SUNGBAT DAGITI SALUDSOD MAIPAPAN ITI BIBLIA
Apay nga ikararagtayo nga umay ti Pagarian ti Dios?
Kayatmo kadi a maammuan ti ad-adu pay maipapan iti Pagarian ti Dios ken ti aramidenna iti masanguanan?
Ti Pagarian ti Dios ket nailangitan a gobierno. Insuro ni Jesus kadagiti pasurotna nga ikararagda ti Pagarian ti Dios gapu ta dayta ti mangisubli iti kinalinteg ken talna ditoy daga. Awan ti gobierno ti tao nga interamente a makaikkat iti kinaranggas, kinaawan hustisia, ken sakit. Ti Pagarian ti Dios laeng ti makaaramid iti dayta. Pinili ti Dios ti Anakna a ni Jesus nga agturay kas Ari dayta a Pagarian. Pinili met ni Jehova ti maysa a grupo dagiti pasurot ni Jesus tapno kaduana nga agturay iti Pagarian.—Basaem ti Lucas 11:2; 22:28-30.
Asidegen a dadaelen ti Pagarian ti Dios ti amin a bumusbusor iti turay ti Dios. Gapuna, ti panangikararag nga umay ti Pagarian ti Dios ket kiddaw tapno sukatan ti gobierno ti Dios ti amin a gobierno ti tao.—Basaem ti Daniel 7:13, 14; Apocalipsis 11:15, 18.
Apay a ti Pagarian ti Dios gunggonaanna dagiti tattao?
Maikari ni Jesus kas Ari gapu ta naasi. Kas Anak ti Dios, adda pannakabalinna a tumulong kadagiti agkidkiddaw iti tulong ti Dios.—Basaem ti Salmo 72:8, 12-14.
Gunggonaanto ti Pagarian ti Dios dagiti napasnek a mangikarkararag nga umay dayta ken dagiti agbibiag a maitunos iti pagayatan ti Dios. Maragsakankanto a makaammo iti isursuro ti Biblia maipapan iti Pagarian ti Dios.—Basaem ti Lucas 18:16, 17; Juan 4:23.