem babaen ti naayat a panangilinteg ni Jehova, naisubli ti umiso a panangmatmat ni Job. Inaminna: “Nagsaoak, ngem saanko idi a maaw-awatan.” (Job 42:3) No nasaktanka gapu iti pannakaikkat dagiti pribilehiom, ‘saanmo a panunoten nga ad-adda ti bagim ngem iti rebbengmo a panangpanunot; no di ket agpanunotka tapno maaddaanka iti nasimbeng a panagpampanunot.’ (Roma 12:3) Mabalin a kayatnaka nga ilinteg ni Jehova iti pamay-an a saanmo pay a naan-anay a maawatan.

Awatem ti disiplina. Idi damo, mabalin a narikna ni Manases a saan a nainkalintegan ti nakaro a pannakatubngarna. Kaskasdi, inawatna dayta, nagbabawi, ken inidianna dagiti dakes nga inaramidna. Aniaman ti panangmatmatmo iti disiplina nga inawatmo, ‘agpakumbabaka iti imatang ni Jehova, ket itan-oknakanto.’​—1 Ped. 5:6; Sant. 4:10.

Aganus ken sidadaanka koma. Gapu kadagiti napasaranna, nalaka la koma a nagsakit ti nakem ni Job ken agpanunot no kasano a makabales. Nupay kasta, napatanorna ti nauneg a pannakaawat ken asi. (Gen. 50:15-21) No naupayka, agan-anuska. Sidadaanka koma nga agpaisuro ken Jehova.

Adda kadi pribilehiom idi iti kongregasion Kristiano? Ipalubosmo koma a mangitalek kenka ni Jehova kadagiti pribilehio iti masanguanan. Pabilgem ti espiritualidadmo. Ti koma kinaanus ken kinapakumbaba ti mangringbaw iti riknam. Situtulok nga awatem ti aniaman nga annongen a maitalek kenka. Manamnamam a “ti aniaman a naimbag saanto a medmedan ni Jehova kadagidiay magmagna iti kinaawan pagkurangan.”​—Sal. 84:11.

[Blurb iti panid 30]

Pabilgem ti pammatim babaen ti naimpusuan a panagkararag

[Ladawan iti panid 31]

Ti ad-adu a tiempo a pannakipaset iti ministerio ket nagsayaat a pamay-an tapno maparayray ti relasionmo ken Jehova

[Ladawan iti panid 32]

Ipalubosmo koma a mangitalek kenka ni Jehova kadagiti pribilehio iti masanguanan