SUNGBAT DAGITI SALUDSOD MAIPAPAN ITI BIBLIA

Kastoy la ngatan ti biag?

Napampanunotmo kadin no adda pay ti sabali a panggep ti biag malaksid iti panagay-ayam, panagtrabaho, panagasawa, panagpamilia, ken panaglakay ken panagbaket? (Job 14:1, 2) Ibagbaga ti Biblia a pinampanunot met daytoy uray dagiti nakasirsirib a tattao.​—Basaem ti Eclesiastes 2:11.

Adda kadi panggep ti biag? Umuna, masapul a saludsodentayo, Kasano a nangrugi ti biag? Kalpasan nga inadal ti adu ti nakaskasdaaw a disenio ti utek ken ti dadduma pay a paset ti bagitayo, kombinsidoda nga adda masirib a Namarsua a nangaramid kadatayo. (Basaem ti Salmo 139:14.) No kasta, adda la ketdi rasonna no apay nga inaramidnatayo! No maammuantayo dayta a rason, ad-adda a matagiragsaktayo ti agbiag.

Apay a naparsua ti tao?

Binendisionan ti Dios dagiti immuna a pagassawaan ken inikkanna ida iti nagsayaat a trabaho. Panggepna a punnuenda ti daga, pagbalinenda a paraiso, ken agbiagda nga agnanayon.​—Basaem ti Genesis 1:28, 31.

Saan a dagus a natungpal ti panggep ti Dios idi nagrebelde dagiti tattao iti turayna. Ngem saannatayo nga inlaksid ti Dios, wenno saanna a binaliwan ti panggepna. Ipasigurado ti Biblia kadatayo nga agtigtignay ti Dios tapno maisalakan dagiti matalek a tattao ken matungpal ti panggepna iti daga! Isu a kayat ti Dios a matagiragsakmo ti biag kas iti pinanggepna! (Basaem ti Salmo 37:29.) Ammuem iti Biblia no kasanoka a mabenepisiaran iti panggep ti Dios.