Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Apay a masapul a matay ti Mesias?

Ti ipapatay ni Jesus pinaneknekanna a masalimetmetan ti perpekto a tao ti nadiosan a debosion uray iti sidong dagiti karirigatan a pannubok. Kasta met, binayadanna ti dusa ti basol a natawid dagiti kaputotan ni Adan ken pinagbalinna a posible ti biag nga agnanayon.​—12/15, panid 22-23.

• Ania ti makatulong iti maysa a maaddaan iti umiso a panangmatmat iti arak?

Makatulong ti panagkararag ken panagadal iti Biblia. Napateg met ti panangpatanor iti panagteppel, panangsalimetmet iti determinasion, ken panangpili kadagiti nasayaat a kakadua. No ikeddeng ti maysa ti uminum, masapul a mangipasdek iti masinunuo a limitasion, ken ammona koma ti agkedked.​—1/1, panid 7-9.

• Ania ti ramanen ti makagunggona a komunikasion kadagiti annak?

Malaksid iti pannakisarita kadakuada, ramanenna ti panagsaludsod ken siaanus a panagimdeng kadagiti sungbatda. Natakuatan ti adu a pamilia a nasayaat a gundaway ti oras ti pannangan para iti panagsasarita.​—1/15, panid 18-19.

• Yantangay perpekto ni Jehova, apay a makarikna iti ladingit?

Adda dagiti gundaway a nagbalbaliw ti rikna ti Dios kadagiti tattao. Kas pagarigan, saan laeng a namnaminsan a dagiti nagkauna nga Israelita pinanawanda ni Jehova ken nagserbida kadagiti didiosen. Gapuna, inikkat ni Jehova ti pannalaknibna kadakuada. Ngem kadagiti gundaway a nagbabawyanda dagiti basolda ken nagpatulongda iti Dios, nagbaliw ti riknana kadakuada ket ‘naladingitan.’ (Uk. 2:18)​—2/1, panid 21.

• Kadagiti ania a kasasaad a mabalin nga ikabilangan ti panagpabautisar manen?

Mabalin nga ikabilangan dayta ti maysa no adda ilimlimedna a dakes nga aramid idi nabautisaran, a mabalin a pakailaksidanna koma no balido ti bautismona.​—2/15, panid 22.

• Ania dagiti tallo a di umiso nga irason ti dadduma no apay a saanda a napudno?

Ibilang ti dadduma a nainkalintegan ti panagtakawda gapu ta napanglawda. Irason met ti dadduma, “Ar-aramiden ti amin dayta.” Ken adda dagiti makasarak iti napapateg a banag ken tagikuaendan dayta, nga ibagada, “Kukuak ta siak ti nakasarak.” Saan nga anamongan ti Biblia ti aniaman kadagita a panagrasrason.​—3/1, panid 12-14.

• Iti pangngarig ni Jesus maipapan iti trigo ken dakes a ruot, ania ti iladawan ti panagimula iti nasayaat a bin-i?

Ni Jesus, ti Anak ti tao insaganana ti talon bayat ti ministeriona ditoy daga. Sipud idi Pentecostes 33 K.P. ken agtultuloy, maimula ti nasayaat a bin-i no mapulotan dagiti Kristiano kas annak ti Dios, dagiti annak ti Pagarian.​—3/15, panid 20.

• Iti pangngarig ni Jesus, kasano a ti simboliko a trigo maurnongda iti kamalig ni Jehova? (Mat. 13:30)

Ti kaitungpalanna ket agpaut iti sumagmamano a tiempo bayat ti panungpalan ti sistema dagiti bambanag. Dagiti napulotan nga annak ti Pagarian, ti simboliko a trigo, ket maurnongda iti kamalig ni Jehova no maipanda iti naisubli a kongregasion Kristiano wenno magun-odda ti nailangitan a gunggonada.​—3/15, panid 22.

• Siasino ti mangikeddeng no ania dagiti autentiko a libro a mangbukel iti Kristiano a Griego a Kasuratan?

Saan a ti aniaman a konsilio ti simbaan wenno lider ti relihion. Imbes ketdi, dagiti pudno a Kristiano nga iwanwanwan ti nasantuan nga espiritu ti Dios ti makabigbig no ania dagiti libro a pudno a naipaltiing. Maitunos dayta iti kinapudno a ti “panangilasin iti naipaltiing a sasao” ket maysa kadagiti namilagruan a sagut ti espiritu a naited kadagiti nagkauna a dekada ti kongregasion Kristiano. (1 Cor. 12:4, 10)​—4/1, panid 28.