SPURNINGAR FRÁ LESENDUM

Hvað rökstyður að umsátrið um borgina Jeríkó hafi staðið stutt áður en hún féll?

Samkvæmt Jósúabók 6:10-15, 20 gengu ísraelskir hermenn hringinn í kringum Jeríkó einu sinni á dag í sex daga. Á sjöunda deginum gengu þeir umhverfis borgina sjö sinnum og síðan lét Guð ógurlega múra hennar falla. Þannig komust Ísraelsmenn inn í borgina og sigruðu hana. Staðfesta fornleifafundir frásögn Biblíunnar þess efnis að umsátrið um Jeríkó hafi staðið stutt?

Til forna var algengt að hersveitir sætu um víggirtar borgir. Sama hversu lengi umsátrið stóð lögðu sigurvegararnir hald á verðmæti borgarinnar, þar á meðal allar matarbirgðir sem eftir voru. Í rústum Jeríkóborgar fundu fornleifafræðingar hins vegar miklar matarbirgðir. Tímaritið Biblical Archaeology Review segir um það: „Það sem mest var um í rústum borgarinnar, auk leirmuna, var korn ... Þetta er einsdæmi í annálunum um fornleifar Palestínu. Stundum hafa fundist ein eða tvær krukkur af korni en að finna korn í svona miklum mæli er alveg einstakt.“

Samkvæmt frásögn Biblíunnar var sérstök ástæða fyrir því að Ísraelsmenn tóku ekki kornið í Jeríkó að herfangi. Jehóva hafði bannað þeim að taka það. (Jós. 6:17, 18) Ísraelsmenn gerðu árás á borgina að vori, stuttu eftir uppskerutímann, þannig að kornbirgðirnar voru miklar. (Jós. 3:15-17; 5:10) Sú staðreynd að mikið af korni var enn í Jeríkó við fall hennar gefur til kynna að umsátur Ísraelsmanna hafi staðið stutt, rétt eins og Biblían lýsir því.