No Ania ti Insuro ni Jesus Maipapan iti Kinasiasinona

“Ammo ni Jesus ti amin maipapan iti kinasiasinona, no sadino ti naggappuanna, no ania ti rason nga immay ditoy lubong, ken no ania ti mapasamakto kenkuana.”​—AUTHOR HERBERT LOCKYER.

TAPNO maakseptar ken mamatitayo kadagiti insuro ni Jesus, adda masapul nga ammuentayo maipapan kenkuana. Siasino a talaga ni Jesus? Sadino ti naggappuanna? Ania ti panggep ti biagna? Kadagiti Ebanghelio​—ti Mateo, Marcos, Lucas, ken Juan​—mabalintayo nga ammuen dagiti sungbat, a kas man la mangmangngegtayo dagita manipud mismo ken Jesus.

Nagbiag sakbay a naipasngay ditoy daga Naminsan, kinuna ni Jesus: “Kasakbayan a napaadda ni Abraham, addaakon.” (Juan 8:58) Nagbiag ni Abraham agarup 2,000 a tawen sakbay a naipasngay ni Jesus. Ngem nagbiag ni Jesus kasakbayan pay ti panawen dayta a matalek a patriarka. Ngem sadino ti ayan idi ni Jesus? “Bimmabaak manipud langit,” inlawlawagna.​—Juan 6:38.

Ti Anak ti Dios Adu ti anghel nga annak ni Jehova. Ngem naisangsangayan ni Jesus. Tinukoyna ti bagina kas “ti bugbugtong nga Anak ti Dios.” (Juan 3:18) Kayat a sawen dagita a sasao a ni Jesus ti kakaisuna a direkta a pinarsua ti Dios. Babaen iti bugbugtong nga Anakna, pinarsua ti Dios ti amin a dadduma a bambanag.​—Colosas 1:16.

“Ti Anak ti Tao” Dagita a sasao ti kangrunaan nga inusar ni Jesus a mangipabigbig iti kinasiasinona. (Mateo 8:20) Impakitana ngarud nga isu ket saan a naglasag nga anghel wenno espiritu a parsua a nagusar iti pisikal a bagi. Imbes ketdi, nagbalin ni Jesus kas naan-anay a tao. Inusar ti Dios ti nasantuan nga espirituna tapno mayakar ditoy daga ti biag ti Anakna idiay langit, a nagresulta iti panagsikog ti birhen a ni Maria. Idi agangay, naipasngay ni Jesus kas perpekto wenno awanan basol a tao.​—Mateo 1:18; Lucas 1:35; Juan 8:46.

Ti naikari a Mesias “Ammok nga umay ti Mesias,” kinuna ti maysa a Samaritana ken Jesus. Insungbat ni Jesus: “Siak nga agsasao kenka isu dayta.” (Juan 4:25, 26) Kas iti sao a “Kristo,” ti sao a “Mesias” kaipapananna “Daydiay Napulotan.” Ni Jesus ket napulotan wenno dinutokan ti Dios agpaay iti naisangsangayan nga akem iti pannakatungpal dagiti kari ti Dios.

Ti kangrunaan a misionna Naminsan, kinuna ni Jesus: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Nupay nagadu ti inaramidna a kinaimbag para kadagiti agkasapulan a tattao, ti panangikasaba iti Pagarian ti Dios ti ad-adda nga impamaysana. Mausig iti daytoy a serye ti insurona maipapan iti dayta a Pagarian.

Nalawag a saan a gagangay a tao ni Jesus.a Kas makitatayto, ti biagna idi idiay langit ti nangted iti dakdakkel a kaipapanan kadagiti sinaona bayat ti kaaddana ditoy daga. Ditay ngarud pakasdaawan nga inkasabana ti mensahe a mangapektar iti biag ti minilmilion a tattao iti intero a lubong.

[Footnote]