“Saanda a Paset ti Lubong”
“Ginura ida ti lubong, agsipud ta saanda a paset ti lubong.”—JUAN 17:14.
Ania ti Kaipapananna? Yantangay ni Jesus ket saan a paset ti lubong, saan a dimmasig kadagiti isyu iti kagimongan ken iti politika idi kaaldawanna. “No koma ti pagariak paset daytoy a lubong,” kinunana, “nakibakal koma dagiti agserserbi kaniak tapno saanak a mayawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.” (Juan 18:36) Inggunamgunamna met kadagiti pasurotna a liklikanda dagiti kababalin, panagsasao, ken ar-aramid a kagura ti Sao ti Dios.—Mateo 20:25-27.
Kasano nga Impakita Dayta Dagiti Nagkauna a Kristiano? Ni Jonathan Dymond, maysa a mannurat maipapan iti relihion, kinunana a “saan a nakiraman [dagiti nagkauna a Kristiano] iti [gubat]; aniaman ti resultana, pannakaumsi, pannakaibalud, wenno pannakapapatay.” Kaykayatda ti agsagaba imbes nga ikompromisoda ti neutral a takderda. Naidumada met gapu kadagiti moral a pagalagadanda. Naibaga kadagiti Kristiano: “Agsipud ta saankayo nga agtultuloy a makipagtaray kadakuada iti daytoy a dalan nga agturong iti isu met laeng a lugnak ti kinagaramugam, masmasdaawda ket itultuloyda ti agsao a sibabassawang kadakayo.” (1 Pedro 4:4) Insurat ti historiador a ni Will Durant a “gapu iti kinarelihioso ken kinatakneng . . . dagiti Kristiano, karurod ida dagiti pagano a managayat iti ragragsak.”
Siasinoda Ita ti Mangan-annurot iti Dayta? Kuna ti New Catholic Encyclopedia maipapan iti Nakristianuan a neutralidad: “Di umiso ti panagkedked nga agaramat iti armas.” Sigun iti maysa nga artikulo iti Reformierte Presse, ti report ti organisasion nga African Rights maipapan iti panagiinnibus dagiti puli idiay Rwanda idi 1994 patalgedanna a nakiraman ti amin a relihion, “malaksid kadagiti Saksi ni Jehova.”
Idi inlawlawag ti maysa a maestro ti haiskul ti maipapan iti Holocaust dagiti Nazi, maladingitan a nagkuna nga “awan man laeng ti grupo wenno organisasion dagiti ordinario nga umili a nakaitured a mangibutaktak iti kinaulbod, kinaranggas, ken pammarigat [ti turay].” Ngem idi bimmisita iti United States Holocaust Memorial Museum, insuratna: “Ammokon nga adda gayam grupo a nakaitured nga agsao.” Naammuanna a sinalimetmetan dagiti Saksi ni Jehova ti pammatida uray no natratoda a siraranggas.
Ngem ania ti Nakristianuan a pagalagadanda? “Kaaduan nga agtutubo a Katoliko saandan nga umanamong iti sursuro ti simbaan maipapan kadagiti isyu kas iti live-in [ken] panagdenna sakbay ti panagkasar,” kuna ti magasin a U.S. Catholic. Kinotarna ti imbaga ti maysa a diakono ti simbaan, a nagkuna: “Adu ti makitkitak—siguro nasurok a 50 porsiento—nga agkabkabbalayen sakbay pay nga agkasarda.” Ngem kuna ti The New Encyclopædia Britannica a “siiinget nga an-annuroten [dagiti Saksi ni Jehova] ti nangato a pagalagadan iti moral.”