Bendision Kadagidiay Tumultulong Kadagiti Agkasapulan

Adu a tattao iti intero a lubong ti agkasapulan iti makan ken pagyanan. Dadduma ti agkasapulan laeng iti namnama para iti masanguanan. No ikagumaantayo a tulongan dagiti agkasapulan, maragsakan ti Dios kadatayo ken bendisionannatayo.

TI KUNA TI NASANTUAN A KASURATAN

“Ti mangngaasi iti nanumo papautanganna ni Jehova, ket bayadanto ti Dios gapu iti inaramidna.”​—PROVERBIO 19:17.

TI KAIPAPANAN TI PANANGTULONG KADAGITI AGKASAPULAN

Nangted ni Jesus iti ilustrasion maipapan iti maysa a lalaki a kinabkabil dagiti agtatakaw ken pinanawanda a dandanin matay. (Lucas 10:29-37) Adda simmardeng nga estranghero a nangtulong ken nangaywan iti nadangran a lalaki. Inaramidna dayta uray agdumada iti puli.

Daytoy a naasi a lalaki saanna laeng nga inagasan ken impaayan iti material a tulong ti nadangran a lalaki, liniwliwa ken binang-aranna pay iti rigatna.

Ania ti maadaltayo iti daytoy nga estoria? Isursuro ni Jesus a masapul a tulongantayo dagiti agkasapulan iti aniaman a pamay-an a kabaelantayo. (Proverbio 14:31) Isursuro ti Nasantuan a Kasuratan a dandanin pagpatinggaen ti Dios ti kinapanglaw ken panagrigrigat. Ngem mabalin a maisaludsodtayo no kaano ken kasano nga aramiden ti Dios dayta. Ilawlawag ti sumaruno nga artikulo dagiti bendision nga isagsagana ti naayat a Namarsua para kenka.