Ti Nasantuan nga Espiritu​—Apay a Nagduduma ti Pannakaawat?

ANIA ti nasantuan nga espiritu? Kasla simple la dayta a saludsod ngem narigat a sungbatan. Ni Pope Benedict XVI kinunana iti maysa a tallaong idiay Australia: “Kasla imposible a naan-anay a maawatantayo ti maipapan iti Espiritu.”

Nagduduma ti kapanunotan ken dakkel ti panagduadua maipapan iti saludsod nga, Ania ti nasantuan nga espiritu? Dagitoy ti sumagmamano a gagangay a sungbat:

• Maysa a pudno a persona nga adda iti uneg dagiti adalan ni Kristo.

• Nadibinuan a siensia, ti agtigtignay a linteg ti Dios.

• Presensia ti Dios nga agtigtignay iti lubong.

• Ti maikatlo a persona iti Trinidad.

Apay a nagduduma dagita a pannakaawat? Nangrugi dayta idi maikapat a siglo K.P., idi insuro ti dadduma a teologo a ti nasantuan nga espiritu ket maysa a persona a nalabit kapada ti Dios. Ngem saan nga isursuro dayta ti Kasuratan wenno dagiti nagkauna a pasurot ni Kristo. Inlawlawag ti New Catholic Encyclopedia: “Ti Daan a Tulag nalawag a saanna nga iladawan ti espiritu ti Dios kas maysa a persona . . . ti espiritu ti Dios ket ti pannakabalin ti Dios.” Kuna ti isu met la a reperensia: “Ti kaaduan a paset ti Baro a Tulag ipalgakna a ti espiritu ti Dios ket maysa a puersa, saan a maysa a persona; nangnangruna a nagminar daytoy idi natukoy ti espiritu kas pannakabalin ti Dios.”

Maawatantayo no apay a marigatan dagiti tattao a mangpanunot a ti pannakabalin ket maysa a persona. Gapuna, sigun iti maysa a nabiit pay a surbey iti Estados Unidos, ilaksid ti kaaduan a tattao ti ideya a ti nasantuan nga espiritu ket maysa a persona. Umisoda kadi? Wenno rumbeng kadi a patientayo dagiti teologo a mangipapilit a “ti Espiritu Santo ket maysa a Persona a kas iti Ama ken iti Anak”?

Makasaraktayo iti mapagpannurayan a sungbat babaen ti Sao ti Dios, ti Biblia, a detalyado a mangilawlawag iti maipapan iti nasantuan nga espiritu. Insurat ni apostol Pablo: “Ti amin a Nasantoan a Surat, ket naserbi a pangisuro iti kinapudno, pangbabalaw.”​—2 Timoteo 3:16, Ti Baro a Naimbag a Damag Biblia.

Apay a masapul nga ammuem ti kinapudno maipapan iti nasantuan nga espiritu? Gapu ta ti pannakaammo iti dayta a kinapudno ti mabalin a manglukat iti gundaway tapno magun-odmo ti tulong ti Dios. Adda kadi dagiti gundaway a kasla napaksuyankan? Inkari ni Jesus kadagiti adalanna: “Itultuloyyo ti agdawat, ket maitedto dayta kadakayo . . . No dakayo . . . ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”​—Lucas 11:9, 13.

Kadagiti sumaganad nga artikulo, bay-antayo a ti Biblia ti mangipalgak kadatayo no ania a talaga ti nasantuan nga espiritu. Ken kitaentayo no kasano a makatulong dayta a mangpasayaat iti biagtayo.

[Blurb iti panid 3]

Ipalgak kadatayo ti Biblia no ania a talaga ti nasantuan nga espiritu