Ti Kinaalerto Mangyeg Kadagiti Nasayaat a Resulta
ALERTOKAYO kadi a mangasaba no adda dagiti di ninamnama a gundaway a tumaud iti teritoriayo? Kasta dagiti Kristiano a kakabsattayo iti sangladan a siudad ti Turku, Finland, ken nangyeg kadagiti nasayaat a resulta ti kinaalertoda.
Naminsan, nadlaw dagiti kakabsat idiay Turku nga adda grupo dagiti lallaki a taga-Asia a simmangpet iti ilida tapno iringpasda ti dakkel a barko iti maysa a pagaramidan iti barko. Di nagbayag, naammuan ti maysa a kabsat no ania dagiti hotel a pagnanaedan dagitoy a ganggannaet a trabahador. Naammuanna pay a tunggal agsapa, adda dagiti bus a mangitulod kadakuada iti sangladan. Dagus a pinakaammuanna dagiti kakabsat iti Ingles a kongregasion iti Turku.
Nabigbig dagiti panglakayen iti dayta a kongregasion a ti kaadda ti adu a ganggannaet ti nangted iti di ninamnama a gundaway tapno mairanudda ti mensahe ti Pagarian. Gapuna, dagus a nangyurnosda iti maysa nga espesial a kampania. Iti alas siete ti bigat ti Domingo iti dayta met la a lawas, sangapulo nga agibumbunannag ti naguummong iti asideg ti pagurayan ti bus. Idi damo, awan ti nakitada a trabahador. Pampanunoten dagiti kakabsat, ‘Naladawtay ngata? Nagawidda ngatan?’ Ngem pagammuan ta adda simmangpet a maysa a trabahador a nakapangtrabaho. Idi kuan, agsasarunodan a sumangpet iti asideg ti pagurayan ti bus. Gapuna, rinugianen dagiti agibumbunannag a kasabaan ida babaen kadagiti publikasion nga Ingles. Imbag laengen ta agarup maysa nga oras sakbay a nakasangpet ken nakatugaw iti bus ti amin a trabahador isu a naaddaan dagiti kakabsat iti umdas a tiempo a makisarita iti kaaduan kadakuada. Kas resultana, nakaipaimada iti 126 a bokleta ken 329 a magasin!
Dayta ti nangparegta kadagiti kakabsat a mangulit iti kampania iti sumaganad a lawas bayat ti bisita ti manangaywan iti sirkito. Iti alas sais trenta ti bigat, nupay agtudtudo, indauluan ti manangaywan iti sirkito ti taripnong sakbay ti panangasaba, ket 24 nga agibumbunannag ti presente iti pagurayan ti bus. Iti dayta a gundaway, nagitugotda met kadagiti Tagalog a literatura ta naammuanda nga adu kadagita a ganggannaet ket Filipino. Kas resultana, nakaipaimada iti 7 a libro, 69 a bokleta, ken 479 a magasin. Panunotenyo laengen ti ragsak ken gagar dagiti kakabsat a nakiraman iti dayta a kampania!
Sakbay a nagawid dagiti trabahador iti pagilianda, adu kadakuada ti nasarungkaran dagiti kakabsat kadagiti hotel a nagdagusanda tapno mailawlawagda a naimbag ti mensahe ti Pagarian. Adda dagiti trabahador a nangibaga a nakasarita ida idin dagiti Saksi iti dadduma a paset ti lubong. Inyebkas dagiti trabahador ti apresasionda iti panangikagumaan dagiti kakabsat a makisarita kadakuada bayat ti kaaddada idiay Finland.
Alertokayo kadi kadagiti di ninamnama a gundaway a tumaud iti teritoriayo? Ikagkagumaanyo kadi a kasabaan dagiti tattao a nagduduma ti kulturada? No kasta, nalabit addaankayo iti kapadasan a kas iti natagiragsak dagiti kakabsattayo idiay Turku.
[Mapa/Ladawan iti panid 32]
(Para iti aktual a pannakaurnosna, kitaem ti publikasion)
FINLAND
HELSINKI
Turku
[Credit Line]
STX Europe