Adda Pay Kadi Makuna a Basol?
ITI di pay nabayag, dagiti agsersermon kanayon a kondenarenda ti maaw-awagan a “pito a mortal a basol”—kinaderrep, kinabuklis, kinaagum, kinasadut, kinamanagpungpungtot, panagapal, ken kinatangsit. Masansan a deskribirenda idi ti nakaam-amak a resulta ti panagbasol ken mangballaagda tapno agbabawi dagiti tattao. “Ita,” kuna ti maysa a mannurat, “saanen a dagiti nakababain a kinapudno maipapan iti basol ti dakdakamaten ti kaaduan nga agsersermon, no di ket, dagiti topiko a pagaayat a denggen dagiti tattao.”
Kasta met laeng ti pagannayasan a napaliiw dagiti kolumnista. Dagitoy ti sumagmamano a komentoda:
▪ “Ti sermon a makaay-ayo ita ket saanen a dagiti dati a saklawen ti basol—ti panagbabawi ken pannakasubbot—no di ket ti panagayat ken panangitan-ok iti bagi.”—Star Beacon, Ashtabula, Ohio.
▪ “Saanen a pakadanagan dagiti tattao ti maipapan iti basol.”—Newsweek.
▪ “Ti pakaseknantayo ita ket saan a no ania ti kalikaguman ti Dios kadatayo, no di ket no ania ti maipaay kadatayo ti Dios.”—Chicago Sun-Times.
Gapu ta agrarairan ti kinapanuynoy ken nadumaduma a prinsipio, bumdeng itan dagiti tattao a mangibaga no ania ti naimbag ken dakes. Maibilangen a kinagubsang ti panangkuestion iti moralidad ti sabsabali. Para iti adu, ti panangbabalaw kadagiti aramid ti sabali ti kadagsenan a basol. Isu a timmaud daytoy a kapanunotan: ‘Ti patpatiem mabalin a nangyeg kenka iti pagimbagam, ngem saan a rumbeng nga ipilitmo ti kapanunotam iti siasinoman. Agbibiag ita dagiti tattao maitunos iti bukodda a prinsipio. Saan la a sika ti makaammo iti naimbag. Kas iti prinsipiom, naimbag met ti prinsipio ti sabsabali.’
Dayta a panagrasrason ti nangbalbaliw iti kababalin dagiti tattao. Ibilang ti kaaduan a saanen a serioso ti sao a “basol.” Nagbalin pay ketdin a pagaangawan dayta. Saanen a maibilang a nadagsen a basol ti panagdenna dagiti di nagkasar, pannakikamalala, ken homoseksualidad.
Nabatad a nagbaliwen ti panangmatmat dagiti tattao maipapan iti akseptarenda kas “gagangay” ken no ania ti ibilangda a “basol.” Ngem apay a nagbaliw ti kababalin dagiti tattao? Ania ti napasamaken iti basol? Ken talaga kadi a napateg no ania ti panangmatmatmo?