Surat Manipud Grenada

Maysa nga Aldaw iti Aplaya

NO BILANG ta maibaonka kas misionero iti sabali a pagilian, sigurado a magagaran ken maragsakanka unay. Kas iti nakamulagat ken masmasdaaw nga ubing, mapampanunotmo no ania dagiti agur-uray kenka sadiay​—dagiti tattao, aglawlaw, ken kapadasan iti ministerio.

Idi maibaonkami ken baketko idiay Grenada, a pakasarakan iti napintas a kosta nga addaan iti agarup 45 nga aplaya, mapampanunotmi idi no ania ngata ti itsura dagita. Dandanimi mapasaranen ti nakaragragsak nga aldaw iti maysa kadagita nga aplaya, ket magagarankamin iti kainaran ken iti panagsabuag dagiti dalluyon. Ngem dagiti tattao sadiay ti ad-adda a pakaragsakanmi.

Manipud iti pagtaenganmi iti Grenada, saan unay nga adayo ti Grand Anse Beach. Ngem nakapimpintas dagiti lugar a malabsanmi bayat ti biahe! Gapu ta agsikkosikko ti dalan, naimatanganmi a naimbag dagita nga agkakapintas a buya. Nakaberberde dagiti turod. Tunggal agsikko ti luganmi, adda masungadmi a bantay, naraber a kabakiran, dissuor, wenno makapaamanga a buya ti taaw. Di ngarud pakasdaawan a dagiti turista manipud iti intero a lubong pagay-ayatda a pasiaren dayta! Nakapimpintas dagiti buya isu a masapul nga agannad ti drayber tapno di masinga iti panagmanehona. Nakaak-akikid dagiti agsikkosikko a dalan, isu a no dadduma kasla madungparmi dagiti masabatmi a lugan.

Dimtengkami iti Convention Trade Center, iti igid ti kalsada iti Grand Anse Beach. Di nagbayag, agarup 600 a Saksi ni Jehova ti nagtataripnong agpaay iti naragsak nga aldaw ti panaglalangen ken pannakaisuro iti Biblia. Nakapatpateg dayta nga aldaw, nangruna iti agassawa a da Lesley ken Daphne nga agtawen iti nasurok a 70. Agbautisar ngamin ni Lesley. Nabautisaranen ni Daphne kas maysa a Saksi ni Jehova idi 1958, isu a nabayagen a sinegseggaanna ti aldaw a panagbautisar ni lakayna.

Para kadagiti Saksi, dakkel ti kaipapanan ti bautismo​—a maaramid babaen ti naan-anay a pannakaitaneb iti danum. Daytoy ti addang nga aramiden ti maysa nga addaanen iti umiso a pannakaammo iti kinapudno manipud Biblia ken mangyap-aplikaren kadagita iti biagna. Maysa dayta a seremonia a mangipaay iti gundaway iti maysa tapno maipakitana iti publiko nga isu ket nagdedikaren ken Jehova a Dios.

Nakiddaw a siak ti mangipalawag iti kunaen ti Kasuratan maipapan iti bautismo. Iti ngudo ti palawag, timmakder ni Lesley, ken ti dua pay a kaduana a mabautisaran. Pulido ti pannakaplantsa ti kawes ni Lesley, nakapuraw a kamisadentro, nakakurbata, ken nakaisem iti kasta unay. Insaludsodko: “Nagbabawyanyo kadin dagiti basolyo ken indedikaryon ti bagiyo ken Jehova tapno aramidenyo ti pagayatanna?” Talaga a mariknam ti kinapasnek ken debosionda idi simmungbatda iti naimpusuan a “Wen!”

Natukay a nangnangruna ti riknak gapu ta ammok ti napalabas ni Lesley. Adu a tawen a pinagkedkedanna ti agadal iti Biblia. Ngem idi bimmisitada iti sabali nga isla, inkeddeng ti tunggal maysa kadakuada ti tumabuno iti bukodna a relihion. “Mapanka makigimong, ta mapanak met iti kapiliami,” kinuna ni Lesley ken ni Daphne.

Kalpasan nga intulodna ni Daphne iti Kingdom Hall, napan ni Lesley iti kapilia ti Anglican iti isu met laeng a lugar. Idi agangay, nagsubli ni Lesley iti Kingdom Hall tapno dagasenna ni baketna. Sadiay nga inaribungbongan dagiti nasingpet, mannakigayyem a tattao a sibabara a nangabrasa kenkuana, nupay dayta ti damo a gundaway a naam-ammoda. Natukay ti rikna ni Lesley. Idiay kapiliada, awan man la ti nakisao kenkuana. “Diakton pulos agsubli iti daydiay a kapilia,” kinuna ni Lesley ken ni Daphne. “Awan man la ti nangasikaso kaniak, uray la koma ti padi. Immuneg ken rimmuarak nga awan a pulos ti nangkablaaw kaniak.” Tinakderan ni Lesley ti pangngeddengna a dinton pulos agsubli sadiay.

Kalpasan dayta, rinugianen ni Lesley ti napasnek a pannakipagadal iti Sao ti Dios. Ita, nakasaganan nga agpabautisar. Napan dagiti kandidato iti bautismo iti aplaya, ket simmarunokami kadakuada. Gapu ta ti baybay ket adda laeng iti ballasiw ti kalsada, saandan a nangaramid iti pagitaneban a kas iti maar-aramid iti kaaduan a kombension dagiti Saksi ni Jehova.

Makapaamanga ti tallo a kilometro a puraw a kadaratan ken ti kanayon a nabara nga asul a danum ti Grand Anse Beach. Iti isusungadmi iti aplaya, nasdaaw dagiti turista a nakakita iti grupomi a buklen dagiti nakakurbata a lallaki ken nakabestida a babbai. Nakasukaten ni Lesley iti pagbabasa a kawes. Panunotem laengen no ania ti rikna ni Daphne a makakita ken lakayna a mabautisaran, agarup 50 a tawen kalpasan ti pannakabautisarna! Kas iti raniag ti init iti dayta nga aldaw, nakaranraniag ti rupa ni Daphne gapu iti kasta unay nga isemna. Nakipagrag-o met dagiti turista. Nakipagpalakpakda bayat a naitaneb ti tunggal agpabautisar.

Iti aplaya, asul ti tangatang, puraw ti kadaratan, ken naalumamay dagiti dalluyon. Dayta laengen a buya iti aplaya ket ipadpadayagnan ti Namarsua. Ngem ad-adda manen nga impadayagna ti Namarsua idi rimkuas iti danum ti tallo a kabbaro a nabautisaran. Anian a rag-omi a nakaimatang kadakuada! Talaga a naisangsangayan dayta nga aldaw. Dayta ti kasasayaatan pay laeng nga aldaw para kada Lesley ken Daphne.