Apay a Nasken a Sukimatem ti Relihionmo?

Ipapanmo a masapul nga agpaoperaka gapu iti grabe a sakit. Naan-anay la ketdi ti panagtalekmo iti doktor a mangopera kenka gapu ta nakadepende kenkuana ti biagmo. Saan kadi a nainsiriban no ammuem ti kapadasanna nga agopera?

Kasta met, nasayaat no sukimatem a naimbag ti relihionmo. No miembroka iti maysa a relihion, arigna italekmo kenkuana ti relasionmo iti Dios. Ramanen daytoy ti namnamam a maisalakan.

Nangted ni Jesus iti pagalagadan a makatulong kadatayo a mangilasin no umiso ti relihiontayo. Kinunana: “Tunggal kayo maammuan babaen iti bukodna a bunga.” (Lucas 6:44) Kas pagarigan, no sukimatem ti maysa a relihion, ania ti makitam a bungana? Ipangpangruna kadi dagiti liderna ti kuarta? An-annuroten kadi dagiti miembrona dagiti prinsipio ti Biblia maipapan iti pannakigubat ken moral? Kangrunaanna, adda kadi relihion a maikari a pagtalkan? Awisendaka a mangusig kadagita iti sumaganad nga artikulo.