Saludsod Dagiti Agbasbasa
Adda Kadi Nangrugian ti Dios?
▪ Awan, sigun iti Biblia. Datin nga adda ti Dios sakbay pay ti punganay. Narigat a maawatan ti kinaagnanayon ti Dios, ngem ditay mabalin a laksiden lattan dayta nga idea.
Nainkalintegan kadi a namnamaentayo a maawatantayo amin a daldalan ti Dios? Kinuna ni apostol Pablo: “O nagunegen ti kinabaknang ken sirib ken pannakaammo ti Dios! Anian a di pannakasukimat kadagiti panangukomna ken di pannakatalunton kadagiti dalanna!” (Roma 11:33) Ti maysa a maladaga dina matarusan ti amin maipapan iti nagannak kenkuana. Iti umasping a pamay-an, saantay met a matukod ti kauneg ti sirib ken pannakaammo ti Dios. Ipakita dagiti naipaltiing a sasao ni Pablo a nupay maipapan dayta iti naisangsangayan a sirib ken asi ti Dios, adda dagiti bambanag maipapan ken Jehova a Dios ken dagiti ar-aramidna a saan a matukod ti isip ti tao. Maysa kadagita ti idea nga awan nangrugian ti Dios. Kaskasdi, naan-anay nga agtalektayo iti isursuro ti Biblia maipapan iti Dios. Kinuna ni Jesu-Kristo maipapan kadagiti sagrado a sursurat: “Santipikarem ida babaen iti kinapudno; ti saom ket kinapudno.”—Juan 17:17.
Inkararag ni Moises ken Jehova: “Manipud pay ketdi idi kinaagnanayon agingga iti kinaagnanayon, sika ti Dios.” (Salmo 90:2, Ti Biblia) Ni Moises dineskribirna ditoy ti kaadda ti Dios iti dua a direksion. Ti maysa ket agturong iti masanguanan. Ni Jehova “Daydiay sibibiag iti agnanayon ken awan inggana.” (Apocalipsis 4:10) Gapuna, ti kaadda ti Dios ket agtultuloy iti agnanayon. Ti sabali a direksion ket agturong iti napalabas. Iti sabali a pannao, saan a naparsua ti Dios ken saan met a timmaud lattan. Imbes ketdi, awan ti nangrugian ti kaaddana.
Ti idea nga awan ti nangrugian ken pagpatinggaan ti maysa ket narigat a matarusan ti kaaduan kadatayo. Ngem no dadduma, kasapulan nga awatentayo nga adda dagiti saantayo a kabaelan a tarusan, kas kadagiti positibo ken negatibo a numero. Mabalin nga agtultuloy nga awan inggana ti panangbilang iti numero, agpangato man wenno agpababa. Saan kadi a mabalintay met nga iyaplikar dayta iti tawtawen a kaadda ti Namarsua?
Maitutop ngarud a ti laeng Dios ti addaan iti naisangsangayan a titulo nga “Ari ti kinaagnanayon.” (1 Timoteo 1:17) Panunotem laengen: Ni Jesu-Kristo, dagiti riniwriw nga anghel idiay langit, ken dagiti tattao ditoy daga addaanda amin iti nangrugian yantangay naparsuada. (Colosas 1:15, 16) Saan a kasta ti Dios, ta ni Jehova ket addan “manipud pay ketdi iti kinaagnanayon agingga iti kinaagnanayon.” (Salmo 90:2, Ti Biblia) Iti sabali a pannao, awan nangrugian ni Jehova. No ipettengtayo a naparsua ti Dios, mangpatpataudtayo laeng iti awan mamaayna ken awan inggana a saludsod no siasino ti nangparsua iti Namarsua.
Ngem laglagipem a ti agnanayon a kaadda ti Dios ket maysa a kinapudno a di mabalin nga iyaleng-aleng. No basaentayo a naimbag ti kararag ni Moises, mautobtayo a ti kinaagnanayon ti Dios patalgedanna ti naayat a karina kadatayo nga agnanayon a biag. Saan a kas iti nakaab-ababa a biagtayo ita, nadeskribir ti Dios kas “pudpudno a pagnaedan maipaay kadakami bayat ti kinapkaputotan.” Kankanayon nga adda ni Jehova agpaay iti ilina kas maysa a naayat nga Ama. Makaliwliwa koma kenka dayta a nakaskasdaaw a kinapudno!—Salmo 90:1.