Umad-adu ti Kinadakes!

Pagaammo a nadungngo ken naasi a babai ti 35 ti tawenna a ni Smitaa a taga-Dhaka, Bangladesh. Nagaget ken naragsak nga asawa a tumultulong iti sabsabali a mangammo iti maipapan iti Dios. Ngem nakigtot ti pamilia ken gagayyemna idi kellaat a nagsakit ken natay iti uneg laeng ti makalawas!

Ni James ken ni baketna ket agtawendan iti nasurok a 30. Addaanda met iti galad a kas ken Smita. Maysa nga aldaw ti primavera, binisitada dagiti gagayyemda idiay West Coast iti United States. Ngem didan nakaawid idiay New York gapu ta naaksidenteda iti lugan nga isu ti nakatayanda. Dayta ti nagladingitan dagiti mangay-ayat kadakuada ken katrabahuanda.

Umad-adun ti kinadakes ken rigat iti nadumaduma a lugar. Matmatay dagiti sibilian ken soldado gapu iti gubat. Biktima iti krimen ken kinaranggas dagiti inosente a tattao. Mapasamak dagiti aksidente ken nakaro a sakit a mabalin a pakatayan ti maysa, aniaman ti edad wenno kasasaadna. Napukaw dagiti komunidad gapu kadagiti kalamidad. Nasaknap ti panangidumduma ken kinaawan hustisia. Nalabit napasaramon dayta.

Normal laeng ngarud nga isaludsodtayo:

• Apay a mapasamak ti dakes kadagiti naimbag a tattao?

• Ti Dios kadi ti mapabasol kadagita?

• Naiparna laeng kadi dagiti didigra, wenno aramid ti tao?

• Agrigrigat kadi ti maysa a tao gapu iti Karma, ti resulta ti inaramidna iti napalabas a panagbiagna?

• No adda Dios a mannakabalin-amin, apay a dina salakniban dagiti naimbag a tattao?

• Mapukawto kadi ti kinadakes ken rigat?

Tapno maammuantayo, masapul a maawatantayo ti sungbat ti dua a saludsod: Apay a mapaspasamak ti dakes, ken ania ti aramiden ti Dios?