No Kaano a Masapul a Siririingka

MABALIN nga umanamongka a napateg ti panagtalinaed a siririing no addaka idiay eskuelaan. Adu ti agtuglep bayat ti klaseda, ngem masapul a siririingka tapno adda maadalmo. Nalabit tumabtabunoka met kadagiti Nakristianuan a gimong tapno agadal iti Biblia.

Ania ngata ti aramidem tapno saanka nga agdungsa?​—a Sapaem ti maturog iti rabii. Mabalin met a rumidepka iti tengnga ti aldaw. Kitaem no ania ti masursurotayo iti napasamak iti maysa nga agtutubo a nakaturog bayat ti palawag ni apostol Pablo iti maysa a rabii. Ukagem ti Biblia iti Aramid kapitulo 20, bersikulo 7 agingga iti 12, ket kitaem ti napasamak.

Bumisbisita idi ni Pablo iti kongregasion iti sangladan a siudad ti Troas. Kuna ti Biblia nga agbarko a “pumanaw [ni Pablo] iti sumaganad nga aldaw,” isu nga “inyatiddogna ti palawagna agingga iti tengnga ti rabii.” Kastoy ti mabasatayo: “Bayat a nakatugaw iti tawa, maysa nga agtutubo a lalaki a managan Eutico ti nakaturog iti nargaan bayat ti agtultuloy a panagpalawag ni Pablo.” Ania ti simmaruno a napasamak?​—

Natnag ni Eutico iti tawa “manipud iti maikatlo a kadsaaran.” Nagal-alisto nga immulog ni Pablo ken ti dadduma. Ngem natayen ni Eutico idi nakitada! Mailadawam kadi ti kinalidayda amin?​— Kuna ti Biblia a sinakruy ken inarakup ni Pablo ti agtutubo. Ngem siraragsak a kinuna ni Pablo idi agangay: ‘Dikay agdanag, naungaranen!’ Sibibiag manen ni Eutico ta pinagungar ti Dios!

Ania ti masursurotayo iti Dios manipud iti napasamak ken Eutico?​— Ti nailangitan nga Amatayo a ni Jehova kabaelanna a pagungaren dagiti natay, a pakairamanan dagiti ubbing. Matarusan ken ay-ayatennaka ni Jehova, nga ad-adda ngem iti maaramidan dagiti nagannakmo. Idi adda ni Jesus ditoy daga, impakitana ti kababalin ni Amana idi sinakruyna dagiti ubbing ken binendisionanna ida. Adda met ubbing a pinagungarna, a pakairamanan ti balasitang nga agtawen iti 12!

Ania ti mariknam iti pannakaammom nga ay-ayatennaka ti nailangitan nga Amatayo?​— Wen, matignaytayo met a mangayat ken Jehova ken agtulnog iti ibagbagana. Kasano ngata a maipakitatayo ti ayat iti Dios?​— Ti maysa a pamay-an ket iyebkastayo dayta. Kinuna ni Jesus: “Ay-ayatek ti Ama.” Ngem saanna laeng nga imbaga nga ay-ayatenna ti Dios, no di ket impakitana dayta babaen iti aramid.

Nagtulnog ni Jesus iti Dios. “Kankanayon nga aramidek ti bambanag a makaay-ayo kenkuana,” kuna ni Jesus. No aramidentayo dayta, maay-ayotayo ni Jehova ken ti Anakna, ni Jesus. Ikagumaantayo ngarud ti agtalinaed a siririing no addatayo iti eskuelaan ken iti Nakristianuan a gimgimong.