Adda Aya Dumdumngeg Kadagiti Kararag?

“Agduaduaak idi no adda Dios ngem agkararagak latta. Diak sigurado no adda dumdumngeg, ngem mangnamnamaak nga adda. Saanak a naragsak ken awan panggep ti biagko. Maamakak a mamati iti Dios ta pagarupek a dagidiay laeng nakapuy ti mamati iti Dios.”​—PATRICIA,a IRELAND.

KASTA kadi met ti marikriknam? Agkararagka kadi uray agduaduaka nga adda Dios? No kasta, saanka nga agmaymaysa. Usigem dagitoy.

◼ Iti maysa a surbey iti 2,220 a Britano, 22 a porsiento laeng ti mamati nga adda Dios a nangparsua iti lubong ken dumngeg iti kararag. Ngem 55 a porsiento kadakuada ti sagpaminsan nga agkarkararag.

◼ Iti maysa a surbey iti uppat a kontinente, dandani 30 a porsiento kadagiti 10,000 nga agkunkuna nga ateistada ti agkararag.

Apay nga Agduaduada?

Kuna ni Allan a taga-England: “Ibagbagak idi a diak mamati iti Dios ta pagarupek a napataud laeng ti relihion tapno mangkontrol kadagiti tattao ken panguartaan pay. Kasta met, no talaga nga adda Dios, awan koma ti nakaro a panangirurumen. Ngem no dadduma siuulimek a nakatugawak a kasla ‘adda’ kasarsaritak. Salsaludsodek met, ‘Apay nga addaak ditoy?’”

Adda rason ti tunggal indibidual a makarikna iti kasta a panagduadua no masungbatan met laeng dagiti kararag. Kaaduanna, kumaro ti panagduaduada gapu kadagiti di masungbatan a saludsod kas iti sumaganad:

◼ Adda kadi Namarsua?

◼ Apay a masansan a dakes ti impluensia ti relihion?

◼ Apay nga ipalubos ti Dios ti panagsagaba?

No maammuam ti sungbat dagita a saludsod, makapagtalekka kadi nga adda dumngeg kadagiti kararag?

[Footnote]