Saludsod Dagiti Agbasbasa
Protestante Kadi ti Relihion Dagiti Saksi ni Jehova?
Saan nga ibilang dagiti Saksi ni Jehova ti bagbagida kas Protestante. Apay?
Nabuangay ti Protestantismo idiay Europa idi maika-16 a siglo gapu iti panangikagumaan a mangbalbaliw iti Iglesia Romana Katolika. Ti sao a “Protestante” ket damo a nayawag kadagiti pasurot ni Martin Luther iti maysa a kombension idiay Speyer (Diet of Speyer) idi 1529. Sipud idi, dayta a sao ti kangrunaan a nausar a mangtukoy iti amin a mangan-annurot kadagiti prinsipio ken panggep ti Repormasion. Gapuna, ti Merriam-Webster’s Collegiate Dictionary, maika-11 nga Edision, depinarenna ti Protestante kas “maysa a kameng ti aniaman a sekta a di umanamong iti sapasap nga autoridad ti Papa ken mangan-annurot kadagiti prinsipio ti Repormasion, a ti anamong ti Dios ket magun-odan laeng babaen iti pammati, nga amin a manamati ket papadi, ken ti Biblia ti kakaisuna a gubuayan ti kinapudno.”
Nupay saan nga anamongan dagiti Saksi ni Jehova ti sapasap nga autoridad ti papa ken sipapasnek a patienda a ti Biblia laeng ti gubuayan ti kinapudno, adu ti nakaidumaanda kadagiti relihion a Protestante. Iti kinapudnona, ti The Encyclopedia of Religion tinukoyna dagiti Saksi ni Jehova a “naisalsalumina.” Utobem ti tallo a nakaidumaanda.
Umuna, nupay saan nga anamongan dagiti Protestante ti dadduma a wagas ti panagdayaw dagiti Katoliko, tinaginayon dagiti lider ti Repormasion ti dadduma a doktrina dagiti Katoliko, kas iti Trinidad, umap-apuy nga impierno, ken imortal a kararua. Ngem dagiti Saksi ni Jehova patienda a dagita a doktrina saanda laeng a maikaniwas iti Biblia no di ket itandudoda pay ti di umiso a panangmatmat iti Dios.—Kitaem ti panid 4-7 daytoy a magasin.
Maikadua, ti pakaseknan ti relihion dagiti Saksi ni Jehova ket saan a ti basta panangbusor kadagiti pannursuro ti maysa a relihion no di ket ti panangisuro iti umiso. Ipangpangagda daytoy a balakad ti Biblia: “Masapul a saan a makiringringgor ti adipen ti Apo. Masapul a naasi iti amin a tattao, nalaing ken naanus a maestro; nasingpet ken naannad a mangpatigmaan kadagiti kabusorna.” (2 Timoteo 2:24, 25, Ti Baro a Naimbag a Damag Biblia) Pudno nga ibatad dagiti Saksi ni Jehova dagiti nagdumaan ti ibagbaga ti Biblia ken ti isursuro ti adu a relihion. Ngem saanda a panggep a balbaliwan ti dadduma a relihion. Imbes ketdi, panggepda a tulongan dagiti napasnek nga indibidual a manggun-od iti umiso a pannakaammo maipapan iti Dios ken iti Biblia a Saona. (Colosas 1:9, 10) No saan nga umanamong kadakuada dagiti tattao a sabali ti relihionda, liklikan dagiti Saksi ni Jehova ti awan mamaayna a pannakidebate.—2 Timoteo 2:23.
Maikatlo, saan a kas iti Protestante a nabingaybingay iti ginasgasut a sekta, tinaginayon dagiti Saksi ni Jehova ti nagkaykaysa nga internasional a panagkakabsat. No maipapan iti doktrina, amin a Saksi ni Jehova iti nasurok a 230 a pagilian ‘agsasaoda a sangsangkatunos’ kas imbalakad ni apostol Pablo. Saanda a nabingaybingay. Imbes ketdi, pudno a ‘nagkaykaysada iti isu met laeng a panunot ken iti isu met laeng a wagas ti panagpampanunot.’ (1 Corinto 1:10) Ikagkagumaanda a “salimetmetan ti panagmaymaysa ti espiritu iti mamagkaykaysa a singgalut ti talna” iti nagbabaetanda.—Efeso 4:3.