Dagiti Pambar—Ania ti Panangmatmat Kadagita ni Jehova?
“TI BABAI nga intedmo a kaduak, inikkannak iti bunga manipud iti kayo ket ngarud nanganak,” kinuna ni Adan. “Ti serpiente—inallilawnak ket ngarud nanganak,” insungbat ni Eva. Dagita a sasao, nga inturong dagiti umuna a nagannaktayo iti Dios, ti kaunaan a pambar iti pakasaritaan ti tao.—Gen. 3:12, 13.
Ti panangukom ni Jehova kada Adan ken Eva gapu iti sipapakinakem a panagsukirda ipamatmatna a di inawat ti Dios dagiti pambarda. (Gen. 3:16-19) Maikunatayo kadi ngarud nga amin a pambar ket saan nga awaten ni Jehova? Wenno adda kadi pambar nga ibilangna a nainkalintegan? No kasta, kasano a mapagdumatayo ti nainkalintegan ken di nainkalintegan a pambar? Tapno masungbatan dagita, usigentayo nga umuna ti kaipapanan ti sao a pambar.
Ti pambar ket rason a mangilawlawag no apay a naaramid, saan a naaramid, wenno saan a maaramid ti maysa a banag. Mabalin a nainkalintegan dayta nga eksplanasion para iti banag a saan a naaramid ken ramanenna ti naimpusuan a panagpadispensar a pakaibatayan ti konsiderasion wenno pammakawan. Ngem kas iti kaso da Adan ken Eva, ti pambar ket mabalin met a maysa a rason a pangabbong iti agpaypayso a napasamak. Yantangay masansan a mausar ti pambar iti kasta a kasasaad, gagangay a negatibo ti panangmatmat iti dayta.
No agikalintegan—nangruna no mainaig iti panagserbitayo iti Dios—masapul a liklikantayo nga ‘allilawen ti bagitayo iti ulbod a panagrasrason.’ (Sant. 1:22) Usigentayo ngarud ti sumagmamano a pagarigan ken prinsipio iti Biblia a makatulong kadatayo a ‘mangitultuloy a mangsigurado no ania ti makaay-ayo iti Apo.’—Efe. 5:10.
No Ania ti Namnamaen ti Dios nga Aramidentayo
Adda dagiti espesipiko a bilin iti Sao ti Dios a masapul a tungpalentayo kas ad-adipen ni Jehova. Kas pagarigan, ti bilin ni Kristo nga “inkayo . . . ket mangaramidkayo iti ad-adalan kadagiti tattao iti amin a nasion” ket maysa nga annongen nga agaplikar pay laeng iti amin a pudno a pasurot ni Kristo. (Mat. 28:19, 20) Kinapudnona, nakapatpateg ti panangtungpal iti dayta a bilin isu a kinuna ni apostol Pablo: “Asiak pay no diak indeklara ti naimbag a damag!”—1 Cor. 9:16.
Ngem dadduma kadagiti nabayagen nga iyad-adalantayo iti Biblia ti mabain pay laeng a mangikasaba iti naimbag a damag ti Pagarian ti Dios. (Mat. 24:14) Adda met dagidiay sigud a mangaskasaba ngem nagsardengdan a mangaramid iti dayta. Ania no dadduma ti rason dagidiay saan a makiramraman iti panangasaba? Ania ti reaksion ni Jehova kadagidiay agkedked a mangtungpal iti espesipiko a bilinna iti napalabas?
Dagiti Pambar a Saan nga Awaten ti Dios
“Nakarigrigat.” Mabalin a nakarigrigat ti mangasaba nangruna kadagidiay managbabain. Ngem usigenyo ti maadalyo iti kapadasan ni Jonas. Naited kenkuana ti annongen nga ibilangna a nakarigrigat—imbaga ni Jehova nga ipakaammona ti umad-adani a pannakadadael ti Nineve. Maawatantayo no apay a maamak ni Jonas a mangitungpal iti annongenna. Ti Nineve ket kabesera ti Asiria, ken pagaammo a nakaul-ulpit dagiti Asirio. Mabalin a pampanunoten ni Jonas: ‘Anianto ti pagbanagak no maipasangoak kadagitoy a tattao? Anianto ngata ti aramidenda kaniak?’ Di nagbayag, isu ket naglibas. Ngem saan nga inawat ni Jehova ti pambar ni Jonas. Imbes ketdi, imbaonna manen ni Jonas a mangasaba kadagiti taga-Nineve. Iti dayta a gundaway, situtured nga intungpal ni Jonas ti annongenna, ket binendisionan ni Jehova.—Jon. 1:1-3; 3:3, 4, 10.
No ibilangyo a nakarigrigat ti annongen a panangikasaba iti naimbag a damag, laglagipenyo nga “amin a bambanag mabalin iti Dios.” (Mar. 10:27) Masiguradoyo a pabilgennakayo ni Jehova no itultuloyyo a kiddawen ti tulongna ken bendisionannakayo no situtured nga itungpalyo ti ministerioyo.—Luc. 11: 9-13.
“Diak kayat.” Ania ti mabalinyo nga aramiden no kurang ti tarigagayyo a mangitungpal iti Nakristianuan a ministerio? Laglagipenyo a kabaelan ni Jehova ti agtignay kadakayo tapno impluensiaanna dagiti tarigagayyo. Kinuna ni Pablo: “Ti Dios isu daydiay, maigapu iti pakaragsakanna unay, agtigtignay kadakayo tapno agpadpada nga agtarigagay ken agtignaykayo.” (Fil. 2:13) Gapuna, mabalinyo a kiddawen ken Jehova a tignayennakayo nga agtarigagay a mangaramid iti pagayatanna. Kasta ti inaramid ni Ari David. Impakaasina ken Jehova: “Papagnaennak iti kinapudnom.” (Sal. 25:4, 5) Maaramidyo met dayta babaen ti napasnek a panangikararag ken Jehova a tignayennakayo nga agtarigagay a mangaramid iti makaay-ayo kenkuana.
Pudno a no mabannog wenno maupaytayo, pilitentayo no dadduma ti bagitayo a makigimong wenno mangasaba. No makariknatayo iti kasta, kayatna kadi a sawen a ditay pudno nga ay-ayaten ni Jehova? Saan. Uray dagiti nagkauna a matalek nga adipen ti Dios masapul nga agporsegida idi a mangaramid iti pagayatanna. Kas pagarigan, kinuna ni Pablo nga arigna a ‘dinisdisnogna ti bagina’ tapno maitungpalna dagiti bilin ti Dios. (1 Cor. 9:26, 27) Gapuna, uray no masapul a pilitentayo ti bagitayo a mangitungpal iti ministeriotayo, masiguradotayo a bendisionannatayo ni Jehova. Apay? Gapu ta pilitentayo ti bagitayo a mangaramid iti pagayatan ti Dios maigapu iti umiso a rason—ti panagayattayo ken Jehova. Babaen ti panangaramid iti dayta, makaipaaytayo iti sungbat iti pammabasol ni Satanas a dagiti adipen ni Jehova tallikudanda ti Dios no agpasarda iti suot.—Job 2:4.
“Okupadoak unay.” No dikay makiraman iti ministerio gapu ta okupadokayo unay, nagpateg a sukimatenyo manen dagiti prioridadyo. “Itultuloyyo, ngarud, a sapulen nga umuna ti pagarian,” kinuna ni Jesus. (Mat. 6:33) Tapno masurotyo dayta a mangiwanwan a prinsipio, masapul a pasimplienyo ti panagbiagyo wenno kissayanyo ti panawenyo nga aglinglingay ket usarenyo dayta iti ministerio. Siempre, adda lugar ti panaglinglingay ken ti dadduma pay a personal a pakaseknan, ngem saan a nainkalintegan dagita a pambar tapno liwayan ti ministerio. Ti adipen ti Dios nasken nga iyun-unana iti biagna dagiti interes ti Pagarian.
“Saanak a kualipikado.” Mabalin a mariknayo a saankayo a kualipikado nga agbalin a ministro ti naimbag a damag. Dadduma a matalek nga adipen ni Jehova idi panawen ti Biblia ti nakarikna a saanda a kualipikado a mangibaklay iti annongen nga intalek kadakuada ni Jehova. Alaentayo a pagarigan ni Moises. Idi immawat iti espesipiko nga annongen ken Jehova, kinunana: “Dispensarennak, Jehova, ngem saanak a natalabit a pumapalawag, uray nanipud pay idi kalman wenno nanipud pay kasakbayan dayta wenno nanipud pay panagsaom iti adipenmo, ta naullayat ti ngiwatko ken naullayat ti dilak.” Nupay pinabileg ni Jehova, kinuna ni Moises: “Dispensarennak, Jehova, ngem agbaonka, pangngaasim, babaen ti ima daydiay ibaonmonto.” (Ex. 4:10-13) Ania ti reaksion ni Jehova?
Ni Jehova saanna nga inikkat ken Moises ti annongenna. Imbes ketdi, dinutokanna ni Aaron a tumulong ken Moises a mangitungpal iti annongenna. (Ex. 4:14-17) Kanayonanna, iti simmaruno a tawtawen, intultuloy ni Jehova a sinaranay ni Moises ken impaayanna kadagiti kasapulan tapno maitungpalna ti inted-Dios nga annongenna. Makapagtalekkayo met ita a tignayen ni Jehova dagiti aduan kapadasan a kapammatianyo a tumulong kadakayo a mangitungpal iti ministerioyo. Kangrunaan iti amin, ipasigurado kadatayo ti Sao ti Dios a pagbalinennatayo ni Jehova a kualipikado a mangitungpal iti trabaho nga impaannongna kadatayo.—2 Cor. 3:5; kitaenyo ti kahon a “Ti Kararagsakan a Tawtawen iti Biagko.”
“Adda nangsair kaniak.” Nagsardeng ti dadduma a mangasaba wenno makigimong gapu ta nasair ti riknada, a panunotenda a maawatan ni Jehova dayta a pambarda. Nupay gagangay laeng a maupaytayo no adda nangsair kadatayo, nainkalintegan kadi dayta a pambar tapno agsardengtayo a makiraman kadagiti Nakristianuan nga aktibidad? Mabalin a nasair ti rikna ni Pablo ken ti kapammatianna a ni Bernabe kalpasan ti dida panagkinnaawatan a nagbanag iti “nakaro a panagpungtot.” (Ara. 15:39) Ngem nagsardeng kadi a makiraman iti ministerio ti asinoman kadakuada gapu iti dayta? Saan a pulos!
Umasping iti dayta, no adda kabsat a nangsair kadakayo, laglagipenyo a saan a ti imperpekto a kapammatianyo ti kabusoryo no di ket ni Satanas, a mayat a mangalun-on kadakayo. Ngem saan nga agballigi ti Diablo no “agtakderkayo a bumusor kenkuana, natibker iti pammati.” (1 Ped. 5:8, 9; Gal. 5:15) No addaankayo iti kasta a pammati, sigurado a dikay “dumteng iti pannakaupay.”—Roma 9:33.
No Limitado ti Maaramidantayo
Manipud kadagita a pagarigan, nabatad nga awan ti balido a Nainkasuratan a pambar a ditay itungpal dagiti espesipiko a bilin ni Jehova, a pakairamanan ti panangasaba. Nupay kasta, mabalin nga adda dagiti nainkalintegan a rason a malimitaran ti maaramidantayo iti ministerio. Mabalin a maksayan ti panawentayo a mangasaba gapu iti dadduma a Nainkasuratan a responsabilidad. Kasta met, mabalin a no dadduma mabannogtayo unay wenno agsakittayo isu a ditay maipaay ti kayattayo koma a kaadu ti panagserbi ken Jehova. Ngem ipasigurado kadatayo ti Sao ti Dios nga ammo ni Jehova ti naimpusuan a tarigagaytayo ken ikabilanganna dagiti limitasiontayo.—Sal. 103:14; 2 Cor. 8:12.
Gapuna, masapul a ditay tagibassiten ti maar-aramidantayo ken ti sabsabali mainaig iti daytoy a banag. Insurat ni apostol Pablo: “Siasinoka a mangukom iti adipen iti balay ti sabali? Iti bukodna nga apo isu agtakder wenno maikulbo.” (Roma 14:4) Imbes nga idiligtayo ti kasasaadtayo iti sabsabali, nasken a laglagipentayo a “tunggal maysa kadatayo makikuentanto iti Dios maipaay iti bagina.” (Roma 14:12; Gal. 6:4, 5) No agkararagtayo ken ni Jehova ken ibagatayo dagiti rasontayo, aramidentayo koma dayta buyogen ti “napudno a konsiensia.”—Heb. 13:18.
No Apay a Mangyeg iti Rag-o ti Panagserbi ken Jehova
Makapagserbitayo amin ken Jehova buyogen ti pudno a kinaragsak gapu ta kanayon a nainkalintegan ken kabaelantayo nga itungpal dagiti kalikagumna—aniaman ti kasasaadtayo iti biag. Apay a maikunatayo ti kasta?
Kuna ti Sao ti Dios: “Saanmo a medmedan ti naimbag kadagidiay addaan karbengan iti dayta, no adda iti pannakabalin ta imam ti panangaramid iti dayta.” (Prov. 3:27) Ania ti nadlawyo iti dayta a proverbio mainaig kadagiti kalikagum ti Dios? Saan nga ibagbaga ni Jehova nga ikagumaam a patasan ti maar-aramidan ti kabsatmo no di ket agserbika Kenkuana sigun “iti pannakabalin ta imam,” wenno iti kabaelam. Wen, tunggal maysa kadatayo—kasano man kabassit wenno kaadu ti maar-aramidantayo—makapagserbitayo ken Jehova a naimpusuan.—Luc. 10:27; Col. 3:23.
[Kahon/Ladawan iti panid 14]
“Ti Kararagsakan a Tawtawen iti Biagko”
Uray addaantayo iti nakaro a pisikal wenno emosional a limitasion, ditay koma ipapan a dagus a dayta ti manglapped kadatayo a makiraman a naan-anay iti ministerio. Kas pangyilustrar, usigenyo ti napasamak ken Ernest, maysa a kabsat idiay Canada.
Managbabain unay ken adda depekto ti panagsao ni Ernest. Kalpasan a nagsagaba iti nakaro a pannakadangran ti likudna, immikkat iti trabahona. Nupay nabaldado, ad-adu ti panawennan iti ministerio gapu iti nagbaliw a kasasaadna. Ad-adda a napabileg nga agserbi kas auxiliary pioneer gapu kadagiti pammaregta a maipapaay kadagiti gimong. Ngem iti panagriknana, saan a kualipikado iti dayta nga aspeto ti ministerio.
Tapno mapaneknekanna a dina kabaelan ti ag-auxiliary pioneer, pinadasna dayta iti makabulan. Nasdaaw ta naragpatna ti maikalikagum nga oras. Kalpasanna, pinanunotna, ‘Ammok a diak mauliten dayta.’ Tapno makitana no talaga a dina kabaelan, nagaplikar iti maysa manen a bulan. Ngem kaskasdi, nagballigi manen.
Makatawen a nag-auxiliary pioneer ni Ernest, ngem kinunana, “Sigurado a diak kabaelan ti ag-regular pioneer.” Tapno mapaneknekanna manen dayta, nagaplikar kas regular pioneer. Nasdaaw idi naragpatna ti maikalikagum a makatawen nga oras para kadagiti regular pioneer. Inkeddengna nga itultuloy dayta ket nariknana ti rag-o nga itden ti panag-regular pioneer iti dua a tawen, agingga a natay gapu iti komplikasion ti pannakadangran ti likudna. Ngem sakbay a natay, masansan a makalua a mangibaga kadagiti bisitana, “Ti panagserbik ken Jehova kas regular pioneer ti kararagsakan a tawtawen iti biagko.”
[Ladawan iti panid 13]
Mapagballigiantayo ti aniaman a makalapped kadatayo iti ministeriotayo
[Ladawan iti panid 15]
Maragsakan ni Jehova no agserbitayo kenkuana iti amin a kararua babaen ti panangaramidtayo iti amin a kabaelantayo sigun iti ipalubos ti kasasaadtayo